ដោយ វុត្ថា
ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជាបានសម្រេចដកថ្លៃសេវាប្រមូលសំរាមពីក្រុមហ៊ុន ស៊ិនទ្រី ក្នុងវិក្កយបត្ររបស់អគ្គិសនីកម្ពុជា ដោយត្រូវប្រើយន្តការផ្សេងជំនួសវិញ។
សម្តេតេជោ សរសេរនៅក្នុងហ្វេសបុកផ្លូវការរបស់សម្តេចកាលពីយប់ថ្ងៃទី ២២ ខែតុលា ឆ្នាំ ២០១៩ នេះ ថា “ដោយក្តាប់បាននូវការលំបាករបស់បងប្អូនប្រជាពលរដ្ឋនៅរាជធានីភ្នំពេញអំពីការដាក់ថ្លៃសេវាប្រមូលសំរាមក្រុមហ៊ុន ស៊ិនទ្រី ក្នុងវិក្កយបត្ររបស់អគ្គិសនីកម្ពុជា ល្ងាចថ្ងៃនេះ ខ្ញុំបានសម្រេចតាមសំណើរបស់អគ្គិសនីកម្ពុជាដោយដកថ្លៃ សេវាប្រមូលសំរាមចេញពីវិក្កយបត្រថ្មីរបស់អគ្គិសនីកម្ពុជាចាប់ពីថ្ងៃទី០១ ខែមករា ឆ្នាំ២០២០ តទៅ”។
-->
សម្តេចបន្តថា “យន្តការយកថ្លៃសេវាប្រមូលសំរាមទៅថ្ងៃមុខនឹងត្រូវប្រើយន្តការផ្សេងជំនួសវិញ ដែលកិច្ចការនេះខ្ញុំបានប្រគល់ភារកិច្ចជូន ឯកឧត្តម អូន ព័ន្ធមុនីរ័ត្ន ឧបនាយករដ្ឋមន្រ្តី រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ ធ្វើការប្រជុំ និងដោះស្រាយ។ សូមបងប្អូនប្រជា ពលរដ្ឋជាទីស្រឡាញ់មេត្តាជ្រាបជាព័ត៌មាន”។
សម្ដេចតេជោ ហ៊ុន សែន នៅក្នុងពិធីប្រគល់សញ្ញាបត្រជូននិស្សិតសាកលវិទ្យាល័យបៀលប្រាយកាលពីថ្ងៃទី ២២ ម្សិលមិញនេះផងដែរបានប្រកាសដកយកសិទ្ធិគ្រប់គ្រងរបស់ក្រុមហ៊ុនស៊ីនទ្រីមកវិញ មកក្រោមការកាន់កាប់របស់រដ្ឋ ប៉ុន្តែមិនឱ្យក្រុមហ៊ុននេះខាតបង់ឡើយ រួចដាក់ដេញថ្លៃដោយឱ្យមានការចូលរួមពីក្រុមហ៊ុនឯកជនផ្សេងៗ ដោយចែកតំបន់គ្នាគ្រប់គ្រង។
សម្តេចតេជោថា “បើមិនបែងចែកតំបន់ទេ គឺអត់ទៅរួចទេ ទុកឱ្យស៊ីនទ្រីបន្ត គឺអត់បានទេ។ ចឹងជម្រើសត្រូវបែងចែកជាតំបន់ ហើយឱ្យមានក្រុមហ៊ុនយ៉ាងតិច៣ ប៉ុន្តែយល់ល្អ៤ នៅក្នុងទីក្រុងភ្នំពេញ។ បើស៊ីនទ្រីមិនកម្រើកដៃ សំរាមពេញក្រុង”។
សម្តេចសង្កត់ធ្ងន់ថា ជាក្រុមហ៊ុនគ្មានសមត្ថភាពប្រមូលនិងគ្រប់គ្រងសំរាមដែលដល់ពេលត្រូវរដ្ឋដកយកមកគ្រប់គ្រងវិញ ហើយបើកឱកាសដល់ក្រុមហ៊ុនផ្សេងៗដែលមានលទ្ធភាព និងសមត្ថភាពយ៉ាងហោចណាស់៤ ដើម្បីចូលរួមដេញថ្លៃវិនិយោគលើការងារប្រមូលនិងគ្រប់គ្រងសំរាមក្នុងរាជធានីភ្នំពេញអោយបានល្អ។
សម្តេចតេជោបានមានប្រសាន៍ថា រាល់ថ្ងៃឮតែពលរដ្ឋនិយាយនិងរអ៊ូតែពីក្រុមហ៊ុនសំរាមស៊ីនទ្រី គឺក្រុមហ៊ុននេះគ្មានសមត្ថភាពធ្វើការតទៅទៀតទេ។ សម្តេចតេជោ ហ៊ុន សែនបានបញ្ជាអោយក្រសួង និងស្ថាប័នពាក់ព័ន្ធចាប់ធ្វើកិច្ចការនេះអោយបានឆាប់បំផុត ដើម្បីចូលរួមអភិវឌ្ឍន៍ទីក្រុងយើងអោយកាន់តែមានសោភ័ណភាពស្រស់ស្អាតល្អ អនាម័យខ្ពស់ និងបរិស្ថានល្អ៕
