ដោយ វុត្ថា
ភ្នំពេញៈ មន្រ្តីជំនាញខេត្តកណ្តាលបានអះអាងថា ប្លង់គោលអភិវឌ្ឍន៍ក្រុង-ស្រុកទាំងអស់នៃខេត្តកណ្តាលត្រូវបានសិក្សាចប់ ខណៈដែលថ្នាក់ជាតិបានសម្រេចទទួលស្គាល់២ ថ្នាក់ខេត្តទទួលស្គាល់១ និងផ្សេងទៀតមិនទាន់បានសម្រេច។
លោកបណ្ឌិតវ៉ាន់ វ៉ាត អ្នកឯកទេសផ្នែកនគរូបនីយកម្ម និងជាអនុប្រធានមន្ទីររៀបចំដែនដី នគរូបនីយកម្មនិងសំណង់ខេត្តកណ្តាលបានមានប្រសាសន៍ឱ្យដឹងនៅថ្ងៃទី ១៦ ខែកញ្ញា ឆ្នាំ២០១៩ នេះថា កន្លងមកនេះប្លង់គោលអភិវឌ្ឍន៍ក្រុងតាខ្មៅ និងស្រុកកោះធំត្រូវបានចុះហត្ថលេខាទទួលស្គាល់កម្រិតថ្នាក់ជាតិ ហើយមួយទៀតទទួលកម្រិតថ្នាក់ខេត្ត គឺស្រុកកៀនស្វាយ ក្រៅពីនោះមិនទាន់បានសម្រេចទទួលស្គាល់នៅឡើយទេ។
-->
លោកបន្តថា “ការចុះបញ្ជីកន្លងមក និងបច្ចុប្បន្ន ត្រូវបានអនុវត្តតាមផែនការរៀបចំហេដ្ឋារចនាសម្ព័ន្ធនេះហើយ ដោយសារតែវាជាតម្រូវការរបស់ក្រសួង ទាំងការចេញបណ្ណ និង ផ្ទេរប្លង់រឹង និងទន់ក៏ត្រូវមានផែនការហេដ្ឋារចនាសម្ព័ន្ធនេះដែរ កុំអោយមានការប្រឈមនាពេលអនាគត”។
លោកបណ្ឌិតវ៉ាន់ វ៉ាតបានបន្ថែមថា ជាមួយគ្នានេះ ខេត្តនឹងអញ្ជើញមន្ត្រីពាក់ព័ន្ធ និងប្រជាពលរដ្ឋ ដើម្បីធ្វើវេទិកា សាធារណៈបន្ថែមទៀត ព្រោះកន្លងមកនេះ មានបញ្ហាជាមួយដីធ្លីរបស់ប្រជាពលរដ្ឋ ដែលពួកគាត់មិនទាន់យល់ច្បាស់ និងមិនគាំទ្រលើការរៀបចំរបស់អជ្ញាធរ។
លោកបានបន្តថា “ក្រោមការដឹកនាំរបស់ឯកឧត្តម ជា សុផារ៉ា ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ និងមានការគាំទ្រពីអភិបាលនៃគណអភិបាលខេត្តកណ្តាល ឯកឧត្តម ម៉ៅ ភារុណ សម្រាប់ខេត្តកណ្តាលត្រូវបានធ្វើការសិក្សាសព្វគ្រប់អស់ហើយ នូវគ្រប់ក្រុង និងស្រុក ហើយយើងបាននឹងកំពុងរៀបចំធ្វើវេទិកា និងការកែសម្រួលសមហរណកម្មជាមួយនឹងការចុះបញ្ជី ព្រោះកាលពីលើកមុនយើងធ្វើដាច់ដោយឡែក តែឥឡូវយើងបញ្ចូលគ្នា ទាំងប្លង់គោល និងការចុះបញ្ជីផងដែរ”។
ខេត្តកណ្តាលមានក្រុង និងស្រុកចំនួន១១នៅទូទាំងខេត្ត ខណៈការរៀបចំប្លង់គោលមានសារៈសំខាន់ណាស់ ដើម្បីរៀបចំការអភិវឌ្ឍនៅមូលដ្ឋានណាមួយ ឲ្យមានភាពសមស្រប នឹងការរីកចម្រើនសេដ្ឋកិច្ចសង្គម ក៏ដូចជាធ្វើឲ្យសហគមន៍មានការអភិវឌ្ឍមានភាពរបៀបរៀបរយ។
លោកបន្តថា “ការរៀបចំប្លង់គោលបានកំណត់តំបន់ណាមួយ នឹងត្រូវប្រើប្រាស់ជាតំបន់លំនៅដ្ឋាន តំបន់ពាណិជ្ជកម្ម តំបន់ឧស្សាហកម្ម និងតំបន់កសិកម្មជាដើម”៕
