ដោយ វុត្ថា
ព្រះសីហនុៈ លោកគួច ចំរើន អភិបាលនៃគណៈអភិបាលខេត្តព្រះសីហនុ បានចុះពិនិត្យ និងបញ្ជាឱ្យបិទការដ្ឋានសាងសង់ផ្សារមួយកន្លែង របស់ជនជាតិចិន ដែលមិនមានច្បាប់អនុញ្ញាតសាងសង់ ស្ថិតនៅភូមិគគីរ ឃុំបិតត្រាំង ស្រុកព្រៃនប់ ខេត្តព្រះសីហនុ។
លោក ឃាង ភារម្យ អ្នកនាំពាក្យសាលាខេត្តព្រះព្រះសីហនុ បានឱ្យដឹងថ្ងៃទី២៤ ខែតុលាឆ្នាំ ២០១៩ នេះថា កាលពីម្សិលមិញនេះ លោកអភិបាលខេត្តបានដឹកនាំមន្ត្រីជំនាញពាក់ព័ន្ធចុះទៅពិនិត្យរកឃើញថា ផ្សារមួយកន្លែងរបស់ជនជាតិចិន ពុំមានច្បាប់អនុញ្ញាតសាងសង់ត្រឹមត្រូវ ហើយឯកឧត្តមអភិបាលខេត្តក៏បានបញ្ជាបិទការដ្ឋាននោះ។
លោកបន្តថា “នៅពេលបង្កើតទៅជាផ្សារ ត្រូវសុំច្បាប់ទៅក្រសួងពាក់ព័ន្ធ ដើម្បីទទួលបានសិទ្ធិសាងសង់ តែបើមិនមានទេនោះ អាជ្ញាធរត្រូវតែបញ្ជាឱ្យបិទតែម្តង”។ លោកបន្ថែមថា “ទីតាំងផ្សារដែលអាជ្ញាធរខេត្តព្រះសីហនុចុះបិទនេះ គឺមិនមែននៅទីក្រុងនោះទេ គឺនៅជាយក្រុង”។
អាជ្ញាធរខេត្តព្រះសីហនុកាពីកន្លងទៅនេះ ក៏បានបិទការដ្ឋានសំណង់ជាច្រើនទីតាំង បន្ទាប់ពីចុះពិនិត្យឃើញថា ការរដ្ឋានសំណង់ទំាងនោះពុំបានអនុវត្តបទដ្ឋានបច្ចេកទេស បទដ្ឋានគតិយុត្តិ ស្តង់ដារសំណង់ ស្តង់ដារសុវត្ថិភាព និងគុណភាពសំណង់ ហើយតម្រូវម្ចាស់សំណង់ទាំងសុំច្បាប់សាងសង់ឱ្យបានត្រឹមត្រូវផងដែរ។
ជាមួយគ្នានេះ លោកឧបនាយករដ្ឋមន្ត្រី ជា សុផារ៉ា កាលពីកន្លងទៅថ្មីៗនេះ បានស្នើអភិបាលនៃគណៈអភិបាលរាជធានី ខេត្ត ចាត់វិធានការចំពោះក្រុមហ៊ុនប្រកបអាជីវកម្មសាងសង់ និងម្ចាស់សំណង់ដែលមិនអនុវត្តតាមកាតព្វកិច្ច និងលក្ខខណ្ឌតម្រូវដោយបទដ្ឋានគតិយុត្ត និងបទដ្ឋានបច្ចេកទេស។
លោកឧបនាយករដ្ឋមន្ត្រី ក៏បានបញ្ជាឱ្យអជ្ញាធរ និងមន្ត្រីពាក់ព័ន្ធទាំងអស់ត្រូវដាក់ពាក្យបណ្តឹងទៅតុលា ឬព្រះរាជ្ញាបន្ទាន់ ដើម្បីដោះស្រាយតាផ្លូវច្បាប់ បន្ទាប់ពីពិនិត្យឃើញការដ្ឋានសំណង់ណាមួយ ដែលសាងសងគ្មានច្បាប់អនុញ្ញាតផងដែរ៕
