ដោយ វុត្ថា
ភ្នំពេញ៖ អាជ្ញាធរខេត្តកំពត បានអនុម័តសេចក្តីពង្រាងផែនការអភិវឌ្ឍន៍ទេសចរណ៍នៅក្នុងខេត្តសម្រាប់ឆ្នាំ២០១៩-២០២៣ ពោលគឺមានរយៈពេល ៥ ឆ្នាំ ទៅមុខ ដើម្បីឆ្លើយតបទៅនឹងការរីកចំរើន និងគ្រប់គ្រងល់វិស័យទេសចរណ៍ឱ្យមានប្រសិទ្ធិភាពខ្ពស់។
លោក ជាវ តាយ អភិបាលខេត្តនៅក្នុងកិច្ចប្រជុំពិភាក្សាដើម្បីឆ្លងសេចក្តីព្រាងផែនការអភិវឌ្ឍន៍ទេសចរណ៍ខេត្តកំពតសម្រាប់ឆ្នាំ២០១៩-២០២៣ នៅថ្ងៃទី២៧ ខែវិច្ឆិកា ឆ្នាំ២០១៩ នេះ បានឱ្យដឹងថា កិច្ចប្រជុំនេះនៅថ្ងៃមានការចូលរួមពីក្រុមប្រឹក្សាខេត្ត ថ្នាក់ដឹកនាំក្រុងស្រុក មន្ទីរអង្គភាព និងមន្ត្រីជំនាញពាក់ព័ន្ធក្នុងខេត្តបានឯកភាព និងអនុម័តទាំងស្រុងចំពោះសេចក្តីព្រាងផែនការនេះ ។
លោកបន្តថា សេចក្តីព្រាងផែនការទេសទេសចរណ៍ខេត្តកំពតសម្រាប់ឆ្នាំ២០១៩-២០២៣ រយៈពេល០៥ឆ្នាំ ដែលត្រូវបានរៀបចំនោពេលនេះ មានចំនួន៣៧ទំព័រ ស្មើនឹង១១ជំពូក។ លោកអភិបាលខេត្តបន្តថា ទាក់ទិននឹងការគាំទ្រលើពង្រាងផែនការអភិវឌ្ឍន៍ទេសចរណ៍នេះ លោកបានជំរុញដល់គ្រប់ផ្នែកពាក់ព័ន្ធត្រូវចូលរួមសហការជាមួយមន្ត្រីជំនាញបំណងធ្វើឱ្យវិស័យទេសចរណ៍ក្នុងខេត្តកាន់តែរីកចម្រើនដើម្បីផលប្រយោជន៍ទាំងអស់គ្នា។
លោក ថោង ខុន រដ្ឋមន្ត្រីរដ្ឋមន្ត្រីក្រសួងទេសចរណ៍កាលពីកន្លងមកថ្មីៗនេះបានជំរុញឱ្យអាជ្ញាធរខេត្តកំពត ត្រូវសិក្សារៀប ចំឱ្យបាននូវផែនការមេ អភិវឌ្ឍន៍វិស័យទេសចរណ៍នៅតំបន់ព្រែកកំពតនេះ ពិសេសត្រូវធ្វើឱ្យបានលឿនបំផុត ដើម្បីឱ្យទាន់សភាពការណ៍បច្ចុប្បន្ន ដែលភ្ញៀវទេសចរក្នុងខេត្តនេះកំពុងមានការកើនឡើង។
ខេត្តកំពតស្ថិតនៅប៉ែកនិរតីនៃប្រទេស មានចម្ងាយ១៤៨គីឡូម៉ែត្រពីរាជធានីភ្នំពេញ។ ខេត្តកំពតសម្បូរដោយសក្កានុពលជាច្រើនរួមទាំងទេសចរណ៍ផងដែរ។ បើយោងតាមចក្ខុវិស័យដល់ឆ្នាំ២០៣០ នៃប្លង់គោលប្រើប្រាស់ដីក្រុងកំពតគឺ រដ្ឋាភិបាល កំពុងសំដៅរៀបចំ និងអភិវឌ្ឍ ក្រុងកំពតជាក្រុងគុជបៃតង ឆ្នេរសមុទ្រ ធម្មជាតិ វប្បធម៍ និងពាណិជ្ជកម្ម តាមរយៈការអភិវឌ្ឍន៍ជាទីក្រុង រមណីយដ្ឋានគុជទេសចរណ៍ឆ្នេរសមុទ្រ ធម្មជាតិ វប្បធម៍ ដែលស្អាតបំផុតលើសកលលោក។
យោតាមរបាយការណ៍របស់មន្ទីរទេសចរណ៍ខេត្តកំពត បានឱ្យដឹងថា រយៈពេល៩ខែ ក្នុងឆ្នាំ២០១៩នេះ ខេត្តកំពតទទួលបានភ្ញៀវទេសចរសរុប ១៣១៣៩២២នាក់ កើនឡើង ១៧,៤៨% ក្នុងនោះភ្ញៀវជាតិមានចំនួន ១១៥៩៩៩០នាក់ កើន ឡើង ១៧,៥២% និងភ្ញៀវអន្តរជាតិមានចំនួន ១៥៣៩៣២នាក់ កើនឡើង ១៧,១៦% បើប្រៀបធៀបនឹងរយៈពេលដូចគ្នានៅឆ្នាំ២០១៨៕
