ដោយ Donald Lee
ភ្នំពេញៈ សេដ្ឋកិច្ចអាល្លឺម៉ង់ បានរួចផុតពីការធ្លាក់ចុះសេដ្ឋកិច្ច ដោយសារសេដ្ឋកិច្ចខ្លួនបានកើនឡើង០,១ ភាគរយនៅក្នុងត្រីមាសទី៣។
ការិយាល័យស្ថិតិសហព័ន្ធអាល្លឺម៉ង់ បានបញ្ជាក់នៅក្នុងសេចក្តីថ្លែងការណ៍មួយថា “នៅក្នុងត្រីមាសទី៣ នៃឆ្នាំ២០១៩ ផលិតផលក្នុងស្រុកសរុបអាល្លឺម៉ង់ បានកើនឡើង ០,១ភាគរយ នៅត្រីមាសទី២ នៃឆ្នាំ២០១៩ បន្ទាប់ពីការកែសម្រួលសម្រាប់ការប្រែប្រួលតាមរដូវ និងប្រតិទិន”។
ទោះយ៉ាងណាសេដ្ឋកិច្ចអាល្លឺម៉ង់ នៅមានភាពផុយស្រួយខ្លាំង ហើយលក្ខខណ្ឌសេដ្ឋកិច្ច មិនមើលទៅដូចដែលពួកគេនឹងមានភាពប្រសើរឡើង នាពេលអនាគតនោះទេ។
ក្រុមអ្នកវិភាគជឿជាក់ថា ការពឹងផ្អែករបស់ប្រទេសអាល្លឺម៉ង់ លើឧស្សាហកម្មផលិតរថយន្តរបស់ខ្លួន និងការធ្លាក់ចុះតម្រូវការរថយន្តនៅទូទាំងពិភពលោក គឺជាកម្លាំងចម្បងដែលធ្វើឱ្យសេដ្ឋកិច្ចធ្លាក់ចុះ។
លោក Claus Vistesen សេដ្ឋវិទូសហភាពអឺរ៉ុប បានថ្លែងនៅក្នុងរបាយការណ៍ Pantheon Macroeconomic ថា “គ្មានវិបត្តិសេដ្ឋកិច្ចទេ ប៉ុន្តែវាប្រាកដជាសេដ្ឋកិច្ចខ្សោយបំផុត។ ក្នុងន័យខ្លះ វាគឺអាក្រក់បំផុតសម្រាប់ទីផ្សារពិភពលោក”។លោកបន្ថែមថា “ ទិន្នន័យថ្ងៃនេះបញ្ជាក់ថា សេដ្ឋកិច្ចអាល្លឺម៉ង់បានជាប់គាំងហើយ ប៉ុន្តែចំណងជើងព័ត៌មានប្រហែលជាមិនមានភាពចាំបាច់គ្រប់គ្រាន់ ដើម្បីឆ្លើយតបទៅនឹងការឆ្លើយតបសារពើពន្ធភ្លាមៗ និងខ្លាំងក្លាពីទីក្រុងប៊ែរឡាំងទេ។
កត្តាចំបងមួយ ដែលទាញឧស្សាហកម្មយានយន្តសកលធ្លាក់ចុះ គឺគោលនយោបាយពាណិជ្ជកម្ម របស់ប្រធានាធិបតីអាមេរិក Donald Trump និងសង្គ្រាមពាណិជ្ជកម្មរវាងអាមេរិក និងចិន។
មជ្ឈមណ្ឌលស្រាវជ្រាវយានយន្ត (CAR) ដែលមានមូលដ្ឋាននៅសាកលវិទ្យាល័យ Duisburg Essen នៅអាឡឺម៉ង់បានចេញផ្សាយទិន្នន័យកាលពីខែមុន ដោយបញ្ជាក់ថា សង្គ្រាមពាណិជ្ជកម្មរវាងអាមេរិក និងចិននឹងនាំឱ្យមានការលក់រថយន្តខាតបង់ ដែលស្មើនឹង៧៦៥ពាន់លានដុល្លារ។
ផលិតកម្មរថយន្តរបស់អាល្លឺម៉ង់ បានធ្លាក់ចុះយ៉ាងខ្លាំងនៅពាក់កណ្តាលឆ្នាំដំបូងដែលស្មើនឹង១២ភាគរយ ធៀបនឹងរយៈពេលដូចគ្នាកាលពីឆ្នាំមុន ដែលជំរុញឱ្យសេដ្ឋកិច្ចអាល្លឺម៉ង់ឆ្ពោះទៅរកការធ្លាក់ចុះសេដ្ឋកិច្ច។ ការបាត់បង់ផលិតកម្មត្រូវបានបង្កឡើងដោយការលក់រថយន្តអាល្លឺម៉ង់នៅចិនមានការធ្លាក់ចុះ។
សមាគមឧស្សាហកម្មរថយន្តអាល្លឺម៉ង់ VDA បានឱ្យដឹងថា ការលក់នៅចិនបានធ្លាក់ចុះ ១៣ភាគរយចាប់តាំងពីខែ មករា ឆ្នាំនេះ។
របាយការណ៍របស់ VDA ចុងក្រោយបានថ្លែងថា “ការលក់រថយន្តដឹកអ្នកដំណើរបានបង្ហាញនិន្នាការអវិជ្ជមាន នៅលើទីផ្សារតែមួយធំបំផុតក្នុងរយៈពេល១៣ខែហើយ”៕
