ដោយ វុត្ថា
ភ្នំពេញ៖ រដ្ឋបាលរាជធានីភ្នំពេញ នឹងចាប់ផ្តើម រៀបចំផ្លូវថ្មើរជើង ( Walk Street ) នៅតាមបណ្ដោយទន្លេចតុមុខចាប់ពីមុខប្រៃសណីយ៍កម្ពុជា រហូតដល់មុខព្រះបរមរាជវាំង ស្ថិតនៅក្នុងសង្កាត់វត្តភ្នំ សង្កាត់ផ្សារកណ្ដាលទី១ សង្កាត់ផ្សារកណ្ដាលទី២ និងសង្កាត់ជ័យជម្នះ ខណ្ឌដូនពេញ រាជធានីភ្នំពេញ។
លោក ឃួង ស្រេង អភិបាលក្រុងភ្នំពេញ នៅថ្ងៃទី ៥ ខែកញ្ញា ឆ្នាំ ២០១៩ នេះ បានដឹកនាំប្រជុំគណៈកម្មការរៀបចំផ្លូវថ្មើរជើង ( Walk Street) ដើម្បីអនុវត្តគម្រោងផ្លូវថ្មើរជើងមួយនេះ ( Walk Street ) ឱ្យចេញជាសមិទ្ធិផលថ្មីមួយបន្ថែមទៀត សម្រាប់ផ្ដល់ជូនបងប្អូនប្រជាពលរដ្ឋក្នុងរាជធានីភ្នំពេញ និងដើម្បីទាក់ទាញភ្ញៀវទេសចរណ៍ចូលមកទស្សនាកម្សាន្តក្នុងរាជធានីភ្នំពេញ ជាពិសេសតំបន់មាត់ទន្លេ និងព្រះបរមរាជវាំង។
លោក ឃួង ស្រេងបញ្ជាក់ថា គម្រោងបង្កើតផ្លូវថ្មើរជើងនេះនឹងក្លាយជាកញ្ចប់ទេសចរណ៍ថ្មីសម្រាប់រាជធានីភ្នំពេញ ដើម្បីទាក់ទាញភ្ញៀវទេសចរអោយដើរស្រូបយកខ្យល់អាកាសល្អបរិសុទ្ធនិងទស្សនាទេសភាពទន្លេ៤មុខដ៏ស្រស់ត្រកាលដោយគ្មានប្រទេសណាមានដូច។
លោកអភិបាលបានក៏ណែនាំដល់ក្រុមការងារអោយសិក្សាពីពេលវេលា ប្រព័ន្ធបញ្ជៀសចរាចរណ៍ និងកន្លែងចំណតយានយន្តអោយបានត្រឹមត្រូវ ដើម្បីអោយកញ្ចប់សេវាទេសចរណ៍ថ្មីនេះ បានដំណើរការដោយរលូន គ្មានការរំខានដល់ប្រជាពលរដ្ឋ។
លោកអភិបាលរូបនេះ មិនបានបញ្ជាក់ពេលវេលាជាក់លាក់ក្នុងការចាប់ផ្តើមនៅពេលណា និងផ្លូវនេះ មានទំហំប៉ុន្មានម៉ែត្រនោះទេ ។ តែយ៉ាងណាក៏ដោយ លោកថា រៀបចំផ្លូវថ្មើរជើង ( Walk Street ) នៅតំបន់នេះ ពិតជាមានសារៈខាន់ណាស់សម្រាប់ប្រជាពលរដ្ឋ និងទេសចរណ៍សម្រាប់ធ្វើដំណើរឆ្លងកាត់ ហើយក៏ជាតំបន់ប្រមូលប្តុំដោយពាណិជ្ជកម្ម សេដ្ឋកិច្ច និងទេសចរណ៍ ។
ម្យ៉ាងទៀតវានឹងជួយសម្រួលដល់ចរណ៍នៅក្នុងក្រុងដែលមានភាពមមាញឹក និងកាន់តបន្ថយគ្រោះថ្នាក់ផ្សេងៗនៅក្នុងរាជធានីភ្នំពេញ។
អាជ្ញាធររាជធានីភ្នំពេញ កន្លងមកនេះ បានសាងសង់ ផ្លូវថ្មើរជើង ជាច្រើនខ្សែរជាពិសេសផ្លូវថ្មើជើងប្របមាត់ទន្លេចាប់ពីសាលសន្និសីទចតុមុខ រហូតដល់ស្ពានព្រះមុនីវង្ស (ក្បាលថ្នល់) សម្រាប់ប្រជាពលរដ្ឋធ្វើដំណើរ និងហាត់ប្រាណ។
គម្រោងផ្លូវថ្មើជើងប្របមាត់ទន្លេនេះ ត្រូវធ្វើឡើងជា២ដំណាក់កាល គឺដំណាក់កាលជំហានទី១ មានប្រវែង៩៥០ម៉ែត្រ ចាប់ពីខាងមុខសាលចតុមុខ រហូតដល់ស្ពានកោះពេជ្រ ត្រូវបានសាងសង់រួចរាល់ និងដាក់ឱ្យដំណើរការ និងគម្រោងដំណាក់កាលទី២ទៀត គឺផ្លូវថ្មើជើងបន្តពីស្ពានកោះពេជ្រ ដល់ស្ពានព្រះមុនីវង្សបាននឹងកំពុងដំណើរការសាងសង់។
គម្រោងផ្លូវសម្រាប់ដើរនៅក្នុងរាជធានីភ្នំពញគ្រោងសាងសង់មានទទឹងចាប់ពី៦ម៉ែត្រ ទៅ១៥ម៉ែត្រ ដើម្បីបន្ថយការកកស្ទះចរាចរណ៍ និងផ្តល់ភាពងាយស្រួល សម្រាប់ប្រជាពលរដ្ឋ ដែលទៅកម្សាន្ត ហាត់ប្រាណតាមមាត់ទន្លេ៕
