ភ្នំពេញ៖ លោកស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន ថ្ងៃទី១១ ខែមករា ឆ្នាំ២០១៨ នាវិមានសន្តិភាព បានចុះហត្ថលេខាលើកិច្ចព្រមព្រៀងសម្បទានសម្រាប់គម្រោងអភិវឌ្ឍន៍ហេដ្ឋារចនាសម្ព័ន្ធផ្លូវល្បឿនលឿន ភ្នំពេញ-ខេត្តព្រះសីហនុ ជាមួយសមភាគីចិន តំណាងដោយលោក Liu Qitao ប្រធានក្រុមហ៊ុនសំណង់គមនាគមន៍ចិន។ ពិធីចុះហត្ថលេខាខាងលើត្រូវបានប្រព្រឹត្តិធ្វើឡើងក្រោមអធិបតីភាពដ៏ខ្ពង់ខ្ពស់របស់ សម្តេចតេជោនាយករដ្ឋមន្ត្រី និង ឯកឧត្តម លី ខឺឈាង នាយករដ្ឋមន្ត្រី នៃសាធារណរដ្ឋប្រជាមានិតចិន។
គម្រោងសាងសង់ផ្លូវល្បឿនលឿននេះ នឹងត្រូវសាងសង់ដោយវិនិយោគិនចិន តាមរូបភាពវិនិយោគ សាងសង់-ធ្វើអាជីវកម្ម-ផ្ទេរ (BOT) ជាផ្លូវ ០៤គន្លង មានប្រវែងសរុប ១៩០,៦៣គីឡូម៉ែត្រ ចេញពីភ្នំពេញ រហូតដល់ខេត្តព្រះសីហនុ ជាផ្លូវថ្មីទាំងស្រុង តួផ្លូវមានទទឹង ២៤ម៉ែត្រ ក្រាលកៅស៊ូ AC មានសួនច្បារខណ្ឌកណ្តាល មានផ្លូវបំបែកប្តូរទិស មានទីតាំងឈប់សម្រាក មានរបងបាំងសងខាងផ្លូវ និងហេដ្ឋារចនាសម្ព័ន្ធសំណង់សេវាគាំទ្រជាច្រើនទៀត។
ក្រោយសាងសង់រួច ផ្លូវល្បឿនលឿននេះនឹងជួយសម្រួលដល់ការធ្វើដំណើរទៅមករាជធានីភ្នំពេញ-ខេត្តព្រះសីហនុ ក្នុងរយៈពេលខ្លី កាត់បន្ថយហានិភ័យគ្រោះថ្នាក់ចរាចរណ៍ កាត់បន្ថយការកកស្ទៈ សម្រួលដល់ការដឹកជញ្ជូនទំនិញ ធ្វើឱ្យសេដ្ឋកិច្ចជាតិមានការរីកចម្រើនកាន់តែប្រសើរ។ លើសពីនេះទៀត ព្រះរាជាណាចក្រកម្ពុជានឹងទទួលបានផលចំណេញដែលមិនអាចកាត់ថ្លៃបាន ពីការអភិវឌ្ឍន៍ច្រករបៀងភ្នំពេញ-ខេត្តព្រះសីហនុ។
លោកបណ្ឌិតម៉ី កល្យាណ ទីប្រឹក្សាជាន់ខ្ពស់ឧត្តមក្រុមប្រឹក្សាសេដ្ឋកិច្ចជាតិបានថ្លែងថា ការវិនិយោគលើហេដ្ឋារចនាសម្ព័ន្ធគឺជារឿងចាំបាច់ដើម្បីជំរុញកំណើនសេដ្ឋកិច្ចកម្ពុជាឲ្យជាន់ទៅមុខបន្តទៀត ព្រោះប្រសិនបើគ្មានការវិនិយោគលើវិស័យហេដ្ឋារចនាសម្ព័ន្ធទេ សេដ្ឋកិច្ចកម្ពុជានឹងមិនសម្រេចបានកំណើនខ្ពស់បន្ថែមទេ ដូច្នេះការវិនិយោគលើហេដ្ឋារចនាសម្ព័ន្ធជារឿងដែលចាំបាច់បំផុតដើម្បីឲ្យកម្ពុជាលោតផ្លោតទៅចំណុចថ្មីមួយ ហើយនេះគឺជាអ្វីដែលរាជរដ្ឋាភិបាលកម្ពុជាត្រូវធ្វើ។
ទីប្រឹក្សាជាន់ខ្ពស់ឧត្តមក្រុមប្រឹក្សាសេដ្ឋកិច្ចជាតិរូបនេះ បានបន្តទៀតថា បច្ចុប្បន្ននេះគឺរាជរដ្ឋាភិបាលបាននិងយកចិត្តទុកដាក់លើការវិនិយោគវិស័យហេដ្ឋារចនាសម្ព័ន្ធ ដែលជាវិស័យស្នូលដ៏សំខាន់ ហើយកំពុងក្លាយជាបញ្ហាប្រឈមមួយក្នុងវិស័យសេដ្ឋកិច្ចកម្ពុជា ដែលរាជរដ្ឋាភិបាលគួរតែពន្លឿនលើការវិនិយោគលើវិស័យហេដ្ឋារចនាសម្ព័ន្ធបន្ថែមទៀត៕