ដោយ Donald Lee
ហុងកុងៈ មន្រ្តីជាន់ខ្ពស់ទីក្រុងហុងកុង នឹងដាក់បំរាមគោចរនៅចុងសប្តាហ៍នេះ បន្ទាប់ពីក្រុមបាតុករអាណាធិបតេយ្យ បានអុកឡុកទីក្រុងនេះអូសបន្លាសអស់រយៈពេលជាងកន្លះឆ្នាំកន្លងមកនេះ ហើយបានធ្វើឱ្យទីក្រុងសេដ្ឋកិច្ចមួយនេះជាប់គាំង។
អាជ្ញាធរក្រុង បានបញ្ជាឱ្យបិទសាលារៀនទាំងអស់ រហូតដល់ថ្ងៃអាទិត្យដោយសារមានអំពើហិង្សាកើតឡើងរយៈពេល ៤ថ្ងៃជាប់ៗគ្នា ដែលបានធ្វើឱ្យទីក្រុងទាំងមូលបាត់បង់សណ្តាប់ធ្នាប់ និងជាប់គាំង។
យោងតាមសេចក្តីរាយការណ៍ របស់ទីភ្នាក់ងារសារព័ត៌មានរ៉យទ័របានឱ្យដឹងថា និស្សិតដែលគាំទ្រលទ្ធិប្រជាធិបតេយ្យ រាប់ពាន់នាក់បានប្រមូលផ្តុំគ្នា នៅតាមសាលារៀន និងបានប្រមូលសម្ភារៈផ្គត់ផ្គង់ នៅក្នុងសាលាធ្វើជាអាវុធ និងធ្នូ និងព្រួញតតាំងជាមួយនឹងអាជ្ញាធរ។
រដ្ឋាភិបាលចិនដីគោក បានព្រមានក្រុមបាតុករថា អំពើហិង្សាដែលកំពុងកើនឡើងនេះនឹងបញ្ចប់នៅពេលឆាប់ៗនេះ។
យោងតាមការអត្ថាធិប្បាយ និងការចុះផ្សាយនៅលើគេហទំព័ររបស់ទូរទស្សន៍ CCTV បានឱ្យដឹងថា ដើម្បីបញ្ឈប់ភាពវឹកវរនៅក្នុងទីក្រុងទាំងមូល គេត្រូវតែអនុវត្តន៍ និងដោះស្រាយបញ្ហានេះ ឱ្យបានលឿនជាងមុននៅពេលនេះ។ ទីក្រុងនេះ នឹងមិនទទួលយកស្ថានការណ៍ ដែលមិនអាចគ្រប់គ្រងបាននោះទេ ហើយភាពយុត្តិធម៌ត្រូវតែមាន ឬទីក្រុងហុងកុងមិនត្រូវឱ្យគេជាន់ពន្លិចនោះទេ។
ប្រភពCCTV បន្តថា “យើងមានការជជែកវែកញែក និងការព្រមានចំពោះរឿងនេះ គ្រប់គ្រាន់ហើយ”។
សារព័ត៌មាន Global Times បានលុបចោលការប្រកាសស្តីពី បម្រាមគោចរភ្លាមៗដោយមិនមានការពន្យល់នៅរសៀលថ្ងៃព្រហស្បតិ៍នេះ។ សារព័ត៌មានដែលគ្រប់គ្រងដោយរដ្ឋបាលក្រុងហុងកុងមួយនេះ បានចុះផ្សាយពីការព្រមានដ៏គួរឱ្យព្រួយបារម្ភដល់ក្រុមអ្នកតវ៉ាហុងកុងនៅសប្តាហ៍នេះ ដោយបាននិយាយថា ក្រុមបាតុករកំពុងស្ថិតនៅលើផ្លូវ“ មហន្តរាយ”។
ការអត្ថាធិប្បាយរបស់សារព័ត៌មាន Global Times បានលើកឡើងថា“ យើងព្រមានដល់ក្រុមបាតុករឆ្វេងនិយមថា ; អ្នកគឺស្ថិតនៅលើគែមនៃសេចក្តីវិនាស” ។ “អ្នកដែលត្រូវបានគេបង្ខំឱ្យធ្វើជា” អ្នកក្លាហាន “គួរតែដើរចេញឱ្យឆ្ងាយតាមដែលអាចធ្វើទៅបាន។ អ្នកដែលចចេស ហើយបន្តប្រព្រឹត្តិអំពើអាក្រក់ នឹងទទួលទោសតាមច្បាប់”៕
