ដោយ វុត្ថា
ភ្នំពេញ៖ លោក អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានអះអាងថា នៅបច្ចុប្បន្ននេះថវិកាជាតិ មានក្នុងរតនាគាជាតិ ដែលសល់ពីការចំណាយប្រចាំឆ្នាំកន្លងទៅ គឺមានចំនួន៣ពាន់លានដុល្លារអាមេរិក។
លោក ឧបនាយករដ្ឋមន្រ្ដី អូន ព័ន្ធមុនីរត្ន័ នៅក្នុងកិច្ចប្រជុំរវាងក្រុមប្រឹក្សាពិគ្រោះ និងផ្ដល់យោបល់ជាមួយ ក្រសួងសេដ្ឋកិច្ច និងហិរញ្ញវត្ថុ ស្ដីអំពី ច្បាប់ថវិកាសម្រាប់ការគ្រប់គ្រង ឆ្នាំ២០២០ នៅថ្ងៃទី ២២ ខែតុលានេះ ក៏បានលើកឡើងពីចំណូល ដែលកម្ពុជាទទួលបានពី វិស័យប្រេងកាត នៅក្នុងប្លុក A ដែនសមុទ្រកម្ពុជាថា នៅរយៈពេល១០ឆ្នាំដំបូង នៃដំណើរការបូមប្រេងកម្ពុជារំពឹងថា នឹងទទួលបានចំណូល១ពាន់លានដុល្លារ។
-->
លោកឧបនាយករដ្ឋមន្រ្ដី អូន ព័ន្ធមុនីរត្ន័ ក៏បានទម្លាយពីចំណូលពន្ធដារ ដែលកម្ពុជាទទួលបាន ពីវិស័យកាស៊ីណូ នៅឆ្នាំ២០១៩នេះថា ប្រមូលបានពន្ធជាង៥០លានដុល្លារអាមេរិក ដែលចំណូលនេះនឹងថមថយវិញនៅឆ្នាំ២០២០ ដោយសារតែការបិទល្បែងតាមអនឡាញ។
លោក ង៉ែត ជូ អ្នកវិភាគឯករាជសេដ្ឋកិច្ចកម្ពុជា បានឱ្យដឹងថា សម្រាប់ថវិការប្រមាណ ៣ពាន់លានដុល្លារដែលតម្កល់នៅរតនាគារជាតិ គឺមិនច្រើននោះទេ សម្រាប់ប្រទេសកម្ពុជា ព្រោះវាគ្រាន់តែជាប្រាក់បំរ៉ុងប៉ុណ្ណោះ ។ លោកបន្ថែមថា ទាក់ទងទៅនឹងការទទួលផលពីប្រេងកាត គឺមិនទាន់ជាច្បាស់នៅឡើយទេ ព្រោះរដ្ឋាភិបាលបានប្រកាសជារឿងៗ ថានឹងទទួលបានឆាប់ៗនេះ ។
តែបើប្រទេសកម្ពុជាយើងទទួលបានពីវិស័យប្រេងកាតនេះ នឹងជួយជំរុញសេដ្ឋកិច្ចកម្ពុជាកាន់តែលូតលាស់ទៅមុខថែមទៀត។ លោកក៏បានស្នើដល់ឱ្យមានការគ្រប់គ្រង់ប្រាក់ចំណូលពីវិស័យប្រេងកាតនេះ ឱ្យមានតម្លាភាព ជាពិសេសកត់ត្រា និងធ្វើរបាយការណ៍ក្នុងមួយខែ ឬ មួយឆ្នាំបានប៉ុន្មានពីចំណូល និងចំណាយឱ្យបានច្បាស់ថាតើកម្ពុជាទទួលបានចំណូលប៉ុន្មានឱ្យពិតប្រាកដ ដើម្បីឱ្យមានតម្លាភាពនៃថវិកាជាតិ៕
