ដោយ វុត្ថា
ភ្នំពេញ៖ រហូតមកដល់ពេលនេះ ចំនួនកាស៊ីណូដែលបាននឹងកំពុងប្រតិបត្តការនៅក្នុងខេត្តព្រះសីហនុបានកើនដល់ជិត ៨០ សហគ្រាស ដែលបានផ្តលឱកាសការងាររាប់ម៉ឺនកន្លែងដល់ប្រជាជន និងសេដ្ឋកិច្ចដល់ប្រទេសកម្ពុជា។
លោក ឃាង ភារម្យ អ្នកនាំពាក្យរដ្ឋបាលខេត្តព្រះសីហនុបានប្រាប់គេហទំព័រ propertyarea.asia នៅថ្ងៃទី ២៨ ខែវិច្ឆិកា ឆ្នាំ ២០១៩ បានឱ្យដឹងថា យោងរបាយការណ៍របស់មន្ទីរការងារ និងបណ្តុះបណ្តាលវិជ្ជា ជីវៈខេត្ត ដែលបានចុះធ្វើអធិការកិច្ច កាលពីបំណាច់ខែសីហាកន្លងមកនេះ មានចំនួន ៧៣ សហគ្រាស ហើយអំឡុងខែតុលា និង វិច្ឆិកា នេះមានការបើកសម្ពោធដំណើរបន្ថែមមួយចំនួនទៀតដែលមិនបញ្ចូលទៅក្នុងរបាយការណ៍នោះ នឹងអាចកើនដល់ជិត ៨០ សហគ្រាស។
លោកបន្តថា របាយការណ៍របស់មន្ទីរការ និងបណ្តុះបណ្តាលវិជ្ជាជីវៈ គឺត្រូវបានគេចុះធ្វើអធិការកិច្ចដោយផ្ទាល់ជាមួយសហគ្រាសកាស៊ីណូ ដោយបានដកស្រង់យកនូវទិន្ន័យកម្មករនិយោជិតដែលកំពុងបំរើការងារនៅក្នុងវិស័យកាស៊ីណូនៅក្នុងខេត្តជាប់មាត់សមុទ្រមួយនេះ។
យោងរបាយការណ៍របស់មន្ទីការងារ និងបណ្តុះបណ្តាលវិជ្ជា ជីវៈខេត្តព្រះសីហនុ ផ្ញើទៅជូនលោក អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានឱ្យដឹងកាលពីបំណាច់ខែសីហាថា បច្ចុប្បន្នសហគ្រាសនៃសកម្មភាពសេដ្ឋកិច្ចកាស៊ីណូ និងកាស៊ីណូអនឡាញក្នុងខេត្តព្រះសីហនុ មានចំនួន ៧៣ សហគ្រាស មានកម្មករនិយោជិតសរុប ២៨,៥៧៤ នាក់ ស្រី ១២,៥១៥ នាក់ បរទេស ១២,០៥៧ នាក់ និងស្រី ២,៨១០ នាក់ ។
លោក គួច ចំរើន អភិបាល នៃគណៈអភិបាលខេត្តព្រះសីហនុ ធ្លាប់បានឱ្យដឹងថា ខេត្តព្រះសីហនុជាតំបន់ប៉ូលអភិវឌ្ឍជាតិមួយដ៏សំខាន់នៅតំបន់ឆ្នេរសមុទ្រកម្ពុជា និងជាខេត្តដែលមានសក្តានុពល សេដ្ឋកិច្ចខ្ពស់ក្នុងការទាក់ទាញវិនិយោគិន និងភ្ញៀវទេសចរណ៍ ជាមួយនឹងការកំសាន្តតាមឆ្នេរសមុទ្រ និងកោះដ៏ស្រស់ស្អាត កំពង់ផែអន្តជាតិ អាកាសយានដ្ឋានអន្តជាតិ និងធនធានធម្មជាតិដ៏សំបូរបែប និងត្រូវបានប្រសិទ្ធនាមជា”តារារៈនាទិសនិរតី” ជាមួយនឹងសន្ទុះនៃការអភិវឌ្ឍដ៏ខ្លាំងក្លា និងប្រកបដោយចីរភាព ជាពិសេសការវិនិយោគលើវិស័យអចលនទ្រព្យ រួមមានមជ្ឈមណ្ឌលពាណិជ្ជកម្ម អគារស្នាក់នៅរួម សណ្ឋាគារ មណ្ឌលកំសាន្ត ។ល។ ដែលបង្ហាញអំពីវប្បធម៌ និងបំរើដល់វិស័យទេសចរណ៍ និងធុរកិច្ច ។
លោកបន្តថា ក្នុងរយៈពេល១០ខែ ឆ្នាំ២០១៩ ខេត្តទទួលបានភ្ញៀវទេសចរណ៍សរុបចំនួន ១,៩៤០,១៩៩នាក់ កើនឡើង ១០.៦២% ក្នុងនោះ ភ្ញៀវជាតិ ១,២០៨,៥២៤នាក់ និងភ្ញៀវអន្តរជាតិ ៧៣១,៦៧៥នាក់ ។ មូលដ្ឋានអាជីវកម្ម សេវាកម្មទេសចរណ៍ គិតត្រឹមខែតុលា ឆ្នាំ២០១៩ មានចំនួនសរុប ៨៨០កន្លែង ក្នុងនោះសណ្ឋាគារ ១០៨កន្លែង ស្មើនឹង ៧,១៦២បន្ទប់ ផ្ទះសំណាក់ ២៣៧កន្លែង ស្មើនឹង ២,៩៣៦បន្ទប់ បឹងហ្គាឡូចំនួន ៣១កន្លែង ស្មើនឹង ៤៣១បន្ទប់ ភោជនីយដ្ឋាន ៣១៣កន្លែង ស្មើនឹង ១៣,៨៣៣តុ និងសេវាកម្មផ្សេងៗជាច្រើនទៀត។
លោកអភិបាលខេត្ត បានបន្តថា ក្នុងនាមគណៈបញ្ជាការឯកភាពខេត្ត ខិតខំដឹកនាំ ការពារសន្តិសុខ សុវត្ថិភាព ផ្តល់ឱកាស ការពារសុខសុវត្ថិភាពជូនភ្ញៀវទេសចរ និងអ្នកវិនិយោគគិន ។ លោកថា “រដ្ឋបាលខេត្តបានចុះកិច្ចព្រមព្រៀង ជាមួយក្រុមហ៊ុន ហូវ៉ៃ ធ្វើការបំពាក់កាំម៉ារ៉ាសុវត្ថិភាពនៅតាមបណ្តាដងផ្លូវ ថ្នល់សំខាន់ៗ អាចចាត់ទុកថា ជាផ្នែកមួយ នៃទីក្រុងវៃឆ្លាតរបស់យើងក្នុងការគ្រប់គ្រងសន្តិសុខកាន់តែល្អប្រ សើរថែមទៀត”៕
