ដោយ វុត្ថា
ភ្នំពេញ៖ ស្ពានបាឡេឫស្សីកែវបានដាក់ឱ្យដំណើរការឡើងវិញនៅថ្ងៃទី១៦ ខែកញ្ញា ឆ្នាំ២០១៩ ចាប់ពីវេលាម៉ោង ៧ព្រឹកតនេះ បន្ទាប់ពីអជ្ញាធរបានធ្វើការជួសជុលស្ពាននេះបញ្ចប់រួចរាល់។
លោក សាំ ពិសិដ្ឋ នាយកមន្ទីរសាធារណការ និងដឹកជញ្ជូនរាជធានីភ្នំពេញ បានប្រាប់សារព័ត៌មានក្នុងស្រុកកាលពីថ្ងៃទី ១៥ ម្សិលមិញនេះថា ដោយការខិតខំប្រឹងប្រែងរបស់វិស្វករ និងបងប្អូនកម្មករការដ្ឋានទាំងថ្ងៃ ទាំងយប់ មកដល់ពេលនេះ ការជួសជុលស្ពានបាឡេបានបញ្ចប់រួចរាល់ហើយ និងត្រៀមដាក់ឱ្យដំណើរការវេលាម៉ោង ៧ព្រឹកតនេះ ។
-->
លោកបន្តថា បងប្អូនប្រជាពលរដ្ឋនឹងធ្វើដំណើរឆ្លងកាត់ស្ពានបាឡេប្រកបដោយសេចក្តីរីករាយក្នុងឱកាសបុណ្យភ្ជុំបិណ្ឌ ហើយសង្ឃឹមថា ស្ពានជ្រោយចង្វារដែលកកស្ទះកាលពីប៉ុន្មានថ្ងៃកន្លងមកនេះ នឹងកាត់បន្ថយការកកស្ទះចរាចរ ហើយវិលមករកភាពប្រក្រតីឡើងវិញ។
សាលារាជធានីភ្នំពេញបានសម្រេចផ្អាកការធ្វើចរាចរណ៍ជាបណ្តោះអាសន្ន នូវស្ពានបាឡេនេះ កាលពីថ្ងៃទី ១១ ខែកញ្ញា ឆ្នាំ ២០១៩ នេះ បន្ទាប់ពីមានសាឡង់ របស់ក្រុមហ៊ុនសាវីមិច បើកប៉ះទង្គិចកាលពីម៉ោង៣រសៀលថ្ងៃទី១០ ខែកញ្ញាម្សិលមិញ។
ស្ពានបាឡេថ្មី ឆ្លងកាត់ទន្លេសាប ពីចំណុចឃ្លាំងស្តុកប្រេងសូគីម៉ិច ផ្លូវជាតិលេខ៥ ក្នុងខណ្ឌឫស្សីកែវ ឆ្ពោះមកកាន់តំបន់អភិវឌ្ឍន៍ ទីក្រុងរណបជ្រោយចង្វា ខណ្ឌជ្រោយចង្វា ត្រូវបានបើកសម្ពោធដាក់ឲ្យចរាចរណ៍ជាផ្លូវការ កាលពីរសៀលថ្ងៃទី៨ ខែឧសភា ឆ្នាំ២០១៨ ក្រោយពីបានដំណើរការសាងសង់ អស់រយៈពេល៦ខែ កន្លងមកនេះ។
ស្ពានបាឡេថ្មីនេះមានទទឹង១២ម៉ែត្រ និងបណ្ដោយ៥០០ម៉ែត្រ ដោយចំណាយថវិកាសាងសង់ចំនួន៩លានដុល្លារ ប្រើពេលសាងសង់៦ខែ។ ពេលដំណើរការ រថយន្តទម្ងន់លើសពី១៥តោន និងមានកម្ពស់លើស ២,៨ម៉ែត្រ មិនអនុញ្ញាតឲ្យឆ្លងកាត់ឡើយ៕
