ដោយ ៖ រ៉ាណេត
កំពត ៖ ក្រោយពីបានពិនិត្យពីភាពទ្រុឌទ្រោមនៃស្ពានឆ្លងកាត់ដៃព្រែកកំពត ដែលបង្កភាពលំបាកក្នុងការធ្វើចរាចរ និងដឹកជញ្ជូនទំនិញ រាជរដ្ឋាភិបាលបានសម្រេចចំណាយថវិកាកសាងស្ពានមួយខ្សែនេះ រួមជាមួយនឹងផ្លូវថ្នល់ភ្ជាប់ផងដែរ នៅត្រឹមដើមឆ្នាំ២០២០ ឆាប់ៗខាងមុខនេះ។
អតីតស្ពានដែកបាឡេប្រវែង៧២ម៉ែត្រ ស្ថិតនៅក្នុងសង្កាត់ត្រើយកោះ តភ្ជាប់ទៅសង្កាត់អណ្តូងខ្មែរ ក្រុងកំពត ដែលកំពុងតែរងនូវសភាពចាស់ទ្រុធទ្រោមនោះ តាមរយៈក្រសួងសាធារណៈការ និងដឹកជញ្ជូន បានសម្រេចចំណាយថវិកាក្នុងការសាងសង់ឡើងវិញនៅត្រឹមចុងឆ្នាំ២០១៩ ឬដើមឆ្នាំ២០២០ឆាប់ៗខាងមុខនេះ ដើម្បីជួយសម្រួលដល់ការធ្វើដំណើរ និងដឹកជញ្ជូនទំនិញរបស់ប្រជាពលរដ្ឋ។
គម្រោងស្ពាននេះ នឹងត្រូវធ្វើឡើងពីបេតុង ដែលមានទទឹង ១០ ម៉ែត្រ បណ្ដោយ ៧៥ ម៉ែត្រ ជាគម្រោងប្រើប្រាស់ថវិការបស់រាជរដ្ឋាភិបាល ផ្ដល់តាមរយៈក្រសួងសាធារណការ និងដឹកជញ្ជូន។
ដោយឡែកការកសាងផ្លូវបេតុងថ្មីមួយខ្សែឡើងវិញនៅចុងឆ្នាំ២០១៩ នេះ មានទទឹង១០ម៉ែត្រ ប្រវែង ៧៦០ម៉ែត្រ ជាគម្រោងថវិការបស់រដ្ឋបាលខេត្តកំពត ស្ថិតតាមបណ្ដោយស្ពានត្រើយកោះនេះ។
អភិបាលនៃគណអភិបាលខេត្តកំពត លោក ជាវ តាយ បានមានប្រសាសន៍ណែនាំថា “មន្ទីរ អង្គភាពពាក់ព័ន្ធ និងអាជ្ញាធរក្រុង សង្កាត់ ត្រូវរួមសហការគ្នាឱ្យបានល្អ ដោយសិក្សាឱ្យបានច្បាស់លាស់ពីផលប៉ះពាល់ ដើម្បីធ្វើរបាយការណ៍ជាក់លាក់ បញ្ជូនទៅថ្នាក់ជាតិឱ្យបានឆាប់រហ័ស នឹងដើម្បីបានដំណើរការកសាងស្ពានបេតុងនេះឱ្យបានឆាប់រហ័យ ជួយសម្រួលដល់ការធ្វើចរាចរជូនដល់ប្រជាពលរដ្ឋក្នុងតំបន់នេះក៏ដូចជាការដឹកជញ្ជូននូវទំនិញផ្សេងៗឆ្លងកាត់ផងដែរ”។
ជាមួយគ្នានេះ លោកក៏បានគ្រើនរំលឹកអំពីកិច្ចការងារដែលជួយដល់ការលើកកម្ពស់សោភ័ណភាព អានាម័យបរិស្ថានក្នុងក្រុងកំពត ដើម្បីត្រៀមលក្ខណៈក្នុងឱកាស អបអរពិធីបុណ្យសមុទ្រចុងឆ្នាំ២០១៩ នេះ ផងដែរ។ លោកបានមាន ប្រសាសន៍ថា “អាជ្ញាធរក្រុង សង្កាត់ទាំងអស់ ត្រូវបន្តយកចិត្តទុកដាក់ឱ្យបានសស្រាក់សស្រាំបន្ថែមទៀត ដោយត្រូវឈរលើស្មារតីទទួលខុសត្រូវខ្ពស់ក្នុងមូលដ្ឋាន និងក្នុងសង្កាត់នីមួយៗរបស់ខ្លួនផងដែរ”។
ផ្លូវ និងស្ពានចាស់ ដែលនឹងត្រូវកសាងថ្មីឡើងវិញនេះ គឺជាស្ពានប្រភេទដែកបាឡេ និងផ្លូវបេតុង ដោយបានឆ្លងកាត់ក្នុងសង្កាត់អណ្ដូងខ្មែរ និងសង្កាត់ត្រើយកោះក្រុងកំពត។ ផ្លូវ និងស្ពាននេះ មានសារៈសំខាន់ក្នុងការរួមចំណែកដល់ការធ្វើចរាចរនូវរថយន្តធុនធំដឹកទំនិញឆ្លងកាត់ក្នុងតំបន់នេះ។ ប៉ុន្តែ បច្ចុប្បន្នផ្លូវ និងស្ពាននេះមានស្ថានភាពទ្រុឌទ្រោមយ៉ាងខ្លាំង មិនអាចឱ្យរថយន្តដឹកទំនិញប្រភេទធុនធំឆ្លងកាត់បាននោះឡើយ ៕
