ដោយ Donald Lee
ភ្នំពេញៈ អ្នកចរចាពាណិជ្ជកម្មអាមេរិក និងចិនកំពុងខិតខំយ៉ាងខ្លាំង ដើម្បីដកពន្ធគយទាំងសងខាង ដើម្បីត្រួសត្រាយផ្លូវសម្រាប់ កិច្ចព្រមព្រៀងពាណិជ្ជកម្មដំណាក់កាលទីមួយ ដែលបានចុះហត្ថលេខានៅចុងខែ វិច្ឆិកា។
មន្ត្រីពាណិជ្ជកម្មជាន់ខ្ពស់អាមេរិកបានប្រាប់កាសែត Reuters ថា ប្រធានាធិបតីអាមេរិក លោក Donald Trump កំពុងសំឡឹងមើលការលុបចោលពន្ធគយ ដែលនឹងចូលជាធរមាននៅថ្ងៃទី១៥ ខែ ធ្នូ លើទំនិញចិនដែលមានតម្លៃ១៥៦ពាន់លានដុល្លារ ដែលរួមមានទូរស័ព្ទចល័ត និងកុំព្យូទ័រយួរដៃ។
-->
ជាថ្នូរវិញ ចិននឹងចរចានាំចូលទំនិញកសិកម្មអាមេរិក ជាពិសេសសណ្តែកសៀងដែលលោក Trump បាននិយាយថា អាចមានតម្លៃរហូតដល់ ៥០ពាន់លានដុល្លារ។
លោក Trump បាននិយាយនៅលើប្រព័ន្ធផ្សព្វផ្សាយសង្គម Twitter ថា ៦០ភាគរយ នៃកិច្ចព្រមព្រៀងពាណិជ្ជកម្មចុងក្រោយរវាងអាមេរិក និងចិនបានបញ្ចប់ ហើយត្រៀមខ្លួនជាស្រេច ដើម្បីធ្វើការចុះកិច្ចព្រមព្រៀងជាមួយគ្នា។
របាយការណ៍នេះធ្វើឡើង ខណៈមេដឹកនាំចិនលោកស៊ី ជិនពីងបានធ្វើសុន្ទរកថាមួយដោយទទូចដល់មេដឹកនាំពិភពលោក ឱ្យធ្វើការជាមួយគ្នា ដើម្បីធ្វើឱ្យសេដ្ឋកិច្ចពិភពលោក ដែលផ្តោតលើពាណិជ្ជកម្មសេរីរីកចម្រើន នៅឯពិព័រណ៍នាំចូលអន្តរជាតិចិននៅទីក្រុងសៀងហៃកាលពីថ្ងៃអង្គារ។
នៅក្នុងសុន្ទរកថាមួយកាលពីថ្ងៃ អង្គារ លោកស៊ី បានមានប្រសាសន៍ថា “នៅពេលតម្លៃពិភពលោក និងបណ្តាញផ្គត់ផ្គង់បន្តអភិវឌ្ឍន៍ បណ្តាប្រទេសនានាមានទំនាក់ទំនងគ្នាទៅវិញទៅមក ហើយការធ្វើសមាហរណកម្មសេដ្ឋកិច្ចរបស់ពួកគេ គឺជាកិច្ចការដែលត្រូវធ្វើ”។
លោកបានបន្ថែមថា “បញ្ហាទាំងអស់អាចត្រូវបានដោះស្រាយ ក្នុងស្មារតីសមភាព ការយោគយល់គ្នា និងការរួមគ្នា។ យើងត្រូវជំរុញការអភិវឌ្ឍ តាមរយៈការបើកចំហរ និងធ្វើឱ្យស៊ីជម្រៅការផ្លាស់ប្តូរ និងកិច្ចសហប្រតិបត្តិការក្នុងចំណោមពួកយើង”។ លោកបន្តថា “យើងត្រូវ “រួមដៃគ្នា” ជំនួសឱ្យការបណ្តោយឱ្យដៃរបស់គ្នាទៅវិញទៅមក។ យើងត្រូវ “បំផ្លាញជញ្ជាំង” មិនមែន ដាក់ជញ្ជាំង”។
មូលនិធិរូបិយវត្ថុអន្តរជាតិ (IMF) បានចេញផ្សាយការព្យាករណ៍កំណើនសេដ្ឋកិច្ចពិភពលោកកាលពីខែមុន ដែលបានបង្កើនកំណើនផលិតផល ក្នុងស្រុកសរុបរបស់ពិភពលោកនៅឆ្នាំ២០២០ ដល់៣,៤ ភាគរយ បន្ទាប់ពីការធ្លាក់ចុះនៅឆ្នាំនេះ ដោយសារសង្គ្រាមពាណិជ្ជកម្មពិភពលោកកំពុងបន្ត។
របាយការណ៍ទស្សនវិស័យ សេដ្ឋកិច្ចពិភពលោករបស់ IMF បានបញ្ជាក់ថា សង្គ្រាមពាណិជ្ជកម្មរវាងអាមេរិក និងចិន បានធ្វើឱ្យកំណើនសេដ្ឋកិច្ចពិភពលោកធ្លាក់ចុះនៅឆ្នាំនេះ ដោយសារតែភាពមិនច្បាស់លាស់ ដែលវាបានបង្កើតឡើងនៅក្នុងទីផ្សារពិភពលោក៕
