ដោយ វុត្ថា
ភ្នំពេញៈ រដ្ឋាភិបាលជប៉ុនបានចុះហត្ថលេខាលើ កិច្ចព្រមព្រៀងហិរញ្ញប្បទានឥតសំណង ដែលមានទឹកប្រាក់ចំនួន២ ៧៧៧ លានយ៉េន (ប្រមាណជា ២៧លានដុល្លារអាមេរិក)សម្រាប់គម្រោងអភិវឌ្ឍន៍ប្រព័ន្ធបង្ហូរទឹកកខ្វក់ក្នុងរាជធានីភ្នំពេញ (The Project for Sewerage System Development in Phnom Penh) ដែលជាផ្នែកមួយនៃការលើកកំពស់គុណភាពជីវិតរបស់ប្រជាជន។
យោងតាមសេក្តីប្រកាសរបស់ក្រសួងសេដ្ឋកិច្ច និងហិរញ្ញវត្ថុ និង JICA ដែលបានផ្សព្វផ្សាយនៅថ្ងៃទី១ ខែវិច្ឆិកា ឆ្នាំ ២០១៩ នេះបានឱ្យដឹងថា គម្រោងអភិវឌ្ឍន៍ប្រព័ន្ធបង្ហូទឹកកខ្វក់ក្នុងរាជធានីភ្នំពេញ មានទិសដៅចម្រោះទឹកកខ្វក់មុនពេលបង្ហូរចូលទន្លេ តាម រយៈការសាងសង់រោងចក្រប្រប្រព្រឹត្តិកម្មទឹកកខ្វក់មួយ កន្លែងនៅបឹងជើងឯកក្នុងសង្កាត់ជើងឯក ខណ្ឌដង្កោ រាជធានីភ្នំពេញ និងបំពង់បង្ហូរទឹកកខ្វក់ដែលមានប្រវែង ២០០០ម៉ែត្រ មានមុខកាត់ ៥០០ម.ម។
-->
សេចក្តីប្រកាសព័ត៌មានរួមដដែលបន្តថា រោងចក្រប្រព្រឹត្តកម្មនេះ មានសមត្ថភាពចម្រោះទឹកកខ្វក់បាន៥០០០ម៉ែត្រគីបក្នុងមួយថ្ងៃ។ ការសាងសង់នឹងត្រូវចាប់ផ្តើមនៅចុងឆ្នាំ២០២០ ដែលត្រូវចំណាយពេលប្រមាណ៣២ខែ។ បន្ថែមពីលើការសាងសង់ គម្រោងក៏នឹងផ្តល់ជំនួយបច្ចេកទេស សម្រាប់ពង្រឹងសមត្ថភាពមន្ត្រី ក្នុងការគ្រប់គ្រងរោងចក្រដំណើរការ និងហិរញ្ញវត្ថុផងដែរ។
គម្រោងអភិវឌ្ឍន៍ប្រព័ន្ធទឹកកខ្វក់ក្នុងរាជធានីភ្នំពេញនេះ ជាគម្រោងបំពេញបន្ថែមឱ្យគម្រោងការពារទឹកជំនន់ និងកែលម្អប្រព័ន្ធប្រឡាយលូក្នុងរាជធានីភ្នំពេញ ជំហ៊ានទី ១ ទី ២ ទី៣ និងទី៤ ដែលត្រូវវបានសាងសង់ ដោយហិរញ្ញប្បទានឥតសំណងរបស់ប្រទេសជប៉ុនផងដែរ។
គម្រោងនេះ នឹងរួមចំណែកដល់កិច្ចខិតខំ ប្រឹងប្រែងរបស់សាលារាជធានីភ្នំពេញ ក៏ដូចជា រាជរដ្ឋាភិបាលកម្ពុជា ដែលបានឆ្លើយតបយ៉ាងជាក់ច្បាស់ ទៅនឹងសេចក្តីត្រូវការជាអាទិភាព ក្នុងការអភិវឌ្ឍន៍ប្រព័ន្ធចម្រោះទឹកកខ្វក់ ដែលនាំនូវការការពារ និងលើកកម្ពស់គុណភាពទឹក និងអនាម័យបរិស្ថាន ស្របទៅនឹងមុំទី១ នៃចតុកោណទី៤ ដូចមានចែកក្នុងឯកសារយុទ្ធសាស្ត្រចតុកោណ ដំណាក់កាលទី៤ របស់រាជរដ្ឋាភិបាលកម្ពុជា។
កិច្ចព្រមព្រៀងហិរញ្ញប្បទានឥតសំណង ដែលនឹងត្រូវចុះហត្ថលេខានេះ គឺជាឯកសារគតិយុត្តិមួយទៀត បន្ទាប់ពីលិខិតប្តូរសសារ ដែលទើបត្រូវបានចុះហត្ថលេខាកាលពីថ្ងៃទី ៣ ខែតុលា ឆ្នាំ ២០១៩ កន្លងមកនេះ រវាងក្រសួងការបរទេស និងសហប្រតិបត្តិការអន្តរជាតិ និងស្ថានទូតជប៉ុនប្រចាំនៅកម្ពុជា ដែលអាចនាំឱ្យឈានតៅដល់ការអនុវត្តនីតិវិធីបន្តបន្ទាប់ទៀតសម្រាប់ការអនុវត្តគម្រោងជាក់ស្តែង។
ហិរញ្ញប្បទានកិច្ចសហប្រតិបត្តិការអភិវឌ្ឍន៍ផ្លូវការ (Japan ODA) ពីប្រទេសជប៉ុន និងប្រជាជនជប៉ុន ឬនិយាយឱ្យចំថា អ្នកបង់ពន្ធជប៉ុនចាប់ពីដំណើរការ កសាងសន្តិភាព និងការបង្រួបបង្រួមជាតិនៅកម្ពុជា រហូតមកដល់បច្ចុប្បន្នមានចំនួនសរុបប្រមាណជាង ៥០០០លានដុល្លារអាមេរិក ក្នុងនោះមានហិរញ្ញប្បទាន ឥតសំណងប្រមាណ៣៥០០ លានដុល្លារអាមេរិក៕
