ដោយ ប៊ី
ភ្នំពេញៈ លោក Sohn Tae-seung ប្រធានក្រុមហ៊ុន Woori Financial Group ដែលជាធនាគារធំមួយ ដែលមូលដ្ឋាននៅកូរ៉េខាងត្បូងបានឱ្យដឹងថា ធនាគាររបស់លោកនឹងដាក់អាទិភាពកំពូលនៅលើទីផ្សារអាស៊ាន ដើម្បីពន្លឿនការពង្រីកទីផ្សារក្រៅប្រទេសរបស់ខ្លួន និងក្លាយជាក្រុមហិរញ្ញវត្ថុឈានមុខគេនៅអាស៊ី។
លោក Sohn បាននិយាយនៅក្នុងបទសម្ភាសន៍ជាមួយកាសែត The Korea Times ថា “ទីផ្សារអាស៊ាន គឺជាអាទិភាពកំពូលសម្រាប់ក្រុមហ៊ុន Woori Financial Group នៅពេលនិយាយអំពីការពង្រីកអាជីវកម្មនៅបរទេស”។
លោកបានបន្ថែមថា “មិនត្រឹមតែអត្រាកំណើន និងប្រាក់ចំណេញ ដែលទទួលបានពីតំបន់ប៉ុណ្ណោះទេ ប៉ុន្តែថែមទាំងទំនាក់ទំនងមិត្តភាពរបស់កូរ៉េ ជាមួយបណ្តាប្រទេសនៅទីនោះ តាមរយៈកិច្ចសហប្រតិបត្តិការសេដ្ឋកិច្ចជិតស្និទ្ធ”។ លោកបន្តថា “អាស៊ីអាគ្នេយ៍មានសារៈសំខាន់បំផុតសម្រាប់ក្រុមហ៊ុន Woori ទាក់ទងនឹងការពង្រីកខ្លួនលើពិភពលោក។ យើងកំពុងពង្រីកអាជីវកម្ម របស់យើងនៅទីនោះយ៉ាងឆាប់រហ័ស ដោយមានគំរូអាជីវកម្ម ដែលត្រូវបានកំណត់តាមប្រទេសសមាជិកអាស៊ាននីមួយៗ”។
អាស៊ានសំដៅទៅលើសមាគមប្រជាជាតិអាស៊ីអាគ្នេយ៍ ហើយរដ្ឋជាសមាជិកចំនួន ១០ របស់ខ្លួនគឺប្រទេសព្រុយណេ កម្ពុជា ឥណ្ឌូនេស៊ី ម៉ាឡេស៊ី មីយ៉ាន់ម៉ា ហ្វីលីពីន សឹង្ហបូរី ឡាវ ថៃ និងវៀតណាម។
ធនាគារ Woori Bank ដែលជាក្រុមហ៊ុនឈានមុខគេរបស់ក្រុមនេះ បច្ចុប្បន្នមានសាខាទូទាំងពិភពលោកធំជាងគេ ក្នុងចំណោមធនាគារក្នុងស្រុក ដែលមានសាខារហូតដល់ចំនួន៤៦៥កន្លែង ចែកចាយទូទាំងពិភពលោកគិតត្រឹមថ្ងៃទី ២៥ ខែ វិច្ឆិកា។
សាខាចំនួន១៤ បានបើកនៅក្នុងតំបន់អាស៊ាននៅឆ្នាំនេះ ដែលមាន៣នៅវៀតណាម៩ នៅកម្ពុជា និង២ នៅមីយ៉ាន់ម៉ា។
ការបើកសម្ពោធថ្មីៗបំផុតគឺសាខារបស់ធនាគារ Woori Bank នៅទីក្រុង Bien Hoa វៀតណាមថ្ងៃទី ១៥ ខែ វិច្ឆិកា។
វៀតណាមគឺជាទីផ្សារមួយក្នុងចំណោមទីផ្សារសំខាន់ៗ សម្រាប់ធនាគារ Woori Bank។ ធនាគារគ្រោងនឹងបើកសាខាចំនួនបីបន្ថែមទៀត នៅក្នុងប្រទេសនេះនៅចុងឆ្នាំនេះ។ ខ្លួនមានគោលបំណងបើកសាខាថ្មីចំនួន៥ជារៀងរាល់ឆ្នាំ រហូតដល់ឆ្នាំ២០២១ ដើម្បីឱ្យមានសាខាចំនួន២០ នៅក្នុងប្រទេសនៅចុងឆ្នាំ ២០២១។
ដើម្បីបង្កើនសមត្ថភាពប្រកួតប្រជែងរបស់ខ្លួន នៅក្នុងតំបន់ ធនាគារ Woori បានបង្កើតមន្ទីរពិសោធន៍បច្ចេកវិទ្យាហរិញ្ញវត្ថុ នៅវៀតណាមកាលពីខែមុន។ មន្ទីរពិសោធន៍បច្ចេកវិទ្យា នឹងគាំទ្រដល់អាជីវកម្មរបស់អ្នកចាប់ផ្ដើមអាជីវកម្មថ្មី របស់កូរ៉េនៅក្នុងតំបន់ ក៏ដូចជាជួយដល់អាជីវកម្មថ្មីៗនៅក្នុងវៀតណាម និងអាចឱ្យក្រុមហ៊ុននៃប្រទេសទាំងពីរសហការគ្នា៕
