ដោយ វុត្ថា
ភ្នំពេញៈ ដើម្បីសម្រេចឈានដល់កុងសុងស៊ីសចម្បង នៃថ្នាក់ដឹកនាំកំពូលរវាងចិន និងកម្ពុជា ភាគីទាំងពីរនឹងរៀបចំកិច្ចពិភាក្សាផ្លូវការលើកដំបូងស្តីអំ ពីការសិក្សាស្រាវជ្រាវលទ្ធភាព កិច្ចព្រមព្រៀងពាណិជ្ជកម្មសេរីរវាងភាគីចិន និងកម្ពុជា ក្នុងរដ្ឋធានីប៉េកាំង ថ្ងៃទី៣ ខែធ្នូ នាពេលខាងមុខនេះ។
យោងតាមការផ្សព្វផ្សាយរបស់ស្ថានទូតចិនប្រចាំកម្ពុជា នៅថ្ងៃទី ១៤ ខែវិច្ឆិកា ឆ្នាំ ២០១៩ នេះបានឱ្យដឹងថា នេះជាការរៀបចំដ៏ពិសេសមួយនៃភាគីចិន ដោយផ្អែកលើទំនាក់ទំនងមិត្តភាពរវាងចិន និងកម្ពុជា។ ពេលមុននេះ ថ្នាក់ប្រតិបត្តិការងារនៃស្ថាប័នពាណិជ្ជកម្មរវាងភាគីចិន និងកម្ពុជាបានបង្កើតយន្តការទំនាក់ទំនងរួចជាស្រេច ដើម្បីជម្រុញកិច្ចការ ដែលពាក់ព័ន្ធឲ្យមានទំនាក់ទំនងយ៉ាងជិតស្និទ្ធល្អ។
ចំពោះកិច្ចសហប្រហតិបត្តិការទ្វេភាគី កម្ពុជា-ចិន លើវិស័យសេដ្ឋកិច្ច ពាណិជ្ជកម្ម វិនិយោគ ទេសចរណ៍វប្បធម៌ ការទូត និងរវាងប្រជាជន និងប្រជាជន មានការរីកចម្រើនជាលំដាប់ ដោយឈរលើស្មារតី គោរពជឿទុកចិត្ត គ្នាទៅវិញទៅមកស្របតាមយុទ្ធសាស្ត្រឈ្នះ-ឈ្នះ។
យុទ្ធសាស្រ្តខ្សែក្រវ៉ាត់១ ផ្លូវ១ របស់សាធារណរដ្ឋប្រជាមានិតចិន គឺជាការពង្រឹងកិច្ចសហប្រតិបត្តិការអន្តរជាតិ ដ៏មានមានសារៈសំខាន់ ក្នុងការជំរុញកំណើនសេដ្ឋកិច្ច និងពាណិជ្ជកម្មប្រទេសចិន ហើយថែមទាំងជាការការផ្សារភ្ជាប់ទំនាក់ទំនងល្អ រវាងប្រជាជនចិន និងប្រជាជននៃបណ្តាប្រទេសក្នុងតំបន់ និងលើសកលលោក ដែលនឹងបង្កើតបានជាកម្លាំងចលករថ្មី ដើម្បីរក្សាតុល្យភាពសេដ្ឋកិច្ចពិភពលោកថែមទៀត។
នៅក្រោមក្របខណ្ឌនៃយុទ្ធសាស្ត្រនេះ បានជួយពង្រឹងទំនាក់ទំនង រវាងកម្ពុជា និងចិន ឲ្យឈានដល់កម្រិតដៃគូយុទ្ធសាស្ត្រគ្រប់ជ្រុងជ្រោយ។ ដោយនៅក្នុងនោះការដោះដូរពាណិជ្ជកម្មទ្វេភាគីនៅក្នុងឆ្នាំ២០១៨ សម្រេចបានទឹកប្រាក់
៦,៤៥៧លានដុល្លារអាមេរិក គឺបានកើនឡើង១៥%បើធៀបនឹងឆ្នាំ២០១៧។
លើសពីនេះ កម្ពុជាបានបង្កើតមជ្ឈមណ្ឌលពាណិជ្ជកម្មកម្ពុជា នៅតាមទីក្រុងធំៗរបស់ប្រទេសចិន និងបានចុះហត្ថលេខាលើលិខិតប្តូរសារជាមួយភាគីចិន ដើម្បីទទួលបានការលើកលែងពន្ធ៩៧% នៃបន្ទាត់ពន្ធគយសរុប។
យោងតាមរបាយការណ៍របស់ក្រុមប្រឹក្សាអភិវឌ្ឍន៍កម្ពុជា (CDC) បានឱ្យដឹងថា ប្រទេសចិនបានឈរនៅលំដាប់លេខ១ ដែលបានបណ្តាក់ទុនវិនិយោគច្រើនជាងគេនៅកម្ពុជា ចំនួន៧.៩ពាន់លានដុល្លារ ស្មើនឹង៣៥ភាគរយ នៃទុនវិនិយោគសរុបគិតចាប់ពីឆ្នាំ២០១៦ ដល់ខែសីហា ឆ្នាំ២០១៩។
បើពិនិត្យទៅលើសកម្មភាពវិនិយោគបរទេស តាមប្រទេសនីមួយៗចាប់ពីឆ្នាំ២០១៦ ដល់ខែសីហា ឆ្នាំ២០១៩ សកម្មភាពវិនិយោគរបស់អ្នកវិនិយោគផ្ទាល់ពីបរទេស មានការកើនឡើងគួរជាទីការកត់សម្គាល់ ដោយបានចូលរួមចំណែកប្រមាណ ៥៦% នៃទុនវិនិយោគសរុប ក្នុងនោះប្រទេសចិនឈរនៅលំដាប់ទី១ ដែលមានទុនវិនិយោគប្រមាណ៧.៩ប៊ីលានដុល្លារអាមេរិក ស្មើនឹង៣៥% នៃទុនវិនិយោគសរុប បន្ទាប់មកគឺប្រទេសជប៉ុន ដែលមានប្រមាណ៨%។
ដោយឡែក គិតចាប់ពីឆ្នាំ២០១៦ ដល់ខែសីហា ឆ្នាំ២០១៩ ការវិនិយោគមកពីប្រទេសចិន នៅតាមបណ្តាខេត្តជាប់មាត់សមុទ្រ ដូចជា ខេត្តកោះកុង ខេត្តព្រះសីហនុ និងខេត្តកំពត មានទុនវិនិយោគប្រមាណ២.៦ពាន់លានដុល្លារ ក្នុងនោះនៅខេត្តកោះកុងទទួលបានទុនវិនិយោគប្រមាណជា៤៧០លានដុល្លារអាមេរិក, ខេត្តព្រះសីហនុទទួលបានទុនវិនិយោគប្រមាណ ២ពាន់លានដុល្លារ និងខេត្តកំពត ទទួលបានទុនវិនិយោគប្រមាណជា១០០លានដុល្លារ៕
