ដោយ ប៊ី
កំពត៖ ខេត្តកំពតបានដាក់ផែនការជំរុញឱ្យស្ថាប័ន និងអាជ្ញាធរពាក់ព័ន្ធ ត្រូវបង្កើនថែមទៀត ពាក់ព័ន្ធលើបញ្ហាសណ្ដាប់ធ្នាប់ សោភ័ណភាព និងអនាម័យ នៅក្នុងក្រុងកំពតសម្រាប់ត្រៀមរៀបចំខ្លួនបម្រើដល់សកម្មភាពនូវព្រឹត្តិការណ៍ពិធីបុណ្យសមុទ្រ និងព្រឹត្តិការណ៍ទេសចរណ៍ធំៗ ប្រចាំឆ្នាំមួយចំនួនទៀត ប្រកបដោយភាពជោគជ័យ។
ការដាក់ផែនការ និងជំរុញបែបនេះធ្វើឡើងនៅថ្ងៃទី១១ ខែធ្នូ ឆ្នាំ២០១៩ ខណៈឯកឧត្តម អភិបាលខេត្ត ដឹកនាំមន្ត្រីនៃមន្ទីរ អង្គភាព ស្ថាប័ន និងអាជ្ញាធរដែលពាក់ព័ន្ធ ចុះត្រួតពិនិត្យការពាក់ព័ន្ធ បញ្ហាសណ្ដាប់ធ្នាប់ សោភ័ណភាព និងអនាម័យតាមដងផ្លូវ នៅជុំវិញក្នុងក្រុងកំពត។ ព្រឹត្តិការណ៍ពិធីបុណ្យសមុទ្រនឹងចាប់ពីថ្ងៃទី២០ ដល់ ២២ ខែធ្នូ ឆ្នាំ២០១៩។
លោក ជាវ តាយ អភិបាលខេត្តកំពត ក៏បានបញ្ជាក់ថា ពេលវេលានៃការរៀបចំព្រឹត្តិការណ៍ពិធីបុណ្យសមុទ្រ លើកទី៨ ជុំទី២ ដែលខេត្តកំពត ត្រូវបានធ្វើជាម្ចាស់ផ្ទះ នៅប៉ុន្មានថ្ងៃទៀត ឆាប់ៗខាងមុខនេះហើយ បើគិតត្រឹមថ្ងៃទី១១ ខែធ្នូ ឆ្នាំ២០១៩នេះ ពេលវេលាមានត្រឹមតែ រយៈពេលប្រមាណ ៩ថ្ងៃទៀតប៉ុណ្ណោះ។
ទន្ទឹមនេះឯកឧត្តម អភិបាលខេត្ត ក៏បានណែនាំដល់ចៅសង្កាត់ និងអភិបាលក្រុង រួមនិងមន្ទីរ អង្គភាពជំនាញពាក់ព័ន្ធទាំងអស់ ត្រូវតែបង្កើនស្មារតីយកចិត្តទុកដាក់ទទួលខុសត្រូវខ្ពស់ អំពីតួនាទីភារកិច្ច របស់ខ្លួនតាមមុខសញ្ញាបន្ថែមទៀត។
ពិសេសអាជ្ញាធរក្រុង សង្កាត់ ទាំងប្រាំត្រូវតែបង្កើនការយកចិត្តទុកដាក់ សហការគ្នាដោយទទួលខុសត្រូវឱ្យបានសស្រាក់សស្រាំទាំងអស់គ្នា បន្ថែមទៀត លើការងារកែលម្អសោភ័ណ្ឌភាព សណ្ដាប់ធ្នាប់សាធារណៈ និងអនាម័យបរិស្ថានក្រុង។
ការងារដែលត្រូវយកចិត្តទុកដាក់សំខាន់ថែមទៀតដែរនោះ គឺអាជ្ញាធរក្រុង សង្កាត់ ក៏ត្រូវយកចិត្តទុកដាក់ ក្នុងចលនាបំផុសផ្សព្វផ្សាយប្រកាស តាមរយៈមធ្យោបាយផ្សេងៗ ដល់មហាជន ប្រជាជន ក៏ដូចសាធារណៈជនទូទៅ ឱ្យបានយល់ជ្រួតជ្រាបទទួលដឹង ដើម្បីចូលរួមអនុវត្ត និងលើកកម្ពស់ទាំងអស់គ្នា ពីបញ្ហាសោភ័ណភាព សណ្ដាប់ធ្នាប់សាធារណៈ និងអនាម័យបរិស្ថាន ក្នុងក្រុងកំពតឱ្យបានល្អប្រសើរឡើង ព្រោះថាការងារជោគជ័យ ត្រូវតែមានការចូលរួមឱ្យបានព្រមគ្នា មិនថាឡើយថ្នាក់ដឹកនាំមន្ត្រីរាជការ ឬប្រជាពលរដ្ឋឡើយ ទើបការងារទាំងអស់នោះទទួលបានលទ្ធផលជោគជ័យល្អប្រសើរ៕
