ដោយ វល័ក្ខ
ភ្នំពេញៈ ស្របពេលដែលក្រុមហ៊ុនធំៗជាច្រើននៅលើពិភពលោក ជាពិសេសបណ្ដាក្រុមហ៊ុនបច្ចេកវិទ្យា បានចំណាយប្រាក់បៀវត្សប្រចាំឆ្នាំយ៉ាងច្រើន សន្ធឹកដល់អគ្គនាយកឬនាយកប្រតិបត្តិ (CEO) រហូតដល់ខ្ទង់លានដុល្លារ ប៉ុន្តែក៏មាន CEO ក្រុមហ៊ុនជាច្រើនសម្រេចចិត្តទទួលយកប្រាក់បៀវត្សតែ១ដុល្លារផងដែរ។
ខាងក្រោមនេះ គឺជាបញ្ចីឈ្មោះថ្នាក់ដឹកនាំជាន់ខ្ពស់ របស់ក្រុមហ៊ុនធំៗជាច្រើនដែលមានប្រាក់បៀវត្សត្រឹមតែ១ដុល្លារអាមេរិកដូចជា៖
លោក Larry Page និង Sergey Brin
ទាំងពីរនាក់នេះ គឺជាសហស្ថាបនិកក្រុមហ៊ុនយក្ស Google ដោយបច្ចុប្បន្នគឺស្ថិតនៅក្នុងតារាងកំពូលមហាសេដ្ឋីលើកលោក ដែលមានលុយច្រើនជាងគេផងដែរ ខណៈដែលប្រាក់បៀវត្សរបស់លោកទាំងពីរ ត្រូវបានក្រុមហ៊ុនប្រកាសឱ្យដឹងថា មានត្រឹមតែ ១ដុល្លារអាមេរិកប៉ុណ្ណោះ ចាប់តាំងពីឆ្នាំ២០០៤។
គិតត្រឹមថ្ងៃនេះ លោក Larry Page មានទ្រព្យសម្បត្តិ៥៦ពាន់លានដុល្លារ។ ចំណែកលោក Sergey Brin វិញមាន ៥៤ពាន់លានដុល្លារ។
លោក Jack Dorsey
ជាស្ថាបនិក និងជានាយកប្រតិបត្តិបណ្ដាញសង្គម Twitter ដោយនៅក្នុងឆ្នាំនេះ លោបានប្រកាសទទួលយកប្រាក់បៀវត្សប្រចាំឆ្នាំ ត្រឹមតែ១.៤០ដុល្លារ អាមេរិកប៉ុណ្ណោះ ខណៈដែលលោកមានទ្រព្យសម្បត្តិជិត៤ពាន់លានដុល្លារអាមេរិក។
លោក Larry Ellison
ជាសហស្ថាបនិក និងជាអគ្គនាយកក្រុមហ៊ុន Oracle ដោយបានប្រកាសកាលពីឆ្នាំ ២០១៨កន្លងទៅនេះថា លោកទទួលយកប្រាក់បៀវត្សប្រចាំឆ្នាំ ត្រឹមតែ១ដុល្លារអាមេរិកប៉ុណ្ណោះ។ បច្ចុប្បន្នលោកមានទ្រព្យសម្បត្តិប្រមាណ ៦៥ពាន់លានដុល្លារអាមេរិក។
លោក Elon Musk
ជាសហស្ថាបនិក និងជានាយកប្រតិបត្តិក្រុមហ៊ុនបច្ចេកវិទ្យា Tesla ដោយនៅក្នុងឆ្នាំនេះ លោកបានប្រកាស និងអះអាងថា លោកមិនទទួលយកប្រាក់បៀវត្សពីក្រុមហ៊ុននេះឡើយ ខណៈដែលបច្ចុប្បន្ន លោកមានទ្រព្យសម្បត្តិជាង១៩ពាន់លានដុល្លារអាមេរិក។
លោក Mark Zuckerberg
ជាសហស្ថាបនិក និងជាយកប្រតិបត្តិបណ្ដាញសង្គមយក្សFacebook បានប្រកាសចូលខ្លួន ក្នុងក្រុមនាយកប្រតិបត្តិដែលទទួលយកប្រាក់បៀវត្ស ត្រឹមតែ១ដុល្លារអាមេរិកកាលពីឆ្នាំ២០១៣ ខណៈដែលពេលនេះ លោកមានទ្រព្យសម្បត្តិជាង៦៧ពាន់លានដុល្លារអាមេរិក។
លោក David Filo
ជាសហស្ថាបនិកក្រុមហ៊ុន Yahoo ដែលបានប្រកាសទទួលប្រាក់បៀវត្ស ប្រចាំឆ្នាំត្រឹមតែ១ដុល្លារ កាលពីឆ្នាំ ២០១៤ ហើយនៅពេលនេះ លោកមានទ្រព្យសម្បត្តិជិត៣ពាន់លានដុល្លារអាមេរិក។
លោក Evan Spiegel
បន្ទាប់ពីបោះផ្សាយ IPO ក្នុងឆ្នាំ២០១៧ សហស្ថានិក និងជានាយកប្រតិបត្តិក្រុមហ៊ុនបណ្ដាសង្គម Snapchat បានសម្រេចចិត្តទទួលយកប្រាក់បៀវត្សរ៍ ត្រឹមតែ១ដុល្លារអាមេរិកប៉ុណ្ណោះ ខណៈដែលនៅពេលនេះ លោកមានទ្រព្យសម្បត្តិជិត ៤ពាន់លានដុល្លារអាមេរិក៕
