ដោយៈ រ៉ាណេត
ភ្នំពេញៈ នៅឆ្នាំក្រោយនេះ បណ្តាធុរជនជាច្រើនមកពីក្រុងហ័រលៀន នៃកោះតែវ៉ាន់ នឹងមកបណ្តាក់ទុនវិនិយោគទៅលើវិស័យឧស្សាហកម្ម សាវាទេសចរណ៍ និងវិស័យសុខាភិបាលនៅកម្ពុជា។
ក្រុមហ៊ុនឧស្សាហកម្មតៃវ៉ាន់កាន់តែច្រើននឹងចូលមកកាន់ទីផ្សារកម្ពុជា
អនុប្រធានសភាពាណិជ្ជកម្មកម្ពុជា លោកឧកញ៉ាលឹម ហេង បានមានប្រសាសន៍ប្រាប់តាមទូរស័ព្ទកាលពីព្រឹកថ្ងៃទី៣០ ខែតុលា ឆ្នាំ២០១៩នេះថា បន្ទាប់ពីបានរៀបចំវេទិការួមគ្នាដែលបង្ហាញពីកាលានុវត្តភាព និងវិស័យដែលមានសក្ដានុពលក្នុងការវិនិយោគនៅកម្ពុជា និងក្រុងហ័រលៀន ដើម្បីផ្លាស់ប្ដូរបទពិសោធន៍ ផ្នែកឧស្សាហកម្មកាលពីដើមសប្ដាហ៍កន្លងទៅនេះ ជាលទ្ធផលគណៈប្រតិភូនៃធុជនមកពីកោះតៃវ៉ាន់ បានបង្ហាញពីគម្រោងនៃការចូលមកវិនិយោគនៅកម្ពុជានៅឆ្នាំបន្ទាប់នេះ។
លោកឧកញ៉ាបន្តថា “តៃវ៉ាន់និងកម្ពុជា ធ្លាប់មានកិច្ចទំនាក់ទំនងពាណិជ្ជកម្មជាមួយគ្នារួចមកហើយ ដែលភាគច្រើនគឺវិនិយោគទៅលើវិស័យរោងចក្រកាត់ដេរ ដែលមានទីតាំងស្ថិតនៅក្នុងតំបន់សេដ្ឋកិច្ចពិសេស និងក្រុងបាវិត ខេត្តស្វាយរៀង”។ លោកឧកញ៉ាបានបន្តទៀតថា “បន្ទាប់ពីបានស្វែងយល់ច្បាស់ពីសក្ដានុពលនៅកម្ពុជា បណ្តាអ្នកវិនិយោគជាច្រើនបានបង្ហាញពីចំណាប់អារម្មណ៍ ជាមួយនឹងគម្រោងចូលមកបណ្តាក់ទុននៅកម្ពុជា ទៅលើវិស័យផ្សេងៗទៀត ដែលក្រៅពីវិស័យឧស្សាហកម្ម នៅមានវិស័យសុខាភិបាល ដោយការបង្កើតជាមន្ទីរពេទ្យលំដាប់ស្ដង់ដានៅកម្ពុជា និងវិស័យសេវាកម្មផ្នែកទេសចរណ៍ផងដែរ”។
ជាមួយនឹងគម្រោងនៃការចូលមកបណ្តាក់ទុនវិនិយោគបន្ថែម ពីសំណាក់ធុរជនមកពីកោះតៃវ៉ាន់ទាំងនេះ នឹងចូលរួមចំណែកក្នុងការជួយពង្រឹង កំណើនសេដ្ឋកិច្ចកម្ពុជាបានមួយកម្រិតទៀត ជាពិសេសផ្តល់ឱកាសការងារដល់ប្រជាពលរដ្ឋខ្មែររាប់ម៉ឺននាក់។
លោកឧកញ៉ាលឹម ហេងបានបញ្ជាក់ទៀតថា តាមរយៈសភាពាណិជ្ជកម្មកម្ពុជា ក្រោមការដឹកនាំដោយអ្នកឧកញ៉ា គិត ម៉េង ទៅស្វែងយល់ពីឱកាសវិនិយោគនៅក្រុងតៃប៉ិ នៃកោះតៃវ៉ាន់ ក៏ដូចជាបង្កើទំនាក់ទំនងលើផ្នែកពាណិជ្ជកម្មផងដែរនោះ ជាលទ្ធផល យើងបានទាក់ទាញ ការវិនិយោគមកកាន់កម្ពុជាបានមួយចំនួន ដែលក្រៅពីវិស័យឧស្សាហកម្ម រោងចក្រកាត់ដេរ ក៏មានការវិនិយោគផ្នែកធនាគារផងដែរ”៕
