ដោយៈ រ៉ាណេត
ភ្នំពេញៈ ទីក្រុងថ្មីមួយដែលអភិវឌ្ឍន៍នៅក្នុងស្រុកអង្គស្នូល ខេត្តកណ្តាល ខណៈវិស័យអចលនទ្រព្យនៅតំបន់នេះកំពុងមានការរីកចម្រើន ហើយហេដ្ឋារចនាសម្ព័ន្ឋនានារបស់រដ្ឋាភិបាលបាននិងកំពុងពង្រីកឆ្ពោះទៅតំបន់ជាយក្រុង។
ទីក្រុងថ្មីនេះមានឈ្មោះ «ក្រុងដីមាស» អមជាមួយនឹងតំបន់កម្សាន្តកែច្នៃបែបធម្មជាតិដ៏ធំ ស្ថិតនៅក្នុងស្រុកអង្គស្នួលខេត្តកណ្តាល។
គំរោងអភិវឌ្ឍន៍ក្រុងថ្មីដីមាស គឺជាគម្រោងលំនៅដ្ឋានដ៏អស្ចារ្យមិនធ្លាប់មាននៅក្នុងតំបន់ស្រុកអង្គស្នួល ខេត្តកណ្តាល។ គម្រោងនេះត្រូវបានវិនិយោគ និងអភិវឌ្ឍឡើងដោយក្រុមហអចលនទ្រព្យ KH Land Co,.Ltd នៅលើផ្ទៃដីសរុបចំនួន៥០ហិកតា ដែលស្ថិតនីក្នុងឃុំសំរោងលើ ស្រុកអង្គស្នួល ខេត្តកណ្តាល ដែលជាតំបន់ជាយក្រុងរាជធានីភ្នំពេញ។ នេះបើតាមការលើកឡើងរបស់អគ្គនាយកក្រុមហ៊ុន KH Land Co,. Ltd លោកថុន បូរ៉ា។
លោកបានមានប្រសាន៍កាលពីព្រឹកថ្ងៃទី៣ ខែកញ្ញា ឆ្នាំ២០១៩ នៅក្នុងកម្មវិធីនៃមហាព្រឹត្តិការណ៍យល់ដឹង ពីវិសាលភាពអចលនទ្រព្យនៅកម្ពុជា នៅមជ្ឈមណ្ឌលដឺព្រីមៀសេនធ័រ សែនសុខ ក្រោមការចូលរួមពីសំណាក់បណ្តាក្រុមហ៊ុន ភ្នាក់ងារអចលនទ្រព្យ ដែលជាដៃគូ រួមជាមួយនឹងអ្នកពាក់ព័ន្ធនឹងវិស័យនេះសរុបជាង១០០០នាក់។
លោកថុន បូរ៉ា បានមានប្រសាសន៍ឲ្យដឹងថា គម្រោងក្រុងថ្មីដីមាស ដែលមានវិសាលភាពផ្ទៃដីចំនួន៥០ហិកតា នឹងត្រូវបែងចែកជាតំបន់តំបន់លំនៅដ្ឋាន តំបន់លំហែរកាយ សួនច្បារសាធារណៈ តំបន់ទិញទំនិញ ហាងកាហ្វេទំនើប និងភោជនីយដ្ឋានផងដែរ។ លោកបានបន្តទៀតថា បន្ថែមពីនេះដើម្បីធ្វើឱ្យក្រុងថ្មីដីមាស កាន់តែមានភាពទាក់ទាញខ្លាំង ដែលអាចអូសទាញចំណាប់អារម្មណ៍មនុស្សទូទៅ ឱ្យចូលមកកាន់ក្រុងថ្មីមួយនេះ ក្រុមហ៊ុនបាន និងកំពុងតែរៀបចំបង្កើតជាតំបន់ទេសចរណ៍ កម្សាន្តសិប្បនិម្មិតនៅលើផ្ទៃដីទំហំ៣ហិកតា ដោយមានជាផ្ទះបណ្តែកទឹកខ្នាតតូច សម្រាប់ស្នាក់នៅរយៈពេលពេញមួយថ្ងៃប្រមាណ១០០យូនីត”។
លោកបានបន្តទៀតថា “នៅក្នុងគម្រោង «ក្រុងថ្មីដីមាស»នេះ មានការសាងសង់ប្រព័ន្ធហេដ្ឋារចនាសម្ព័ន្ធ ស្របទៅនឹងគោលការណ៍របស់រដ្ឋាភិបាល ដូចជាផ្លូវបេតុងទំហំ១៥ម៉ែត្រ តភ្ជាប់ជាមួយផ្លូវធំរបស់រដ្ឋទំហំ៣០ម៉ែត្រ មានដាំបង្គោលភ្លើងកម្ពស់៩ម៉ែត្រ ដោយទុកចន្លោះពីគ្នាចម្ងាយ៤០ម៉ែត្រ មានបណ្តាញបង្ហូរទេសកកខ្វក់ មានបណ្តាញអគ្គិសនី និងប្រព័ន្ធទឹកស្អាតផងដែរ”។
លោកបន្តថា អ្វីដែលកាន់តែល្អ គឺក្រៅពីមានបង្កើតជាតំបន់លំនៅដ្ឋាន តំបន់ទិញទំនិញ តំបន់សួនច្បារសាធារណៈ រួមជាមួយនឹងតំបន់ទេសចរណ៍កែច្នៃ ក្រុមហ៊ុនក៏បានបែងចែកផ្ទៃដីមួយភាគធំ សម្រាប់បងប្អូនប្រជាពលរដ្ឋ ដែលមានចំណូលមធ្យម និងក្រោមមធ្យម បានក្លាយជាម្ចាស់ដីកម្មសិទ្ធិ ទុកសម្រាប់សាងសង់លំនៅដ្ឋានផងដែរ តាម ; រយៈរូបភាពពុះជាដីឡូតិ៍ ជាមួយនឹងការផ្តល់ជូននូវតម្លៃសមរម្យជាទីបំផុត។
អភិបាលរងស្រុកអង្គស្នួល លោកនូ សុវណ្ណារិទ្ធិ បានបង្ហាញពីការសាទរចំពោះគម្រោងអភិវឌ្ឍន៍ថ្មីនេះ ដោយលោកបានមានប្រសាសន៍ថា “អង្គស្នួលគឺជាស្រុកមួយដែលមានព្រុំប្រទល់ជាប់នឹងរាជធានីភ្នំពេញ មានចំនួនប្រជាពលរដ្ឋរស់នៅ និងប្រកបអាជីវកម្ម ពាណិជ្ជកម្មច្រើន ហើយក៏ស្ថិតនៅជាប់គម្រោងផ្លូវសំខាន់ៗរបស់រាជរដ្ឋាភិបាល ដែលបង្កើតឡើង ជម្រុញដល់ភាពងាយស្រួលក្នុងការដឹកជញ្ជូនផងដែរ។
លោកបានបន្តទៀតថា “បច្ចុប្បន្ននេះ កំណើនបណ្តារោងចក្រ សហគ្រាសជាច្រើនបាន និងកំពុងតែមកតាំងនៅ ក្រោយការចាកចេញពីរាជធានីភ្នំពេញ ដែលគោរពទៅតាមគោលការណ៍របស់រដ្ឋាភិបាល”។ លោកបានបន្តទៀតថា “មិនយូរទៀតនោះទេ អង្គស្នួលនឹងកែប្រែមុខមាត់កាន់តែល្អប្រសើរ និងឆាប់រហ័សបំផុត ខណៈដែលកំណើនប្រជាសាស្ត្រចូលមករស់នៅកាន់តែច្រើន ជាពិសេសតាមរយៈគម្រោង “ក្រុងថ្មីដីមាស”។
នៅក្នុងកម្មវិធីខាងលើនេះ ក៏មានកិច្ចចុះហត្ថលេខាអនុស្សារណៈយោគយល់រវាងក្រុមហ៊ុនអចលនទ្រព្យ KH Land Co,. Ltd ជាមួយក្រុមហ៊ុនភ្នាក់អចលនទ្រព្យជាដៃគូផងដែរ៕
