ដោយៈ រ៉ាណេត
ភ្នំពេញៈ គិតត្រឹមរយៈពេល៩ខែ នៃឆ្នាំ២០១៩កន្លងទៅនេះ តាមរយៈអគ្គនាយក ដ្ឋានគយ និងរដ្ឋាករកម្ពុជា ការប្រមូលពន្ធចូលជាថវិកាជាតិ បានចំនួនជាង ៩,៧ទ្រីលានរៀល ស្មើនឹងប្រមាណ ២៣៩១លានដុល្លារសហរដ្ឋអាមេរិក កើនឡើងជាង៣៥ភាគរយ បើប្រៀបធៀបទៅនឹងរយៈដូចគ្នាកាលពីឆ្នាំ២០១៨។
អគ្គនាយកនៃអគ្គនាយកដ្ឋានគយ និងរដ្ឋាករកម្ពុជា លោក គុណ ញឹម បានប្រកាសនៅក្នុងកិច្ចប្រជុំបូកសរុបការងាររយៈពេល៩ខែ ក្នុងឆ្នាំ២០១៩ កាលពីពេលកន្លងទៅថ្មីៗនេះថា ជាមួយនឹងលទ្ធផលនៃចំណូល ដែលទទួលបានខាងលើនេះ ត្រូវបានប៉ាន់ប្រមាណស្មើនឹងជាង ១០៦ភាគរយ នៃផែនការឆ្នាំដែលបានកំណត់ដោយច្បាប់ស្ដីពី ហិរញ្ញវត្ថុសម្រាប់ការគ្រប់គ្រងឆ្នាំ២០១៩។
-->
លោកបានបញ្ជាក់ថា “បើប្រៀបធៀបរយៈពេលដូចគ្នា កាលណពីឆ្នាំ២០១៨ លទ្ធផលចំណូលតាមប្រភេទពន្ធ និងអាករសំខាន់ៗ ដែលប្រមូលដោយគយមានកំនើនគួរឱ្យកត់សម្គាល់ ក្នុងនោះពន្ធគយ (ពន្ធនាំចូល) មានកំណើនជិត៣៨ភាគរយ អាករពិសេសកើនប្រមាណ៣៩ភាគរយ និងអាករលើតម្លៃបន្ថែម (VAT) កើនជាង៣២ភាគរយ”។
មុខទំនិញជាប្រភពចំណូលសំខាន់ៗ រួមមាន(១) យានយន្ត និងគ្រឿងចក្រ គ្របដណ្តប់ប្រមាណជាង៥២ភាគរយនៃចំណូលសរុប (២) ប្រេងឥន្ធនៈ និងថាមពលប្រមាណជិត ១៧ភាគរយ នៃចំណូលសរុប និង (៣) ទំនិញចម្រុះ និងគ្រឿងសំណង់មានប្រមាណ ២៩.៥ភាគរយនៃចំណូលសរុប។
លោកបានលោកឡើងថា “លទ្ធផលដ៏ល្អប្រសើរនេះ គឺបានមកដោយសារកម្ពុជាមានស្ថិរភាពនយោបាយ ការអនុវត្តកម្មវិធីកែទម្រង់របស់អគ្គនាយកដ្ឋានគយ និងរដ្ឋាករកម្ពុជា ស្របតាមគោលនយោបាយ និងយុទ្ធសាស្ត្រ កែទម្រង់មុតស្រួចរបស់រាជរដ្ឋាភិបាល ការពង្រឹងអភិបាលកិច្ចផ្ទៃក្នុងរបស់អង្គភាពគយ និងការយល់ដឹងកាន់តែទូលាយក្នុងការអនុវត្តកាតព្វកិច្ចពន្ធអាកររបស់ធុរជនពាក់ព័ន្ធ”។
ក្នុងកិច្ចជំរុញឱ្យការប្រមូលពន្ធនិងអាករឱ្យកាន់តែមានប្រសិទ្ធភាព និងទទួលបានលទ្ធផលកាន់តែល្អប្រសើរបន្ថែមទៀត លោក គុណ ញឹម បានណែនាំឱ្យមន្ត្រីគយ និងរដ្ឋាករខិតខំប្រឹងប្រែងឱ្យអស់ពីកម្លាំងកាយចិត្ត ក្នុងការបំពេញភារកិច្ចប្រកបដោយការទទួលខុសត្រូវវិជ្ជាជីវៈ និងបានរំលឹកមតិណែនាំដ៏ខ្ពង់ខ្ពស់របស់ លោកអគ្គបណ្ឌិតសភាចារ្យ ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ ដែលបានលើកឡើងនៅក្នុងកិច្ចប្រជុំបូកសរុបលទ្ធផលការងារគយ និងរដ្ឋាករប្រចាំឆមាសទី១ឆ្នាំ២០១៩កន្លងទៅ។
លើសពីនេះ លោកក៏បានណែនាំបន្ថែមដោយសង្កត់ធ្ងន់ និងត្រូវយកចិត្តទុកដាក់ខ្ពស់ជាប្រចាំ លើការងារជំនាញសំខាន់ៗមួយចំនួន ដូចជា ការពង្រឹងប្រសិទ្ធភាពនៃការងារបច្ចេកទេសគយ អនុវត្តន៍បន្តដូចភ្លៀងរលឹម ការងារបង្ការនិងបង្រ្កាបអំពើរត់គេចនិងបន្លំពន្ធ ការធ្វើសាមញ្ញកម្មនីតិវិធីគយ និងកែលម្អសេវាគយបន្ថែមទៀត ការអនុវត្តនីតិវិធីបំពេញបែបបទគយមុនពេលទំនិញមកដល់ ជំរុញបញ្ចប់យុទ្ធសាស្រ្តនៃការអនុវត្តច្បាប់ និងយុទ្ធសាស្រ្តប្រើប្រាស់បច្ចេកវិទ្យាព័ត៌មាន និងការកសាងផែនការសកម្មភាពអគ្គនាយកដ្ឋានគយ និងរដ្ឋាករកម្ពុជាឆ្នាំ២០២០ជាដើម៕
