ដោយ ៖ រ៉ាណេត
ភ្នំពេញ ៖ ជាមួយនឹងគោលបំណងពង្រីកនូវវិសាលភាព និងឥទ្ធិពលសេដ្ឋកិច្ចបន្ថែមនៅក្នុងតំបន់អាស៊ាន មន្ត្រីជាន់ខ្ពស់របស់សហរដ្ឋអាមេរិកបានមកកាន់កម្ពុជា ធ្វើការសិក្សា និងសម្លឹងពីសក្ដានុពល រួមជាមួយការអភិវឌ្ឍជាក់ស្ដែង ដើម្បីឈានដល់ការបង្ហូរទុនវិនិយោគនៅក្នុងប្រទេសដែលកំពុងអភិវឌ្ឍមួយនេះ។
អនុប្រធានសភាពាណិជ្ជកម្មកម្ពុជា លោកឧកញ៉ា លឹម ហេង បានមានប្រសាសន៍ប្រាប់តាមទូរស័ព្ទកាលពីព្រឹកថ្ងៃទី១៥ ខែវិច្ឆិកា ឆ្នាំ២០១៩នេះថា វត្តមានរបស់មន្ត្រីជាន់ខ្ពស់ដែលជាសមាជិកព្រឹទ្ធសភារបស់សហរដ្ឋអាមេរិកមកកាន់កម្ពុជានៅពេលនេះ វាគឺជាសញ្ញាល្អមួយដែលបង្ហាញថា អាមេរិកកំពុងតែចាប់អារម្មណ៍មកលើកម្ពុជានៅក្នុងការពង្រីកកិច្ចទំនាក់ទំនងលើការវិនិយោគ និងពង្រីកទំហំវិស័យពាណិជ្ជកម្មរវាងប្រទេសទាំង២។
លោកឧកញ៉ាបានបញ្ជាក់ថា “នៅក្នុងជំនួបពិភាក្សាការងារជាមួយសភាពាណិជ្ជកម្មកម្ពុជា ដែលមានអ្នកឧកញ៉ា គិត ម៉េង ជាប្រធានដឹកនាំ លោក អេរិចសិន ដើក (Ericksen Doug) សមាជិកព្រឹទ្ធសភាអាមេរិក បានបញ្ជាក់ថា គោលបំណងដែលលោកមកកាន់កម្ពុជា គឺធ្វើការស្វែងយល់ពីស្ថានភាពពិតប្រាកដ និងទទួលព័ត៌មានដោយផ្ទាល់អំពីវឌ្ឍនភាពនានានៅកម្ពុជា ដើម្បីលើកកម្ពស់មិត្តភាពរវាងប្រទេសទាំង២ ក៏ដូចជាជំរុញ កិច្ចសហប្រតិបត្តិការលើវិស័យពាណិជ្ជកម្មនិងវិនិយោគ។
លោកឧកញ៉ាបានបន្តទៀតថា “ខាងភាគីសហរដ្ឋអាមេរិក បានស្នើសុំកិច្ចសហការជាមួយសភាពាណិជ្ជកម្មកម្ពុជា ដើម្បីរៀបចំព្រឹត្តិការណ៍ធុរកិច្ចនានាទាក់ទាញវិនិយោគិនអាមេរិកមកវិនិយោគបន្ថែមទៀតនៅកម្ពុជា រួមជាមួយនឹងការសន្យាជួយសម្របសម្រួល កៀងគរវិនិយោគិន និងធុរជនអាមេរិក ធ្វើទស្សនកិច្ចមកកាន់កម្ពុជា ដើម្បីពួកគេបានជ្រាបច្បាស់អំពីសក្តានុពលសេដ្ឋកិច្ច និងទីផ្សារកម្ពុជា”។
ជាមួយគ្នានេះ សមាជិកព្រឹទ្ធសភាអាមេរិករូបនេះ ក៏បានអញ្ជើញអ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា ដឹកនាំគណៈប្រតិភូសភាពាណិជ្ជកម្មកម្ពុជា ធ្វើទស្សនកិច្ចនៅសហរដ្ឋអាមេរិកផងដែរ។
អ្នកវិភាគ និងស្រាវជ្រាវសេដ្ឋកិច្ចនៃរាជបណ្ឌិតសភាកម្ពុជា លោកបណ្ឌិត ហុង វណ្ណៈ បានមានប្រសាសន៍តាមទូរស័ព្ទនៅព្រឹកថ្ងៃជាមួយគ្នានេះផងដែរថា កិច្ចជំនួបពិភាក្សាការងារ និងការវិនិយោគរបស់អាមេរិកនៅកម្ពុជានៅពេលនេះ គឺគ្រាន់តែជាចំណុចចាប់ផ្តើមទៅលើការសិក្សាតែប៉ុណ្ណោះ។
លោកបានបន្តទៀតថា “សម្រាប់ទីផ្សារកម្ពុជា បើប្រៀបធៀបជាមួយបណ្តាប្រទេសនានានៅក្នុងតំបន់ដែលបានក្លាយជាដៃគូវិនិយោគជាមួយអាមេរិក កម្ពុជាហាក់មានភាពតូចចង្អៀតជាងគេបន្តិច”។
លោកបណ្ឌិត ហុង វណ្ណៈ បានមាន ប្រសាសន៍បន្តទៀតថា “ជាបទពិសោធន៍កាលពីពេលកន្លងទៅ ទំហំពាណិជ្ជកម្មរវាងកម្ពុជា និងសហរដ្ឋអាមេរិក យើងឃើញមានទំហំធំគួរសម ប៉ុន្តែបើចំពោះការបណ្តាក់ទុនវិនិយោគនៅមិនទាន់មានភាពលេចធ្លោនៅឡើយនោះទេ ហើយក៏ទាន់ដឹងច្បាស់ថា អាមេរិក មកនៅពេលនេះមានគម្រោងវិនិយោគទៅលើវិស័យអ្វីឱ្យពិតប្រាកដនោះដែរ ដោយសារតែទំហំទីផ្សារវិនិយោគនៅកម្ពុជាចំពោះអាមេរិក គឺមានកម្រិតណាស់”។
លោកបានបន្តទៀតថា “សម្រាប់បណ្តាប្រទេសនៅក្នុងតំបន់ដែលជាដៃគូវិនិយោគរបស់អាមេរិកគឺមានច្រើនរួចខ្លះទៅហើយ ដូចជាប្រទេសថៃ វៀតណាម ម៉ាឡេស៊ី ហ្វីលីពីន ជាដើម ដែលប្រទេសទាំងនេះសុទ្ធតែមានទីផ្សារធំជាងកម្ពុជា”។ លោកបានបន្តទៀតថា “យ៉ាងណាក៏ដោយ ក្នុងន័យសេដ្ឋកិច្ច ឱ្យតែមានការវិនិយោគ ការធ្វើពាណិជ្ជកម្ម មិនថាទំហំប៉ុនណានោះទេ គឺសុទ្ធតែជាចំណុចវិជ្ជមានទាំងអស់ ហើយបើប្រទេសមហាអំណាចអាមេរិកចូលមកកាន់កម្ពុជាបន្ថែមទៀត វាកាន់តែល្អប្រសើរចំពោះសេដ្ឋកិច្ច”។
លោកបានបញ្ជាក់ថា “កម្ពុជាមានសក្ដានុពលទៅលើធនធាននៃវត្ថុធាតុដើម ជាពិសេសផ្នែកកសិកម្ម សម្រាប់ផលិត និងកែច្នៃក្នុងនាំចេញទៅកាន់ទីផ្សារអន្តរជាតិ ប៉ុន្តែកម្ពុជានៅមិនទាន់មានចំណេះ និងជំនាញផ្នែកបច្ចេកទេសនៅឡើយនោះទេ ដូច្នេះ អាមេរិកអាចវិនិយោគទុនដោយយកកម្ពុជាធ្វើជាទីតាំងផលិត ដូចជាការបង្កើតរោងចក្រកែច្នៃសម្រាប់នាំចេញជាដើម ដែលចំណុចនេះក៏អាចជាជម្រើសល្អសម្រាប់អាមេរិកផងដែរ”។
លោកបន្ថែមថា “ក្រៅពីនេះ អាមេរិក ក៏អាចវិនិយោគទៅលើវិស័យទេសចរណ៍ជាមួយកម្ពុជាផងដែរ តាមរយៈការបង្កើតភ្នាក់ងារទេសចររវាង អាមេរិក និងកម្ពុជា ខណៈដែលកម្ពុជា ក៏ជាប្រទេសដែលមានអំណោយផលលើវិស័យទេសចរណ៍វប្បធម៌ និងធម្មជាតិផងដែរនោះ” ៕
