ដោយ ៖ រ៉ាណេត
ភ្នំពេញ ៖ សម្រាប់ទំហំពាណិជ្ជកម្មរបស់កម្ពុជា ជាមួយទីផ្សារអន្តរជាតិនានានៅក្នុងរយៈពេល ១០ខែនៃឆ្នាំ ២០១៩ នេះ បានសម្រេចរហូតដល់ជិត២៩ពាន់ដុល្លារ ដែលក្នុងនោះ ការនាំចេញពីកម្ពុជាមានជាង ១២ពាន់ដុល្លារ ហើយការនាំចូលមានទំហំជិត ១៧ ពាន់លានដុល្លារ ។ នេះបើតាមតាមរបាយការណ៍នាយកដ្ឋានស្ថិតិ និងវិភាគសេដ្ឋកិច្ច នៃក្រសួសេដ្ឋកិច្ច និងហិរញ្ញវត្ថុ ដែលភ្នាក់ងារព័ត៌មានទើបទទួលបាន។
គិតត្រឹមដំណាច់ខែតុលា ឆ្នាំ២០១៩ កន្លងទៅនេះ ទំហំពាណិជ្ជកម្មរបស់កម្ពុជាមានការកើនឡើងគួរឱ្យកត់សម្គាល់ ដែលក្នុងនោះការនាំចេញពីកម្ពុជាទៅកាន់ទីផ្សារអន្តរជាតិមានទំហំទឹកប្រាក់ ១២០២៩ លានដុល្លារ កើនឡើងជាង ១៥ភាគរយ ហើយការនាំចូលមកកាន់កម្ពុជាមានទំហំទឹកប្រាក់ប្រមាណ ១៦៩៦៣ លាន ដុល្លារ កើនឡើងប្រមាណ ២០ភាគរយ ប្រើប្រៀបធៀបទៅនឹងរយៈពេលដូចគ្នាកាលពីឆ្នាំ២០១៨។
លោកបណ្ឌិត ហុង វណ្ណៈ អ្នកស្រាវជ្រាវសេដ្ឋកិច្ចនៃរាជបណ្ឌិតសភាកម្ពុជា បានបង្ហាញពីក្ដីសាទរចំពោះការសម្រេចបានកំណើននៃទំហំពាណិជ្ជកម្មខាងលើនេះ។ មានប្រសាសន៍តាមទូរស័ព្ទកាលពីព្រឹកថ្ងៃទី២៧ ខែវិច្ឆិកា ឆ្នាំ២០១៩នេះ ថា “សមិទ្ធផលសេដ្ឋកិច្ច និងពាណិជ្ជកម្ម ដែលយើងទទួលបានខាងលើនេះ គឺជាសញ្ញាវិជ្ជមានមួយដែលបង្ហាញពីភាពល្អប្រសើររបស់កម្ពុជានៅពេលបច្ចុប្បន្ន និងបន្តទៅថ្ងៃអនាគត”។
លោកបានបន្តទៀតថា “គិតត្រឹមចុងឆ្នាំ២០១៩នេះ ទំហំពាណិជ្ជកម្មរបស់កម្ពុជាមានការកើនឡើងល្អ ហើយវានឹងនៅតែបន្តឡើងទៀតនៅឆ្នាំបន្ទាប់ ខណៈដែលរដ្ឋាភិបាលកម្ពុជាអាចបំពេញចំណូលបន្ថែមជាច្រើនដែលអាចទាញយកពីវិស័យនានា ដូចជា វិស័យអចលនទ្រព្យ វិស័យទេសចរណ៍ ក៏ដូចជាធនធានរ៉ែ មួយចំនួនទៀត ជាពិសេសតំណក់ប្រេង ដែលគ្រោងនឹងចាប់ប្រតិបត្តិការនៅត្រឹមឆ្នាំ២០២០ខាងមុខនេ” ។
ទីផ្សារធំដែលទទួលស្វាគមន៍ផលិតផលពីកម្ពុជា រួមមានដូចជា ទីផ្សារអាស៊ាន សហរដ្ឋអាមេរិក សហគមន៍អឺរ៉ុប ចក្រភពអង់គ្លេស ចិន ជប៉ុន រួមជាមួយនឹងបណ្តាប្រទេសផ្សេងៗមួយចំនួន ដែលក្នុងនោះមានតម្រូវការទៅលើផលិតផលវិស័យកាត់ដេរ ដូចជា សម្លៀកបំពាក់ ស្បែកជើង គ្រឿងបង្គុំអេឡិចត្រូនិក, កង់, ឈើកែច្នៃ, ស្រូវ, អង្ករ, កៅស៊ូ, ស្ករស, ផលិតផលជលផល, មាស និងវិស័យផ្សេងៗមួយចំនួនទៀត។
ដោយឡែកសម្រាប់ ផលិតផលដែលត្រូវបាននាំចូលមកកាន់កម្ពុជាវិញរួមមាន ដូចជា ថ្នាំពេទ្យ បារី ភេសជ្ជៈ គ្រឿង និងចំណីអាហារ រួមនឹងគ្រឿងបរិក្ខាសំណង់ គ្រឿងអេឡិចត្រូនិច វាយនភ័ណ្ឌ និងសំលៀកបំពាក់ ទោចក្រយានយន្ត គ្រឿងបម្លាស់យានយន្ត បរិក្ខារត្រជាក់ មាស ប្រេងឥន្ទនៈ ជីកសិកម្ម ជាដើម ៕
