ដោយ Donald Lee
ភ្នំពេញៈ ប្រធានាធិបតីអាមេរិក Donald Trump បានអញ្ជើញមេដឹកនាំទាំងអស់នៃបណ្តាប្រទេសសមាជិកអាស៊ាន ចូលរួមកិច្ចប្រជុំពិសេសមួយនៅសេតវិមាន (White House) នៅឆ្នាំ ២០២០។
លោក Trump បានសរសេរលិខិតទៅកាន់មេដឹកនាំអាស៊ាន នៅឯកិច្ចប្រជុំកំពូលនៃសមាគមប្រជាជាតិអាស៊ីអាគ្នេយ៍ “ខ្ញុំក៏ចង់យកឱកាសនេះ ដើម្បីផ្តល់ការអញ្ជើញដល់មេដឹកនាំអាស៊ានឱ្យចូលរួមជាមួយខ្ញុំនៅអាមេរិក សម្រាប់កិច្ចប្រជុំកំពូលពិសេសមួយនៅពេលសមរម្យមួយក្នុងត្រីមាសទី១ ឆ្នាំ២០២០”។
-->
លិខិតនោះ ត្រូវបានអានដោយលោក Robert O’Brien ទីប្រឹក្សាសន្តិសុខជាតិនៃសេតវិមានកាលពីថ្ងៃចន្ទ នៅទីក្រុងបាងកក។
ប្រធានាធិបតីរុស្ស៊ីវ្លាឌីមៀពូទីន បានបើកកិច្ចប្រជុំកំពូលនេះកាលពីឆ្នាំមុន ហើយរំពឹងថាប្រធានាធិបតីអាមេរិក Donald Trump នឹងចូលរួមនៅឆ្នាំនេះ។ ផ្ទុយទៅវិញ រដ្ឋាភិបាលអាមេរិក បែជាបញ្ជូនលោក O’Brien និងរដ្ឋមន្ត្រីពាណិជ្ជកម្មលោក Wilbur Ross ។
លោក Trump បានត្អូញត្អែរជាសាធារណៈអំពីឱនភាពពាណិជ្ជកម្ម រវាងអាមេរិក និងបណ្តាប្រទេសនៅអាស៊ី។
សង្គ្រាមពាណិជ្ជកម្មរវាងអាមេរិក និងចិនត្រូវបានបញ្ឈប់ជាបណ្តោះអាសន្ន ខណៈអ្នកចរចាពាណិជ្ជកម្ម ព្យាយាមឈានដល់កិច្ចព្រមព្រៀងដំណាក់កាលទី១ នៃកិច្ចព្រមព្រៀងនេះនៅចុងឆ្នាំនេះ។
លើសពីនេះទៀត លោក Trump បានព្យូរការអនុគ្រោះពាណិជ្ជកម្មចំនួន១,៣ ពាន់លានដុល្លារលើទំនិញថៃ បន្ទាប់ពីរដ្ឋាភិបាលថៃ បានហាមឃាត់សារធាតុគីមីគ្រោះថ្នាក់ដែលជារឿយៗត្រូវបានរកឃើញ នៅក្នុងផលិតផលកសិកម្មអាមេរិកកាលពីសប្តាហ៍មុន។
ការហាមឃាត់របស់រដ្ឋាភិបាលថៃ អាចធ្វើឱ្យប៉ះពាល់ដល់ការនាំចេញសណ្តែក និងស្រូវសាលីអាមេរិកដែលមានតម្លៃ៧៧៣លានដុល្លារ៕
