ដោយៈ រ៉ាណេត
កំពតៈ ជាការត្រៀបខ្លួនទទួលស្វាគមន៍ បណ្តាភ្ញៀវទេសចរចម្រុះជាតិសាសន៍នានា ក្រោមអធិបតីដ៏ខ្ពង់ខ្ពស់របស់សម្ដេចតេជោ ហ៊ុន សែន នៅក្នុងមហាព្រឹត្តិការណ៍បុណ្យសមុទ្រជុំទី២ រដ្ឋបាលខេត្តកំពតបានកំណត់ថ្ងៃបញ្ចប់ការស្ថាបនា និងរៀបចំតុបតែងលម្អហេដ្ឋារចនាស្មព័ន្ធនានានៅទូទាំងក្រុង យ៉ាងយូរបំផុតត្រឹមថ្ងៃទី១៨ ខែធ្នូ ឆ្នាំ២០១៩ខាងមុខនេះជាកំហិត។
ក្រោមការចង្អុលបង្ហាញពីសំណាក់រដ្ឋមន្ត្រីក្រសួងទេសចរណ៍ លោក ថោង ខុន រដ្ឋបាលខេត្តកំពត ក្រោមការដឹកនាំដោយផ្ទាល់ពីសំណាក់លោកជាវ តាយ អភិបាលខេត្តកំពត បានចុះពិនិត្យមើលការកែលម្អសោភ័ណភាព នៅទូទាំងក្រុងកំពត និងមានអមដំណើរដោយអភិបាលក្រុង ចៅសង្កាត់ និងមន្ត្រីមន្ទីរទេសចរណ៍ផងដែរកាលពីរសៀលថ្ងៃទី១១ខែធ្នូ ឆ្នាំ២០១៩កន្លងមកនេះ។
លោក ជា តាយ អភិបាលនៃគណៈអភិបាលខេត្តកំពតបានជំរុញ និងតម្រូវឱ្យកែលម្អឡើងវិញលើចំណុចសំខាន់ៗមួយចំនួន រួមមាន ទី១ ការរៀបចំបំពាក់អំពូលភ្លើងបន្ថែមតាមបណ្តោយផ្លូវ នៃបញ្ជាការដ្ឋានតំបន់ប្រតិបត្តិការសឹករងខេត្ត និងមន្ទីរធនធាននទឹក និងឧតុនិយមខេត្តកំពត។
ទី២ កាត់ស្លាកយីហោ និងកែសម្រួលតាមដងផ្លូវជាតិលេខ៣ រហូតដល់ចំណុចផ្លូវវាងក្រុង។ ទី៣បន្តសម្អាតបរិស្ថានជុំវិញក្រុង លើអគារ និងការដ្ឋានកំពុងសាងសង់។ ទី៤ប្តូរ ឬដកចេញនូវប៉ាណូផ្សព្វផ្សាយផ្សេងៗរបស់ម្ចាស់ក្រុមហ៊ុន សហគ្រាស ក៏ដូចជាហាងលក់ទំនិញផ្សេងៗ។
ទី៥.ជួលជុលរ៉ឺហ្កា គម្របលូឲ្យបានប្រសើរឡើងវិញ។ ទី៦ រៀបចំបន្តចាក់បេតុងលើចំណុចទីលានស្តូបព្រះបាទអង្គឌួង និងបូមខ្សាច់ចាក់ទប់ច្រាំង១០ម៉ែត្រ ឲ្យបានរួចរាល់។
ទី៧ រៀបចំប្រព័ន្ធលូបង្ហូរទឹកនៅស្តង់ វិថីម្ហូបអាហារឲ្យបានមុនថ្ងៃទី១៨ ខែធ្នូ ឆ្នាំ២០១៩ជាកំហិត។ ទី៨រៀបចំចាត់ចែងលាបបពណ៌បង្គោលភ្លើងចាស់ទាំង១២ ស្ថិតនៅតាមបណ្តោយដងព្រែកពីគល់ស្ពានថ្មីមកដល់មុខសាលាខេត្តជាដើម។
លោកជាវ តាយ ក៏បានណែនាំដល់អាជ្ញាធររក្រុង និងសង្កាត់ត្រូវចុះណែនាំដល់អាជីវករទាំងអស់ បន្តសហការកែលម្អឲ្យបានចប់សព្វគ្រប់ មុនពិធីបុណ្យសមុទ្រ នាថ្ងៃទី២០ ខែធ្នូ ឆ្នាំ២០១៩ ចូលមកដល់៕
