ដោយ ម៉ាតាំង
ភ្នំពេញៈ ផ្នត់គំនិតមានសារៈសំខាន់ណាស់ រហូតដល់សាស្រ្តាចារ្យឬអ្នកជំនាញផ្នែកលើកទឹកចិត្តបានអះអាងថា “ការគិតឬផ្នត់គំនិតបែបណា នឹងទទួលបានលទ្ឋផលនោះ ហើយភាពមានឬក្រីក្រ អាស្រ័យលើផ្នត់គំនិត ជាជាងព្រេងវាសនា។
ប្រសិនបើអោយជ្រើសរើសរវាងផ្លែមៀន១គីឡូក្រាម និងកូនមៀន១ដើម មនុស្សភាគច្រើន នឹងជ្រើសរើសយកផ្លែមៀន១ គីឡូក្រាម ព្រោះគេត្រូវការហូបភ្លាមៗ ហើយប្រសិនបើជ្រើសរើសយកកូនមៀន១ដើមយកទៅដាំ នោះត្រូវការពេលវេលាយូរណាស់ (រហូតដល់៣ឆ្នាំឯណោះ) ទើបបានផ្លែ ម្យ៉ាងត្រូវការការថែទាំស្រោចទឹក ដាក់ជី និងជួបប្រទះនូវហានិភ័យជាច្រើន ដូចជា អោយផលតិច ដាំមិនរស់។ល។ ម្យ៉ាងមនុស្សជាច្រើនយកលេសថាគ្មានដីដាំ។
-->
ផ្ទុយទៅវិញ បើមនុស្សជ្រើសរើសយកកូនមៀន១ដើមយកទៅដាំ និងថែទាំ នោះគេនឹងបានផលរយៈពេលវែងដ៏ច្រើនសន្ធឹកសន្ធាប់ បើប្រៀបធៀបផ្លែមៀន១គីឡូក្រាមដែលហូបអស់ក្នុងរយៈពេល១ថ្ងៃ។ ជាការពិតមានត្រូវការពេលរហូតដល់ទៅ៣ឆ្នាំ ទើបអោយផល ប៉ុន្តែវាមានអាយុជាង ១០ឆ្នាំឯណោះ ពោលគឺមនុស្សអាចប្រមូលផលផ្លែមៀនយ៉ាងតិច៦ឆ្នាំ។ ជាមធ្យម មៀន១ដើមអោយផល២០០គីឡូក្រាមក្នុង១ឆ្នាំ និងលក់បានតម្លៃ៣ដុល្លាក្នុង១គីឡូក្រាម។
ដូច្នេះមៀន១ដើមអោយផលប្រហែល ៣.៦០០ដុល្លា (២០០គីឡូក្រាម x ៣ដុល្លា x ៦ឆ្នាំ)។ មានន័យថាបើដាំមៀន១ដើម នឹងអាចបានផលជាមធ្យម៣៦០០ដុល្លា ក្នុងរយៈពេល១០ឆ្នាំ។ រយៈពេល១០ឆ្នាំមានចំនួន៣.៦៥០ថ្ងៃ។ ដូច្នេះមៀន១ដើមអោយផលជិត១ដុល្លាក្នុង១ថ្ងៃ និងរហូតដល់រយៈពេល១០ឆ្នាំ។ ជំនួសអោយការចំណាយពេលថែទាំ ទទួលយកហានិភ័យ និងក្រោមលេសថាគ្មានដីសំរាប់ដាំដុះ មនុស្សជាច្រើនសុខចិត្តយកមៀន១គីឡូកក្រាម ហើយហូបតែ១ពេលអស់។
ឥរិយាបថបែបនេះហើយ ដែលធ្វើអោយមនុស្សភាគច្រើន មិនមានភាពជោគជ័យផ្នែកហិរញ្ញវត្ថុ។ បើ១ថ្ងៃ មនុស្សម្នាក់ត្រូវការប្រាក់២០ដុល្លាសំរាប់ចាយ នោះដាំមៀន២០ដើមក៏មានប្រាក់គ្រប់គ្រាន់សំរាប់ចាយដែរ។
ភាពជោគជ័យផ្នែកហិរញ្ញវត្ថុមិនលំបាកទេ ប្រសិនបើមនុស្សមានចក្ខុវិស័យវែងឆ្ងាយ មានភាពឧស្សាហ៍ និងហ៊ានទទួលយកហានិភ័យ ដោយលះបង់ផលប្រយោជន៍រយៈពេលខ្លី។
ចូរ កុំរក១ថ្ងៃ គិត១ថ្ងៃ គួរគប្បីរក១ថ្ងៃគិត១០ឆ្នាំទៅមុខ៕
