ដោយ វុត្ថា
ភ្នំពេញ៖ រដ្ឋាភិបាលបានសម្រេចឱ្យក្រុមហ៊ុនសាជីវកម្មផ្លូវស្ពានចិន (China Road And Bridge Corporation) ចុះសិក្សាលម្អិតពីគម្រោងពង្រីកផ្លូវជាតិលេខ៧ ទៅជាផ្លូវ៤គន្លង ចាប់ពីស្គន់ ដល់ក្រុងកំពង់ចាម នៃខេត្តកំពង់ចាម។
រដ្ឋាភិបាលចាប់ផ្តើមសិក្សាពង្រីកផ្លូវជាតិលេខ៧ ពីស្គន់ទៅក្រុងកំពង់ចាម ជា ៤គន្លង
យោងតាមលិខិតរបស់រដ្ឋលេខាធិការក្រសួងសាធារណការ និងដឹកជញ្ជូន ដែលចុះហត្ថលេខាដោយលោក ស៊ុយ សាន ផ្ញើទៅកាន់អភិបាលខេត្តកំពង់ចាម កាលពីខែសីហាកន្លងទៅ បានឱ្យដឹងថា កំណាត់ផ្លូវពីស្គន់ ដល់ក្រុងកំពង់ចាម មានលក្ខណៈតូចចង្អៀតមិនអាចឆ្លើយតបជាមួយបរិមាណចរាចរណ៍ ក្រសួងសាធារណការ និងដឹកជញ្ជូន បានអនុញ្ញាតឱ្យសាជីវកម្មផ្លូវ-ស្ពានចិន សិក្សាគម្រោងពង្រីកផ្លូវជាតិលេខ៧ ទៅជាផ្លូវ៤គន្លង ចាប់ពីស្គន់ ដល់ក្រុងកំពង់ចាម ដើម្បីត្រៀមដាក់ចូលគម្រោងអភិវឌ្ឍន៍ហេដ្ឋារចនាសម្ព័ន្ធ ក្នុងក្របខណ្ឌឥណទានពីប្រទេសចិនផែនការ ៥ឆ្នាំខាងមុខ។
លិខិតដដែលបន្តថា ក្រសួងឱ្យក្រុមហ៊ុនចុះសិក្សាលម្អិតផ្លូវនេះ គឺក្នុងគោលបំណងជំរុញគម្រោងសាងសង់ផ្លូវនេះ ឱ្យបានទាន់តាមសភាពការណ៍ ។ សាជីវកម្មផ្លូវស្ពានចិន ត្រូវចុះធ្វើការសិក្សាគម្រោងខាងលើ ដោយត្រូវអនុវត្តចាប់ពីខែកញ្ញា ឆ្នាំ២០១៩នេះតទៅ។
លោក វ៉ា ស៊ីមសូរិយា អ្នកនាំពាក្យសក្រសួងសាធារណៈការ និងដឹកជញ្ជូន បានឱ្យដឹងនៅថ្ងៃទី ២ ខែកញ្ញា ឆ្នាំ ២០១៩ នេះ បានឱ្យដឹងថា ការសិក្សាគម្រោងពង្រីកផ្លូវជាតិលេខ ៧ នេះ អាចនឹងត្រូវប្រើពេលប្រមាណជិត ១ឆ្នាំផងដែរ ។
ការសិក្សានេះ មិនត្រូវបានប្រាប់ពីតួលេខជាក់លាក់លើការចំណាយថវិកានោះទេ ព្រោះស្ថិតនៅក្នុងកំណាក់ការសិក្សា លុះត្រាចប់សព្វគ្រប់ ទើបដឹងពីទំហំនៃការចំណាយទាំងការវិនិយោគលើផ្លូវដែលត្រូវចំណាយ និងការសិក្សាលើផ្លូវមួយនេះ ។
លោកបន្តថា មានក្រុមហ៊ុនចិនបានចុះសិក្សាលើគម្រោងផ្លូវជាច្រើនកន្លែងនៅក្នុងប្រទេសកម្ពុជា តែមានក្រុមហ៊ុនមួយចំនួន មិនលទ្ធភាពក្នុងការសងសាង់ដែរ ។ មកដល់ពេលនេះមានក្រុមហ៊ុនធំៗចំនួន២ ប៉ុណ្ណោះដែលមានលទ្ធភាពក្នុងការសាងស់ផ្លូវរួមមាន ក្រុមហ៊ុន Shanghai Group និង ក្រុមហ៊ុន China Road And Bridge Corporation ដែលបានសាងសង់ផ្លូវស្ពានជាច្រើនខ្សែរនៅក្នុងប្រទេសកម្ពុជា ព្រោះក្រុមហ៊ុនទាំងពីរនេះ មានលុយ ហើយងាយស្រួលជាងក្រុមហ៊ុនផ្សេងៗទៀតទាំងការសិក្សា និងសាងសង់ផ្លូវ។
បើតាមលោក វ៉ា ស៊ីមសូរីយា បញ្ជាក់ថា ផ្លូវជាតិលេខ ៧ នេះ មានប្រវែងប្រមាណ៥០០ គីឡូម៉ែត្ររាប់ចាប់ពី ស្គន់ក្រុងកំពុងចាម ដល់ ព្រំដែនឡាវ៕
