ដោយៈ រ៉ាណេត
ភ្នំពេញៈ ទេសចរណ៍ ជាវិស័យមួយដ៏សំខាន់សម្រាប់ពង្រឹក និងជំរុញកំណើនសេដ្ឋកិច្ចជាតិឱ្យមានភាពល្អប្រសើរ ខណៈដែលគ្រប់បណ្តាប្រទេសនានា នៅលើសាកលលោក បាននិងកំពុងផ្តោតការយកចិត្តទុកដាក់ លើកស្ទួយវិស័យមួយនេះ ឱ្យមានភាពរស់រវើក។
ស្ទើរតែគ្រប់បណ្តាអ្នកទេសចរនានា ដែលធ្វើដំណើរកម្សាន្តឆ្លងប្រទេស ឆ្លងតំបន់ គឺសុទ្ធតែមានគោលបំណង់សំខាន់របស់ខ្លួន បន្ថែមពីលើដំណើរកម្សាន្ត ដែលក្នុងនោះរួមមានដូចជា ស្វែងយល់ពីកត្តាភូមិសាស្ត្រ និងសេដ្ឋកិច្ច ការសិក្សាពីស្ថានភាពអាជីវកម្ម ក៏ដូចជាស្វែងយល់ពីឱកាសវិនិយោគនានាផងដែរ។
ប្រធានសមាគមទេសចរណ៍អាស៊ីប៉ាស៊ីហ្វិក-កម្ពុជា លោក ធួន ស៊ីណាន បានមានប្រសាសន៍កាលចុងសប្ដាហ៍មុនថា មិនមែនសម្រាប់តែប្រទេសកម្ពុជានោះទេ ដែលផ្តោតយ៉ាងសំខាន់ និងយកចិត្តទុកដាក់ខ្ពស់ ទៅលើការពង្រឹងសក្ដានុពល នៃវិស័យទេសចរណ៍ ពោលគឺគ្រប់បណ្តាប្រទេសនានា នៅលើសាកលលោក គឺសុទ្ធតែចាត់ទុកវិស័យមួយនេះ ជាវិស័យអាទិភាពក្នុងការពង្រឹងកំណើនសេដ្ឋកិច្ចជាតិ។
លោកបន្តថា “អ្នកទេសចរគឺជាអ្នកដែលមានលុយ ដូច្នេះរាល់ដំណើរកម្សាន្តរបស់ពួគគេ គឺសុទ្ធតែមានគោលបំណង និងគោលដៅសំខាន់ ដែលអាចទាក់ទងទៅនឹងមុខជំនួញ ឬការងាររបស់ពួកគេ ដែលវាមិនត្រឹមតែជាដំណើរកម្សាន្ត សប្បាយភ្នែកតែមួយមុខនោះទេ”។
លោកបានបន្តទៀតថា “គេចង់ដឹងពីភាពរីកចម្រើនរបស់ប្រទេស ឬតំបន់ដែលគេទៅ ដើម្បីចង់រកឱកាសពីការវិនិយោគ ក្នុងគោលបំណងទទួលបាននូវផលប្រយោជន៍ខ្ពស់ មិនថាជាការសិក្សាពីទីផ្សារ ដើម្បីយកផលិតផលរបស់ខ្លួនចែកចាយទីលើទីផ្សារគោលដៅ ឬទៅទិញផលិតផលមកធ្វើការចែកចាយបន្ត នៅក្នុងទីផ្សារនៃប្រទេសរបស់ខ្លួន”។
ភ្ញៀវទេសចរ ត្រូវបានគេចាត់ទុកថាជាទូតពាណិជ្ជកម្ម និងសន្តិភាព ដែលមានសារសំខាន់បំផុត នៅក្នុងការជួយពង្រឹង និងពង្រីកកំណើនសេដ្ឋកិច្ចជាតិយ៉ាងសំខាន់ សម្រាប់ប្រទេសនីមួយៗ នៅលើសាកលលោក ហើយថែមទាំងអាស្រ័យផលដល់បណ្តាវិស័យផ្សេងៗជាច្រើនទៀត។
ប្រធានសមាគម PATA រូបនេះបានលើកឡើងថា “បើទេសចរមិនរីកចម្រើន មិនមានកំណើនកើនឡើង តើខេត្តសៀមរាបចាំបាច់ មានកំណើនសណ្ឋាគារដូចសព្វថ្ងៃនេះទេ? តើប្រទេសថៃចាប់សាងសង់ សណ្ឋាគារកម្រិតអន្តរជាតិរាប់ពាន់អគារ រាប់សែនបន្ទាប់ធ្វើអ្វី? តើនៅក្រុងសៃហ្គនប្រទេសវៀតណាម ចាំបាច់កសាងអគារពាណិជ្ជកម្ម និងទេសចរណ៍រាប់សិបកន្លែង ដែលបង្ហាញពីភាពរីកចម្រើន និងអភិវឌ្ឍន៍នោះធ្វើអ្វី ? ជាចម្លើយ គឺសុទ្ធតែបណ្តាល់មកពីទេសចរទាំងអស់”។
លោកបានបញ្ជាក់ថា គ្រាន់តែភាពរីកចម្រើន នៃវិស័យបដិសណ្ឋារកិច្ច ដើម្បីបំពេញតម្រូវការភ្ញៀវទេសចរតែមួយមុខ គឺបានបង្ហាញពីភាពរីកចម្រើននៃវិស័យសំណង់ និងអចលនទ្រព្យរួចជាស្រេច ហើយនៅមានវិស័យផ្សេងៗជាច្រើនទៀត ដែលទទួលបានផលពីវិស័យទេសចរណ៍ ដែលក្នុងនោះរួមមានដូចជា វិស័យកសិកម្ម វិស័យពាណិជ្ជកម្ម ជាពិសេសអាចជួយរឹតបណ្តឹងចំណងមិត្តភាព និងវិស័យការទូតលើផ្នែកនយោបាយរបស់ប្រទេសផងដែរ។
យោងតាមរបាយការណ៍របស់គ្រឹះស្ថានអង្គរ នៅថ្ងៃទី១ ខែធ្នូ ឆ្នាំ២០១៩នេះ បានបញ្ជាក់ថា ក្នុងរយៈពេល១១ខែ ឆ្នាំ ២០១៩នេះ គ្រឹះស្ថានអង្គរបានលក់បណ្ណចូលទស្សនាតំបន់អង្គរបានចំនួន១,៩៩៧,២៦៧នាក់ ធ្លាក់ចុះ១៤.០៣ភាគរយ បើធៀបនឹងរយៈពេលដូចគ្នាឆ្នាំ២០១៨ ដោយទទួលបានចំណូល៨៩,៥៥៥,៤៧៤ ដុល្លារ អាមេរិក ធ្លាក់ចុះ ១៤.៣២ ភាគរយ។
ប៉ុន្តែបើគិតតែក្នុងរយៈពេល១ខែវិច្ឆិកា ឆ្នាំ២០១៩ គ្រឹះស្ថានអង្គរបានលក់បណ្ណជូនភ្ញៀវចំនួន១៩៣.២៦០ នាក់ ធ្លាក់ចុះ ១៧.១០ភាគរយ បើធៀបនឹងខែដូចគ្នាឆ្នាំ២០១៨ ដោយទទួលបានចំណូល៨,៨៥៤,១៩០ ដុល្លារអាមេរិក ធ្លាក់ចុះ១៦.៤៧ភាគរយ៕
