ដោយ វុត្ថា
ភ្នំពេញៈ រដ្ឋមន្ត្រីក្រសួងសាធារណៈការ និងដឹកជញ្ជូន លោកស៊ុន ចាន់ថុលបានអញ្ជើញ គណៈប្រតិភូក្រុមប្រឹក្សាធុរកិច្ចអាមេរិក-អាស៊ាន មកធ្វើទស្សនកិច្ចនៅកម្ពុជា ដើម្បីសិក្សាស្វែងយល់ឱកាសវិនិយោគ និងធុរកិច្ចនៅក្នុងប្រទេសកម្ពុជា។
លោកស៊ុន ចាន់ថុលនៅក្នុងជំនួបពិភាក្សាការងារ ជាមួយក្រុមប្រឹក្សាធុរកិច្ចអាមេរិក-អាស៊ាន និងក្រុមហ៊ុនធំៗរបស់អាមេរិក 3M, Autodesk, FedEx Express និង UPS នៅទីក្រុងហាណូយ ប្រទេសវៀតណាមកាលពីថ្ងៃទី ១៤ខែវិច្ឆិកា ម្សិលមិញនេះ បានសន្យាជួយសម្របសម្រួលដល់ក្រុមហ៊ុនអាមេរិក ដែលមានបំណងចង់វិនិយោគនៅកម្ពុជា។
លោកទេសរដ្ឋមន្រ្តីបានជម្រាបជូនក្រុមប្រឹក្សា អំពីការអភិវឌ្ឍន៍ហេដ្ឋារចនាសម្ព័ន្ធ កំណើនសេដ្ឋកិច្ចថេរ បរិយាកាសនយោបាយល្អ គោលនយោបាយគាំទ្រវិនិយោគ ទីតាំងប្រកបដោយអត្ថប្រយោជន៍និងយុទ្ធសាស្ត្រ និងកត្តាសក្តានុពលផ្សេងៗ ក្នុងការវិនិយោគនៅកម្ពុជា។
លោកទេសរដ្ឋមន្រ្តីស៊ុន ចាន់ថុល ក៏បាននគូសលើកឡើងអំពី កំណែទម្រង់សំខាន់ៗដែលបានបញ្ចប់ និងកំពុងអនុវត្តន៍នៅក្រសួងសាធារណការ និងដឹកជញ្ជូន ព្រមទាំងផែនការអភិវឌ្ឍន៍ហេដ្ឋារចនាសម្ព័ន្ធនៅកម្ពុជា។
ក្នុងកំឡុងពេលនៃកិច្ចប្រជុំរដ្ឋមន្រ្តីដឹកជញ្ជូនអាស៊ាន លើកទី២៥ នៅទីក្រុងហាណូយ ប្រទេសវៀតណាម លោក ស៊ុន ចាន់ថុល ទេសរដ្ឋមន្ត្រី រដ្ឋមន្រ្តីក្រសួងសាធារណការ និងដឹកជញ្ជូន បានទទួលជួបពិភាក្សាការងារជាមួយ ក្រុមប្រឹក្សាធុរកិច្ចអាមេរិក-អាស៊ាន ដឹកនាំដោយលោក Michael Michalak អនុប្រធានជាន់ខ្ពស់ និងជានាយកគ្រប់គ្រងតំបន់នៃក្រុមប្រឹក្សាធុរកិច្ចអាមេរិក-អាស៊ាន ដែលតំណាងមកពីក្រុមហ៊ុនធំៗរបស់អាមេរិក៖ 3M, Autodesk, FedEx Express និង UPS។
កិច្ចពិភាក្សាផ្តោតសំខាន់លើ វិធីដែលវិស័យឯកជនរបស់សហរដ្ឋអាមេរិក អាចគាំទ្រ ដល់ផែនការដើម្បីពន្លឿនការអភិវឌ្ឍហេដ្ឋារចនាសម្ព័ន្ធក្នុងអាស៊ាន និងដំណោះស្រាយលើគម្លាតនៃហេដ្ឋារចនាសម្ព័ន្ធក្នុងតំបន់ ការជំរុញបរិយាកាសហិរញ្ញប្បទានហេដ្ឋារចនាសម្ព័ន្ធ តាមរយៈក្របខ័ណ្ឌច្បាប់ប្រកបដោយតម្លាភាព ការលើកកម្ពស់តម្លៃនៃបច្ចេកវិទ្យានៅក្នុងការរៀបចំសិក្សាគំនូសប្លង់ និងសាងសង់គម្រោងហេដ្ឋារចនាសម្ព័ន្ធដឹកជញ្ជូន ការប្រែប្រួលអាកាសធាតុ និងភាពធន់នឹងគ្រោះមហន្តរាយ៕
