ដោយ វុត្ថា
ភ្នំពេញៈ អគ្គនាយកដ្ឋានគយ និងរដ្ឋាករកម្ពុជា សហការជាមួយធនាគារអភិវឌ្ឍន៍អាស៊ី (ADB) អង្គការគយពិភពលោក (WCO) និងទីភ្នាក់ងារសហប្រតិបត្តិការអន្តរជាតិ នៃប្រទេសជប៉ុន (JICA) បានអនុវត្តគម្រោងសិក្សារយៈពេលបញ្ចេញ ទំនិញពីគយឆ្នាំ២០១៣ ដែលជាសមាសធាតុមួយនៃទស្សនទាន ការអភិវឌ្ឍន៍លំហូរទំនិញនៅអាស៊ី Asia Cargo Highway-ACH ដែលបានដាក់ចេញនាកិច្ចប្រជុំ ថ្នាក់អគ្គនាយកគយអាស៊ាន-ជប៉ុន នាថ្ងៃទី២៩ ខែមេសា ឆ្នាំ២០១១។
គម្រោងសិក្សារយៈពេលបញ្ចេញទំនិញពីគយនេះ គ្របដណ្តប់តែទៅលើរយៈពេលនៃបែបបទបញ្ចេញទំនិញ ពីគយចាប់តាំងពីពេលដែលទំនិញ មកដល់រហូតដល់ពេលទំនិញត្រូវបានយកចេញប៉ុណ្ណោះ ពោលគឺពុំបានគិតពីពេលវេលា សម្រាប់ការទទួលបានការសម្រេចជាមុន ក្នុងរូបភាពជាលិខិតអនុញ្ញាតិជាដើមនោះទេ។
យោងតាមឯកសាររបស់អគ្គនាយកដ្ឋានគយ និងរដ្ឋករកម្ពុជាបានឱ្យដឹងថា គិតជាមធ្យម រយៈពេលបញ្ចេញទំនិញពីគយ អាចសង្ខេបបានដូចខាងក្រោម 1. ពីពេលទំនិញមកដល់រហូតដល់ពេលយកទំនិញចេញ ពីគយ៖ 2ថ្ងៃ 14ម៉ោង 39នាទី។ 2. ពីពេលចុះបញ្ជិការ រហូតដល់ពេលយកទំនិញចេញពីគយ៖ 5ម៉ោង 37នាទី និង3 ពីពេលចុះបញ្ជិការរហូតដល់ពេលទទួលបានប័ណ្ណបញ្ចេញ ទំនិញពីគយ 1ម៉ោង 57នាទី៕
