ដោយ ៖ វុត្ថា
ភ្នំពេញ ៖ សម្តេច តេជោ ហ៊ុន សែន នាយករដ្ឋមន្ត្រីនៃកម្ពុជា បានបញ្ជាក់ថា ទីក្រុងភ្នំពេញនឹងមិនបញ្ហាអ្វីកើតឡើងនោះទេ និងបានអំពាវនាវឱ្យពលរដ្ឋទាំងអស់មកលេងបុណ្យអំទូកខាងមុខនេះ ខណៈប្រជាពលរដ្ឋមួយចំនួនបានសម្តែងការព្រួយបារម្ភខ្លាំងជុំវិញការមកដល់របស់លោក សម រង្សី ខាងមុខនេះ។
សម្តេចម្តេច តេជោ ហ៊ុន សែន មានប្រសាសន៍នៅក្នុងពិធីប្រកាសផ្សព្វផ្សាយឲ្យប្រើប្រាស់ជាផ្លូវការនូវផែនការយុទ្ធសាស្ត្រអភិវឌ្ឍន៍ជាតិឆ្នាំ ២០១៩-២០២៣នាថ្ងៃទី ៧ ខែវិច្ឆិកា ឆ្នាំ ២០១៩ នេះ បញ្ជាក់ថា មិនមានការវាយតប់គ្នាក្នុងរាជធានីភ្នំពេញនោះទេ បើវាយគឺវាយតែមុខសញ្ញាធំ៩នាក់ប៉ុណ្ណោះ ខណៈពេលនេះមេក្បត់ជាតិ សម រង្ស៉ី នៅទីក្រុងប៉ារីសនៅឡើយ។
សម្តេចតេជោបញ្ជាក់ថា ក្រុមមេក្បត់ជាតិ នឹងមិនមកកម្ពុជានោះទេ។ ជាមួយគ្នានេះ សម្តេច តេជោ ហ៊ុន សែន ក៏បានអំពាវនាវដល់អ្នកចូលរួមជាមួយសកម្មភាពក្បត់ជាតិ ឬគាំទ្រលោក សម រង្សី ក្នុងការផ្តូលរំលំរដ្ឋាភិបាលស្របច្បាប់នោះ ត្រូវតែមានទោស ដូច្នេះត្រូវតែប្រញាប់ចេញមកសារភាព ដើម្បីកុំអោយរដ្ឋាភិបាលមានវិធានការណាមួយទាន់ពេលវេលា។
ជាមួយគ្នានេះ សម្តេច តេជោ ក៏បានស្នើដល់ មិត្តភក្តិបរទេសត្រូវយល់ចំពោះកម្ពុជា ពលរដ្ឋកម្ពុជាវេទនាឆ្អែតឆ្អន់ ព្រោះតែពាក្យប្រជាធិបតេយ្យ និងសិទ្ធិមនុស្ស ហើយទីបំផុតធ្វើការចលនាផ្តួលរលំ។សម្តេចតេជោថា បើមិនមានសុខសន្តិភាព មិនអាចនិយាយដល់ប្រជាធិបតេយ្យ និងការគោរពសិទ្ធិមនុស្សនោះឡើយ។
សម្តេច តេជោ ថា សម្តេចបានយកជីវិតធ្វើដើមទុន ដើម្បីរកសុខសន្តិភាព និងការរស់រានជាថ្មីសម្រាប់ជាតិ និងប្រជាជនកម្ពុជា ទោះបីក្នុងតម្លៃណាក៏ត្រូវតែការពារឱ្យបាននូវសុខសន្តិភាព និងការធានាឱ្យបាននូវការរស់រានរបស់ប្រជាពលរដ្ឋកម្ពុជា៕
