ដោយ វុត្ថា
ភ្នំពេញៈ រដ្ឋាភិបាលកម្ពុជាគ្រោងចំណាយទុន រហូតដល់ជាង១៤ពាន់លានដុល្លារអាមេរិក សំរាប់អនុវត្តន៍កម្មវិធីវិនិយោគសាធារណៈក្នុងរយៈពេលបីឆ្នាំ ចាប់ពីឆ្នាំ២០២០ ដល់ឆ្នាំ២០២២ខាងមុខនេះ។
យោងតាមឯកសាររបស់រដ្ឋាភិបាល ដែល Propertyarea.asia ទទួលបានកាលពីចុងសប្តាហ៍មុនបានឲ្យដឹងថា បរិមាណទុនតាមឆ្នាំរបស់កម្មវិធីវិនិយោគសាធារណៈ ៣ឆ្នាំរំកិល ២០២០-២០២២ រួមមាន ឆ្នាំ២០២០ ចំនួន៤,៥៥៦លានដុល្លារអាមេរិក ឆ្នាំ២០២១ចំនួន ៥,១០៤ ដុល្លារអាមេរិក និងឆ្នាំ២០២២ចំនួន៤,៨២៧ លានដុល្លារអាមេរិក។
-->
បរិមាណទុនសរុប ១៤,៤៨៧លានដុល្លារ នៃកម្មវិធីវិនិយោគសាធារណៈ៣ឆ្នាំរំកិល ២០២០-២០២២ រួមបញ្ចូលនូវបរិមាទុន ដែលបានសន្យាផ្តល់ដោយរាជរដ្ឋាភិបាលកម្ពុជា និងដៃគូអភិវឌ្ឍរួចហើយ មានចំនួន៨,៥៩៧លានដុល្លារអាមេរិក (ក្នុងនោះពីរាជរដ្ឋាភិបាលកម្ពុជា ចំនួន ៥២៩,៨ លានដុល្លារអាមេរិក និងពីដៃគូអភិវឌ្ឍចំនួន៨០៦៧,៥ លានដុល្លារអាមេរិក) ដោយត្រូវការទុនបន្ថែមចំនួន៥៨៨៩.៧ លានដុលា្លរអាមេរិក។
តើកម្មវិធីវិនិយោគសាធារណៈត្រូវអនុវត្តន៍យ៉ាងដូចម្តេច? ចម្លើយគឺកម្មវិធីវិនិយោគសាធារណៈ (ក.វ.ស.) ៣ឆ្នាំរំកិល២០២០-២០២២ ជាការបង្ហាញពីទិន្នន័យគម្រោងវិនិយោគ ដែលមានអាទិភាពខ្ពស់របស់ក្រសួងស្ថាប័ន នៃរាជរដ្ឋាភិបាលកម្ពុជា ដែលជាគោលនយោបាយមានចែង នៅក្នុងយុទ្ធសាស្រ្តចតុកោណ ដំណាក់កាលទី៤ និងជាផែនទីចង្អុលផ្លូវសម្រាប់ការអនុវត្តគោលនយោបាយ ដែលមានចែងក្នុងផែនការយុទ្ធសាស្រ្តអភិវឌ្ឍន៍ជាតិ (ផ.យ.អ.ជ.) ២០១៩-២០២៣។
យោងតាមខ្លឹមសាររបស់រដ្ឋាភិបាលបង្ហាញទៀតថា កម្មវិធីវិនិយោគសាធារណៈ៣ឆ្នាំរំកិល២០២០ ២០២២ ត្រូវបានរៀបចំឡើងដោយគិតគូរដល់កត្តាចម្បង និងស្ថានភាពជាក់សែ្តងពីរសំខាន់ៗពោលគឺ ទី១ ការបង្ហាញពីទិន្នន័យនៃគម្រោងវិនិយោគ ដែលមានអាទិភាពខ្ពស់របស់ក្រសួង ស្ថាប័ននៃរាជរដ្ឋាភិបាលកម្ពុជា ដែលជាគោលនយោបាយមានចែងនៅក្នុងយុទ្ធសាស្រ្តចតុកោណ ដំណាក់កាលទី៤ និងជាផែនទីចង្អុលផ្លូវសម្រាប់ការអនុវត្តគោលនយោបាយ ដែលមានចែងក្នុងផែនការយុទ្ធសាស្រ្តអភិវឌ្ឍន៍ជាតិ ២០១៩-២០២៣ និងទី២ តម្រូវការចំណាយសរុប សម្រាប់ការអនុវត្តផែនការយុទ្ធសាស្រ្តអភិវឌ្ឍន៍ជាតិ ២០១៩-២០២៣ (ប្រមាណ ២១៣០០លានដុល្លារអាមេរិក)។
កម្មវិធីវិនិយោគសាធារណៈ៣ឆ្នាំរំកិល ២០២០-២០២២ ត្រូវបានរៀបចំឡើងដោយផ្អែកលើតម្រូវការចំណាយសរុប សម្រាប់ការអនុវត្តផែនការយុទ្ធសាស្រ្តអភិវឌ្ឍន៍ជាតិ២០១៩-២០២៣ ដើម្បីឲ្យបានស្របតាមស្ថានភាពជាក់ស្តែង នៃការប្រែប្រួលថ្លៃទំនិញ និងអតិផរណា ហើយក៏ផ្អែកលើបរិមាណហិរញ្ញប្បទានសហប្រតិបត្តិការ ដែលដៃគូអភិវ ឌ្ឍន៍ធ្លាប់បានសន្យា៕
