ដោយៈ រ៉ាណេត
សឹង្ហបុរីៈ មន្រ្តីជាន់ខ្ពស់ក្រសួងទេសចរណ៍ បានដឹកនាំក្រុមហ៊ុនដែលប្រកបអាជីវកម្មលើវិស័យទេសចរណ៍ជាច្រើន ទៅចូលរួមនៅក្នុងមហាព្រឹត្តិការណ៍ទេសចរណ៍អន្តរជាតិនៅប្រទេសសឹង្ហបុរី ដើម្បីធ្វើការផ្សព្វផ្សាយពីសក្ដានុពល និងបង្កើនកិច្ចទំនាក់ទំនងជាមួយបណ្តា ក្រុមហ៊ុនទេសចរណ៍អន្តរជាតិនានា មកវិនិយោគនៅកម្ពុជា ។
រដ្ឋលេខាធិការក្រសួងទេសចរណ៍ លោកសូ ម៉ារ៉ា បានដឹកនាំប្រតិភូក្រសួងទេសចរណ៍ និងក្រុមហ៊ុនឯកជនក្នុងវិស័យទេសចណ៍ជាច្រើន ដើម្បីចូលរួមនៅក្នុងព្រឹត្តិការណ៍ពិព័រណ៍ទេសចរណ៍អន្តរជាតិ ITB ASIA ២០១៩ លើកទី១២ នៅទីក្រុងសឹង្ហបុរី ប្រទេសសឹង្ហបុរី ដែលប្រព្រឹត្តទៅចាប់ពីថ្ងៃទីកាលពីចុងសប្ដាហ៍កន្លងទៅនេះ។
-->
ព្រឹត្តិការណ៍ទេសចរណ៍ ITB ASIA ២០១៩ គឺជាពិព័រណ៍ទេសចរណ៍ Business to Business អន្តរជាតិលំដាប់ពិភពលោកដ៏ធំមួយនៅតំបន់អាស៊ី ដែលមានអ្នកលក់ជាង ១៣០០ស្តង់ និងអ្នកទិញ អ្នកសារព័ត៌មាន អ្នកជំនួញវិស័យទេសចរណ៍ ភ្ញៀវកិត្តិយសនានាសរុបប្រមាណជាង១,២៥០នាក់ ព្រមទាំងមានអ្នកចូលរួមទស្សនា ចំនួនប្រហែល ១១,០០០នាក់។
លោកសូ ម៉ារ៉ា ដែលជាប្រធានប្រតិភូ បានជួបសំណេះសំណាលជាមួយភ្ញៀវទេសចរអន្តរជាតិ ព្រមទាំងប្រតិបត្តិករទេសចរណ៍នានា ដើម្បីបង្ហាញជូនអំពីសុខសន្តិភាព ការអភិវឌ្ឍលើគ្រប់វិស័យរបស់កម្ពុជា ក្រោមការដឹកនាំប្រកបដោយគតិបណ្ឌិតរបស់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា។
លោកបានមានប្រសាសន៍ថា “កម្ពុជារំពឹងថានឹងទទួលបានទេសចរអន្តរជាតិ និងវិនិយោគិនបរទេសកាន់តែច្រើនថែមទៀត”។
តាមរបាយការណ៍ផ្លូវការរបស់ក្រសួងទេសចរណ៍បានបញ្ជាក់ថា រយៈពេល៨ខែ ដើមឆ្នាំ២០១៩នេះ ប្រទេសកម្ពុជាទាំងមូលទទួល បានភ្ញៀវទេសចរអន្តរជាតិចំនួន ៤,៣៦០,៣៩៧នាក់ កើនឡើង១០.៤% បើធៀបរយៈពេលដូចគ្នាឆ្នាំ២០១៨ ក្នុងនោះ ភ្ញៀវទេសចរ ចូលតាមផ្លូវអាកាសមានចំនួន៣,១០៤,៤៨៩នាក់ ស្មើនឹង៧១.២% នៃចំនួនភ្ញៀវសរុប ដែលមានកើន១៦.៦%(ក្នុងនោះ ចូលតាមអាកាសយានដ្ឋានអន្តរជាតិភ្នំពេញចំនួន១,៤២៧,៤៨៧នាក់ កើន១៤.៧%,។ តាមអាកាសយានដ្ឋានអន្តរជាតិសៀមរាប១,១៨៨,២៥៤នាក់ ថយចុះ៩.១% និងអាកាសយានដ្ឋានអន្តរជាតិព្រះសីហនុចំនួន៤៨៨,៧៤៨នាក់ កើនឡើង៣៤៣.៥%)៕
