ដោយ ដែន ចែងចាំង
ភ្នំពេញ៖ ផ្សារទំនើបលំដាប់អន្តរជាតិ Olympia Plaza ដែលបោះទុនវិនិយោគតម្លៃ៨០លានដុល្លារអាមេរិក ដំណាក់កាលទី១ នឹងបើកដំណើរការនៅចុងត្រីមាសទី២ឆ្នាំនេះ។
ផ្សារទំនើប Olympia Plaza នឹងបើកដំណើរការនៅចុងត្រីមាសទី៣ឆ្នាំនេះ
លោកម៉េង ចំរើនប្រធានគំរោង Olympia City នៃក្រុមហ៊ុន OCIC បានថ្លែងឲ្យដឹងតាមទូរស័ព្ទនាព្រឹកថ្ងៃទី១៩ មករានេះថា ផ្សារទំនើបកំពស់១២ជាន់នេះ នឹងបើកដំណើរការដំណាក់កាលទី១ នៅដំណាច់ត្រីមាសទី៣ឆ្នាំនេះ ដោយសារបច្ចុប្បន្នមានក្រុមហ៊ុនលក់ផលិតផលល្បីៗ បាននិងកំពុងធ្វើការងារ ដើម្បីដំណើរការផ្សារទំនើបដ៏ធំនេះ។ ផ្សារទំនើប Olympia Plaza មានកំពស់១២ជាន់ ប៉ុន្តែដំណាក់កាលទី១មានកំពស់៦ជាន់ និងមានទំហំប្រមាណ១៦០០០ម៉ែត្រការ៉េ។
លោកបន្តថា “ផ្សារទំនើបនេះនឹងមានរោងភាពយន្តនៅជាន់ទី៦ និងកន្លែងលក់រាយចាប់ពីជាន់ទី១ដល់ជាន់ទី៥ ជាផ្សារមួយដែលស្ថិតនៅជាប់ភាគខាងកើតគំរោង Olympia Plaza”។លោកបន្តថា “យើងជាក់ថាផ្សារទំនើបនេះនឹងទទួលបានជោគជ័យ ដោយសារវាស្ថិតនៅតំបន់ពាណិជ្ជកម្មកណ្តាលក្រុង តំបន់មានប្រជាជនរស់នៅច្រើន ពិសេសអ្នករស់នៅក្នុងទីក្រុង Olympia Plaza អាចដើរមកកាន់ផ្សារនេះបានទៅវិញទៅមក”។
ចំណែកដំណាក់កាលទី២ នៃផ្សារទំនើបនេះ មានកំពស់៦ជាន់ ជាកន្លែងលក់ផលិតផលចម្រុះ និងអាហារនិងភេសជ្ជៈផងនោះ អាចនឹងបើកដំណើរការនៅចុងឆ្នាំ២០១៩ខាងមុខនេះ៕
