ដោយ វុត្ថា
ភ្នំពេញ៖ របាយការណ៍របស់ក្រសួងរៀបចំដែនដី នគរូបនីយកម្ម និងសំណង់ បានបង្ហាញថា ក្នុងរយៈពេល ៩ខែ នៃឆ្នាំ ២០១៩ នេះ កម្ពុជាទទួលបានគម្រោងវិនិយោគលើវិស័យសំណង់លំនៅឋានមានចំនួន ២៣១៧ គម្រោងមានផ្ទៃក្រឡាសរុបចំនួន ៩៨៨១២០ ម៉ែត្រការ៉េ ដែលមានតម្លៃទុនវិនិយោគប្រមាណ ៣៤៤ ៨០១ ៥១៥ ដុល្លារ គឺមានការកើនឡើងចំនួន ១១៥ , ២១ % ។
លោក តាន់ មុនីវណ្ណ ទីប្រឹក្សាបច្ចេកទេសនៃសមគមអ្នកអភិវឌ្ឍន៍លំនៅឋានកម្ពុជា បានឱ្យដឹងនៅថ្ងៃទី ២៨ ខែវិច្ឆិកា ឆ្នាំ ២០១៩ នេះ ថា បើក្រឡេកមើលក្នុងវិស័យលំនៅឋានក្នុងស្រុក មិនមានបញ្ហាអ្វីនោះទេ ទាំងអ្នកអភិវឌ្ឍន៍ និងតម្រូវការ តែមានបញ្ហាខ្លះចំពោះអ្នកអភិវឌ្ឍន៍មកពីក្រៅស្រុកដូចមកប្រទេសចិនដែលបាននឹងកំពុងវិនិយោគនៅក្នុងប្រទេសកម្ពុជា ដោយសារដាក់តំលៃខ្ពស់ចំពោះការទិញលំនៅឋាននៅក្នុងប្រទេសកម្ពុជា។
លោកថា “តម្រូវការក្នុងវិស័យលំនៅឋាននៅក្នុងប្រទេសកម្ពុជារហូតមកដល់ពេលនេះ នៅតែមានដំណើរល្អប្រសើរជាប្រក្រតីទាំងអ្នកអភិវឌ្ឍន៍ និងអ្នកមានតម្រូវការនៅក្នុងស្រុក”។
នាយិកាក្រុមហ៊ុនអចលនទ្រព្យ AMATAK Property Service និងជាអនុប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា លោកស្រីតាំង ហួរ បានឱ្យដឹងដែរថា សម្រាប់ទីផ្សារលំនៅឋានរហូតមដល់ពេលនេះនៅតែមានតម្រូវការជាប្រចាំ ជាពិសេសតម្រូវការពីអ្នកដែលទើបរៀបការហើយថ្មីថ្មោង និងលំនៅឋានតម្លៃសមរម្យ ព្រមទាំងមានការសម្រួលការបង់លុយល្អប្រសើរដល់ចង់បានផ្ទះរស់នៅ ។
លោកស្រីថា “មនុស្សកាន់តែកើន អចលនទ្រព្យលំនៅឋាននៅតែមានតម្រូវការរបស់មនុស្សប្រដូចទៅនឹងសត្វចាបដែលត្រូវការសំបុកសម្រាប់រស់នៅដូច្នោះឯង” ។
លោកស្រីបន្ថែមទៀតថា តម្រូវការលំនៅឋានមានទាំងនៅក្នុងទីក្រុង និងជាយក្រុងភ្នំពេញទៅតាមចំណូលរបស់ពលរដ្ឋ នៅតែមានសន្ទុះការរីកចំរើន។ អ្នកដែលមានចំណូលខ្ពស់ស្វែងរកលំនៅឋាននៅក្នុងទីក្រុង ឬកណ្តាលទីក្រុង និងអ្នកដែលមានចំណូលមធ្យម ឬចំណូលទាបស្វែងរកលំនៅឋាននៅតាមជាយក្រុងភ្នំពេញ។
លោកស្រីក៏បានអំពាវដល់អ្នកអភិវឌ្ឍន៍លំនៅឋានទាំងអស់កុំឱ្យមានការព្រួយបារម្ភចំពោះការលក់លំនៅឋានដែលខ្លួនបានសាង់មិនចេញនោះ ព្រោះតម្រូវការនៅតែមានជាប្រចំា តែត្រូវអភិវឌ្ឍន៍យ៉ាងណាឱ្យមានសោភ័ណភាព បរិស្ថានបៃតង និង មានដើមឈើព័ន្ធជុំវិញនោះនឹងលក់ដាច់ហើយ។
ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា លោក ច្រឹក សុខនីម បានឱ្យដឹងដែរថា ទីផ្សារលំនៅឋាននៅក្នុងប្រទេសកម្ពុជានៅតែមានការរីកចំរើន មិនមានអ្វីជាបញ្ហានោះទេ ដោយសារប្រទេសកម្ពុជាមានយុវជនក្មេងៗនៅមានច្រើន ដែលត្រូវការលំនៅឋានកាន់តែច្រើននាពេលបច្ចុប្បន្ននេះជាពិសេសអ្នកដែលទើបរៀបការហើយថ្មីថ្មោង។
លោកច្រឹក សុខនីមបន្តទៀតថា បច្ចុប្បន្នសន្ទុះ នៃការវិនិយោគលើវិស័យលំនៅ ដ្ឋានមួយនេះ ភាគច្រើនតាមតំបន់ជាយក្រុងនៅឡើយ ព្រោះតំបន់ទាំងនោះទើបតែចាប់ផ្តើមរីកចម្រើន និងផ្ដើមអភិវឌ្ឍបន្តចេញពីក្រុង ដូច្នេះតម្លៃដីនៅមានកម្រិត ដែលអាចផ្តល់ឱកាសចំណេញដល់អ្នកវិនិយោគក្នុងពេលដ៏ខ្លី។
លោកថា “វិស័យលំនៅដ្ឋានកម្រិតមធ្យម និងក្រោមមធ្យម ផ្តល់ភាពល្អប្រសើរទាំងសងខាង អ្នកវិនិយោគមានឱកាសច្រើនក្នុងការទទួលបានចំណេញ ហើយអ្នកទិញអាចមានលទ្ធភាពទទួលបានលំនៅដ្ឋានស្នាក់នៅសមរម្យ”៕
