ដោយ វុត្ថា
បាត់ដំបងៈ ឯកអគ្គរដ្ឋទូតសិង្ហបុរីបានថ្លែងអះអាងថា វិនិយោគិនសឹង្ហបុរីបាននិងកំពុងស្វែងរកឱកាសធ្វើកិច្ចសហប្រតិបត្តិការវិនិយោគ និងសិក្សាស្វែងយល់ពីសក្តានុពលរបស់ខេត្តបាត់ដំបង លើវិស័យកសិកម្ម ទេសចរណ៍ និងវិស័យសំណង់។
លោក Michael Tan ឯកអគ្គរដ្ឋទូតសិង្ហបុរីប្រចាំនៅកម្ពុជា បានថ្លែងក្នុងជំនួបពិភាក្សាជាមួយលោក ងួន រតនៈ អភិបាលខេត្តបាត់ដំបងកាលពីថ្ងៃទី៣០ ខែតុលាម្សិលមិញនេះថា សិង្ហបុរីមានការចាប់អារម្មណ៍វិនិយោគ លើវិស័យមួយចំនួន រួមមានវិស័យកសិកម្ម ទេសចរណ៍ និងវិស័យសំណង់ជាដើម ខណៈដែលប្រទេសមួយចំនួន ក៏បានចាប់អារម្មណ៍ពីសក្តានុពលរបស់ខេត្តនេះផងដែរ។
លោកបន្តថា “មើលឃើញសក្តានុពលនេះហើយ ទើបលោកបានដឹកនាំគណៈប្រតិភូចុះមកមើលដោយផ្ទាល់ ព្រមទាំងពិនិត្យមើលវិស័យផ្សេងៗទៀត ដើម្បីឈានទៅស្វែងរកកិច្ចសហការវិនិយោគក្នុងខេត្តភូមិភាគពាយ័ព្យនេះ”។
ឯកអគ្គរដ្ឋទូតរូបនេះបន្ថែមថា នៅក្នុងខែធ្នូ ឆ្នាំ២០១៩ខាងមុខនេះ នឹងមានសហការីមកពីប្រទេសសិង្ហបុរី ដែលមានជំនាញផ្នែកនគរូបនីយកម្ម មកកាន់ខេត្តបាត់ដំបង ដែលនេះជាឱកាសល្អមួយសម្រាប់អាជ្ញាធរខេត្ត អាចជួបពិភាក្សាលើការងារនគរូបនីយកម្ម ព្រមទាំងអាចលើកយកបញ្ហាទីក្រុងវៃឆ្លាត អេកូទេសចណ៍ និងវិស័យមួយចំនួនទៀតមកពិភាក្សាក្នុងជំនួបនោះ។
អភិបាលខេត្តបាត់ដំបងលោកងួន រតនៈបានស្វាគមន៍យ៉ាងកក់ក្ដៅ ចំពោះគណៈប្រតិភូសិង្ហបុរី ដែលនឹងមកកាន់ខេត្តបាត់ដំបង នាចុងឆ្នាំ២០១៩នេះ ហើយលោកនឹងជួបពិភាក្សាជាមួយពួកគេ លើបញ្ហាមួយចំនួនរួមមាន បញ្ហាទឹកស្អាត ភាពកក់ខ្វក់នៅក្នុងទីក្រុង និងបញ្ហាផ្សេងៗទៀត និងវិស័យមានសក្ដានុពលមួយចំនួន ដើម្បីឲ្យអ្នកទាំងនោះមានការចាប់អារម្មណ៍ ហើយគៀរគរអ្នកវិនិយោគទុនសិង្ហបុរី មកវិនិយោគនៅខេត្តបាត់ដំបង។
លោកអភិបាលរូបនេះ ក៏បានស្នើឱ្យឯកអគ្គរាជទូតសិង្ហបុរីប្រចាំនៅកម្ពុជា ជួយជំរុញដល់អ្នកវិនិយោគទុនសិង្ហបុរី ឲ្យមកវិនិយោគលើវិស័យ ដែលមានសក្ដានុពលមួយចំនួននៅខេត្តបាត់ដំបង ខណៈពួកគេកំពុងមានការចាប់អារម្មណ៍វិនិយោគ នៅតាមបណ្តាខេត្តមួយចំនួនក្នុងប្រទេសកម្ពុជាផងដែរ។
ខេត្តបាត់ដំបងបច្ចុប្បន្ននេះ ពុំទាន់មានការវិនិយោគលើវិស័យនានា ពីសំណាក់វិនិយោគទុនសិង្ហបុរីនោះទេ ខណៈដែលខេត្តមួយនេះ កំពុងមានការរីកចម្រើនលើវិស័យ កសិកម្ម ទេសចរណ៍ និងវិស័យសំណង់ និងវិស័យផ្សេងៗជាច្រើនទៀត៕
