ដោយ វុត្ថា
ភ្នំពេញៈ ទំហំនៃការវិនិយោគលើវិស័យសំណង់ នៅទូទាំងប្រទេសបានកើនឡើងដល់ទឹកប្រាក់សរុបប្រមាណ ៦០០០លានដុល្លារអាមេរិក នៅលើគម្រោងវិនិយោគថ្មីប្រមាណជាង៣ពាន់គម្រោង ដែលមានផ្ទៃក្រឡាប្រមាណជាង ១២,២លានម៉ែត្រការ៉េ។
តាមរបាយការណ៍ បង្ហាញដោយនាយកដ្ឋានស្ថិតិ និងវិភាគសេដ្ឋកិច្ច នៃក្រសួងសេដ្ឋកិច្ច និងហិរញ្ញវត្ថុបង្ហាញឲ្យដឹងថា គម្រោងវិនិយោគលើវិស័យសំណង់ គិតមកដល់ត្រឹម ខែសីហាឆ្នាំ២០១៩នេះ ក្រសួងរៀបចំដែនដី នគរូបនីយកម្ម និងសំណង់បានអនុញ្ញាតលើសំណើរសុំសាងសង់ សរុបទូទាំងប្រទេសមានចំនួនប្រមាណ៣១៧៥គម្រោង ក្នុងនោះ មានតម្លៃនៃទំហំវិនិយោគនៅលើវិស័យនេះ សរុប៥៩៨៦លានដុល្លារអាមេរិក ដោយវិនិយោគ នៅលើផ្ទៃក្រឡាប្រមាណជាង
១២,២លានម៉ែត្រការ៉េ។
-->
គំរោងវិនិយោគនេះ ត្រូវបានបែងចែកតាមសំណើរសុំសាងសង់តាមប្រភេទនីមួយៗរួមមាន សំណង់សាធារណៈមានប្រមាណ៥៦គម្រោង ការប្រើប្រាស់ថវិការដ្ឋាភិបាលមាន១៨ គម្រោង ថវិកាវិស័យឯកជន៣៦គម្រោង ការសាងសង់លំនៅឋាន និងភូមិគ្រឹះជាង២ពាន់គម្រោង សំណង់ឧស្សាហកម្ម១៣៨គម្រោង សំណង់ពាណិជ្ជកម្ម១៧៦គម្រោង សំណង់ទេសចរណ៍៨២គម្រោង និងសំណង់ផ្សេងៗទៀតមានចំនួន១៨គម្រោងផងដែរ។
ចំណែកពាក់ព័ន្ធផ្ទៃក្រឡា ដែលផ្តល់ការអនុម័តដោយមន្ទីរមានចំនួនជាង១លាន ៧សែនម៉ែត្រការ៉េ និងការផ្តល់ដោយក្រសួង មានចំនួនជាង១០លានម៉ែត្រការ៉េ។
តាមសេចក្តីព្រាងច្បាប់ស្តីពី ហិរញ្ញវត្ថុសម្រាប់ការគ្រប់គ្រងឆ្នាំ២០២០ វិស័យសំណង់ត្រូវបានព្យាករថា នឹងបន្តកំណើនរឹងមាំក្នុងអត្រារង្វង់១៧,៥% នៅក្នុងឆ្នាំ២០១៩ និង១៦,១% នៅក្នុងឆ្នាំ២០២០ ក្នុងនោះមានការរំពឹងទុក នៃការកើនឡើងអាគារលំនៅឋានដែលមានតម្លៃទាប និងមធ្យម ព្រមទាំងសំណង់អគារពាណិជ្ជកម្មជំនួសឲ្យកំណើនយឺត នៃសំណង់អគារលំនៅឋានដែលមានតម្លៃខ្ពស់៕
