ដោយ វុត្ថា
ភ្នំពេញ៖ រដ្ឋមន្ត្រីក្រសួងទេសចរណ៍ លោក ថោង ខុន បានឱ្យដឹងថា នៅក្នុងរយៈពេល ៦ខែដើមឆ្នាំ២០១៩ នេះ ទេសចរវៀតណាមបានមកទស្សនាកម្ពុជាមានប្រមាណជាង ៤០ម៉ឺននាក់ និងរំពឹងថាទទួលបានប្រមាណ ៩០ម៉ឺននាក់នៅឆ្នាំ២០១៩ ទាំងមូល។
កម្ពុជារំពឹងថា ទេសចរវៀតណាមបានមកទស្សនាកម្ពុជានឹងកើនជិតដល់ ១លាននាក់នៅឆ្នាំ២០១៩ នេះ
លោក រដ្ឋមន្ត្រីថោង ខុន បានថ្លែងនៅក្នុងពិធីខួបលើកទី៧៤ នៃទិវាឯករាជ្យជាតិនៃសាធារណរដ្ឋសង្គមនិយមវៀតណាម កាលថ្ងៃទី២៩ ខែសីហា ឆ្នាំ២០១៩ កន្លងមកនេះថា នៅឆ្នាំ២០១៨កន្លងទៅបានឱ្យដឹង វៀតណាមជាទីផ្សារទេសចរណ៍ធំទីពីររបស់កម្ពុជា ដោយក្នុងនោះ ទេសចរជនជាតិវៀតណាមបានមកទស្សនាកម្ពុជាមានចំនួនជាង ៨០ម៉ឺននាក់ ក្នុង ចំណោមទេសចរ ៦,២លាននាក់។
លោករដ្ឋមន្ត្រីបន្តថា វិស័យទេសចរណ៍កម្ពុជាបានបង្កើតប្រាក់ចំណូលចូលសេដ្ឋកិច្ចជាតិប្រមាណ ៤៣៧៥លានដុល្លារ ស្មើនឹង ១២,៧% នៃផលិតផលក្នុងស្រុកសរុប (GDP) និងបានបង្កើតការងារផ្ទាល់ជាង ៦២ម៉ឺននាក់ ស្មើនឹង ១៣% នៃការងារសរុប។
លោករដ្ឋមន្ត្រីបានគូសបញ្ជាក់អំពីការបន្តពង្រឹងកិច្ចសហប្រតិបត្តិការក្នុងក្របខណ្ឌទ្វេភាគី និងពហុភាគីដើម្បីប្រយោជន៍ប្រជាជននៃប្រទេសទាំងពីរ ក៏ដូចជា សន្តិភាព ស្ថិរភាព និងភាពរីកចម្រើនរបស់ពិភពលោក ហើយកម្ពុជានឹងធ្វើការសហការជាមួយប្រទេសអាស៊ានផ្សេងៗទៀត ដើម្បីសហការគាំទ្រកិច្ចប្រជុំអាស៊ាននានា ដឹកនាំដោយប្រទេសវៀតណាមនៅឆ្នាំ២០២០ ឲ្យទទួលបានជោគជ័យ។
លោក ហូ វណ្ឌី ទីប្រឹក្សាសមាគមទីភ្នាក់ទេសចរណ៍កម្ពុជា បានឱ្យដឹងដែរថា ក្នុងមួយរយៈចុងក្រោយនេះ ទេសចរណ៍មកលេងកម្ពុជាមានការធ្លាក់ចុះ ដោយសារកត្តាមួយចំនួន មិនថាទេសចរណ៍វៀតណាមនោះទេ តែបើរដ្ឋាភិបាលទាំងពីរមានចំណាត់ការការទូត និងពាណិជ្ជកម្មល្អប្រសើរ នឹងមានសន្ទុះឡើងដូចអ្វីដែលលោករដ្ឋមន្ត្រីបានរំពឹងទុកចំពោះទេសចរណ៍វៀតណាមទស្សនានៅម្ពុជា។
លោកបន្តថា បច្ចុប្បន្ននេះ កម្ពុជា វៀតណាម ឡាវ និងថៃ បានបង្កើតតំបន់មរកតមួយក្នុងការជម្រុញសេដ្ឋកិច្ចនៃប្រទេសទាំង៤ ក្នុងតំបន់នេះ និងការតភ្ជាប់ទេសចរណ៍ពីប្រទេសមួយទៅប្រទេសមួយទៀតដូចជាពីកម្ពុជាទៅវៀតណាម ពីវៀតណាមមកកម្ពុជាជាដើមដោយតភ្ជាប់ទាំងផ្លូវទឹក ផ្លូវគោក និងផ្លូវអាកាស តែយ៉ាងណាក៏ដោយលុះត្រាតែប្រទេសទាំងនេះ មានទាំងទំនាក់ការទូតល្អ ទើបជំរុញឱ្យមានកំណើនទេសចរណ៍មកពីប្រទសផ្សេងទៀតកើនឡើង ក្រៅតែទេសចរណ៍នៅក្នុងប្រទេសទាំងនេះ។
លោកបញ្ជាក់ទៀតថា ទេសចរណ៍ជាអ្នកនាំលាភ នាំនូវសំណាងដល់ប្រទេសដែលខ្លួនទៅទស្សនា ដោយក្នុងនោះពួកគេត្រូវការរបស់ ៣ ជាសំខាន់ គឺទី ១ ការធ្វើដំណើរដោយសុវត្ថិភាព ទី ២ ការទទួលអាហារមានអនាម័យ និង ទី ៣ ការស្នាក់នៅប្រកបដោយផាសុកភាព ដូច្នេះ អជ្ញាធរជំរុញកត្តាទាំង ៣ទៅមុខដោយរលូន ទើបវិស័យទេសចរណ៍ និងពាណិជ្ជកម្មមានការកើនឡើងព្រមគ្នា។
ទំហំពាណិជ្ជកម្ម រវាងប្រទេសទាំងពីរកម្ពុជា-វៀតណាមបានកើនឡើងរហូតដល់ ៤,៧ ប៊ីលានដុល្លារអាមេរិក នៅឆ្នាំ២០១៨ កន្លងទៅ និង ៦ខែដើមឆ្នាំ២០១៩ នេះ កើនឡើងរហូតដល់ ២,៧ ប៊ីលានដុល្លារអាមេរិក ហើយប្រទេសទាំងពីរមានសុទិដ្ឋិនិយមក្នុងការសម្រេចបានគោលដៅនៃទំហំពាណិជ្ជកម្មរបស់ប្រទេសទាំងពីរចំនួន ៥ប៊ីលានដុល្លារអាមេរិក នៅឆ្នាំ២០២០៕
