ដោយ ៖ រ៉ាណេត
ភ្នំពេញ ៖ បច្ចុប្បន្ននេះ ទំហំវិនិយោគរបស់ប្រទេសកូរ៉េខាងត្បូងនៅក្នុងប្រទេសកម្ពុជា កំពុងតែស្ថិតនៅលើខ្សែបន្ទាត់ដ៏ល្អមួយក្នុងភាពជាដៃគូជាមួយនឹងទំហំទឹកប្រាក់សរុបប្រមាណជាង៤០០០លានដុល្លារសហរដ្ឋអាមេរិក ខណៈដែលថ្នាក់ដឹកនាំកំពូលនៃប្រទេសទាំង២ កំពុងតែស្វះស្វែងបង្កើនកិច្ចទំនាក់ទំនងគ្រប់ជ្រុងជ្រោយឱ្យកាន់តែជិតស្និទ្ធ និងស៊ីជម្រៅបន្ថែមទៀត។
ក្រៅពីមានកិច្ចទំនាក់ទំនងក្នុងវិស័យការទូត ប្រទេសកូរ៉េខាងត្បូង ក៏ជាដៃគូសហប្រតិបត្តិការយ៉ាងសំខាន់របស់កម្ពុជាទៅលើវិស័យពាណិជ្ជកម្ម និងការវិនិយោគនានា ដែលគិតមកដល់ពេលបច្ចុប្បន្ននេះ ការវិនិយោគរបស់ប្រទេសកូរ៉េខាងត្បូងមានទំហំទឹកប្រាក់សរុបប្រមាណជាង៤០០០លានដុល្លារសហរដ្ឋអាមេរិក ដែលភាគច្រើនទៅលើវិស័យវាយនភ័ណ្ឌ ឧស្សាហកម្ម កសិកម្ម អចលនទ្រព្យ និងសំណង់ ។
ឯកអគ្គរាជទូតកម្ពុជា ប្រចាំនៅប្រទេសកូរ៉េខាងត្បូង លោក ឡុង ឌីម៉ង់ បានមានប្រសាសន៍កាលពីចុងសប្ដាហ៍នេះថា កម្ពុជា-កូរ៉េខាងត្បូង កំពុងតែស្ថិតនៅលើផ្លូវឆ្ពោះទៅរកការបង្កើតភាពជាដៃគូយុទ្ធសាស្ត្រគ្រប់ជ្រុងជ្រោយរវាងប្រទេសទាំង២ ហើយមិនយូរទៀតនោះទេ លទ្ធភាពនៃការរៀបចំក្នុងនាមជាដៃគូយុទ្ធសាស្ត្រនឹងត្រូវធ្វើបានរួចរាល់”។
លោកបន្តទៀតថា “ផលប្រយោជន៍ដែលកម្ពុជាអាចទាញបានពីកិច្ចទំនាក់ទំនង និងភាពជាដៃគូយុទ្ធសាស្ត្រគ្រប់ជ្រុងជ្រោយនេះ សំខាន់គឺបញ្ហានយោបាយ និងសេដ្ឋកិច្ច ដែលនាំមកនូវផលជាច្រើនដល់ភាគីទាំង២ ជាពិសេសលំហូរចូលនៃការវិនិយោគពីសំណាក់ប្រទេសកូរ៉េខាងត្បូងឆ្ពោះមកកាន់កម្ពុជាតែម្ដង ដែលមិន មែនគ្រាន់តែជារូបិយប័ណ្ណប៉ុណ្ណោះទេ គឺនៅទទួលបានជំនាញបច្ចេកវិទ្យាជាច្រើនទៀត ដែលគេធ្លាប់ទទួលបានជោគជ័យ និងមានបទពិសោធន៍ខ្ពស់ក្រោយគេបញ្ចប់សង្គ្រាមចប់ឆ្នាំ១៩៥៣ ដែលត្រូវបានបណ្តាប្រទេសជឿនលឿននានាលើកសរសើរថា កូរ៉េខាងត្បូង បានដើរលើផ្លូវកាត់មួយក្នុងការអភិវឌ្ឍប្រទេស”។
នៅក្នុងទំហំទឹកប្រាក់វិនិយោគរបស់ប្រទេសកូរ៉េខាងត្បូងនៅកម្ពុជាប្រមាណ ៤០០០លានដុល្លារ នៅលើគម្រោងចំនួន ២១៤ ដែលក្នុងនោះមានចំនួន ១២៣ គម្រោងបានធ្វើការវិនិយោគទៅលើវិស័យរោងចក្រក្នុងទំហំទឹកប្រាក់ប្រមាណ ៤៨៦លានដុល្លារ ដែលផ្តល់ឱកាសការងារដល់ប្រជាពលរដ្ឋខ្មែរប្រមាណជាង៨ម៉ឺនកន្លែង។
ដោយឡែកទំហំពាណិជ្ជកម្មរវាងប្រទេសទាំង២ មានប្រមាណជិត១០០០លានដុល្លារ ដែលក្នុងនោះការនាំចេញរបស់កម្ពុជាទៅកាន់ប្រទេសកូរ៉េខាងត្បូងមានប្រមាណ៣០ភាគរយ។ ទំនិញដែលកម្ពុជាធ្វើការនាំចេញរួមមានដូចជាសម្លៀកបំពាក់ គ្រឿងអេឡិចត្រូនិក ស្បែកជើង កាបូប ភេសជ្ជៈ កៅស៊ូ ឱសថ ក្រដាស់កាតុង រួមជាមួយនឹងផលិតផលកសិកម្មមួយចំនួនទៀត ហើយទំនិញពីប្រទេសកូរ៉េខាងត្បូងដែលត្រូវបាននាំចូលមកកានទីផ្សារកម្ពុជា រួមមានដូចជា ក្រណាត់ត្បាញ រថយន្ត ភេសជ្ជៈ គ្រឿងអេឡិចត្រូនិក គ្រឿងម៉ាស៊ីន វត្ថុតុបតែងលម្អរផ្ទះ ឱសថ សាប៊ូ និងផលិតផលប្លាស្ទីកជាដើម ៕
