ដោយ វុត្ថា
ភ្នំពេញ៖ ក្រសួងរៀបចំដែនដី នរូបនីយកម្ម និងសំណង់បាន ផ្តល់លិខិតអនុញ្ញាតបើកការដ្ឋានសាងសង់ បានចំនួន១ ៨៥៣គម្រោង ផ្តល់លិខិតអនុញ្ញាតបិទការដ្ឋានសាងសង់ចំនួន៧១៣គម្រោង និង ផ្តល់លិខិត អនុញ្ញាតជួសជុលចំនួន១៧៩គម្រោង ។ នេះ បើយោងតាមរបាយការណ៍ក្រសួងរៀបចំដែនដីនគរូបនីយកម្ម និងសំណង់ដែលទទួលបាននៅថ្ងៃ ១៥ ខែធ្នូ ឆ្នាំ ២០១៩ កន្លងមកនេះ។
របាយការណ៍ដដែលបន្តថា ក្រសួងរៀបចំដែនដីនគរូបនីយកម្ម និងសំណង់ ក៏បានចុះបញ្ជីក្រុមហ៊ុន ក្នុងស្រុកចំនួន២២៨ក្រុមហ៊ុន ក្នុងនោះក្រុមហ៊ុន សាងសង់ចំនួន២១៥ក្រុមហ៊ុន និងក្រុមហ៊ុនសិក្សាគម្រោងប្លង់ចំនួន១៣ក្រុមហ៊ុ និងបានចុះបញ្ជីក្រុមហ៊ុនបរទេសចំនួន២៤០ក្រុមហ៊ុន ដែលក្នុងនោះក្រុមហ៊ុនសាងសង់២៣០ក្រុមហ៊ុន និងក្រុមហ៊ុនសិក្សាគម្រោងប្លង់ ចំនួន១០ក្រុមហ៊ុន។
របាយការណ៍បានបន្ថែមថា ដោយឡែក បើគិតចាប់តាំងពី ឆ្នាំ ២០០០ ដល់ខែវិច្ឆិកា ឆ្នាំ ២០១៩ ការចុះបញ្ជីក្រុមហ៊ុន ប្រកប អាជីវកម្ម សិក្សាគម្រោង ប្លង់ និង សាងសង់បានចំនួន២ ៥៩៨ ក្រុមហ៊ុន នៅមានសុពលភាព ចំនួន១ ០៨១
ក្រុមហ៊ុន។
លោកជា សុផារ៉ា ឧបនាយករដ្ឋមន្រ្តី រដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់ ធ្លាប់បានឱ្យដឹងថា ទុនវិនិយោគក្នុងវិស័យសំណង់នៅក្នុងឆ្នាំនេះ មានចំនួន ៩៣០០លានដល្លារ កើនឡើងប្រមាណ៧៨ភាគរយ បើធៀបនឹងឆ្នាំមុន ដោយភាកច្រើនកើនឡើងនៅក្នុងខេត្តព្រះសីហនុ។
លោកឧបនាយករដ្ឋមន្ត្រីបន្តថា ទាំងនេះគឺដោយសារមានការជឿរជាក់លើការអភិវឌ្ឍន៍ រីកចម្រើនសេដ្ឋកិច្ចជាតិ និងស្ថេរភាពនយោបាយរបស់កម្ពុជា ជាពិសេសក្រោមកិច្ច ដឹកនាំរបស់ សម្តេចអគ្គបហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា។
យោងតាមរបាយការណ៍ក្រសួងដែនដី នគរូបនីយកម្ម និងសំណង់ឆ្នាំ២០១៨ បានឱ្យដឹង ទិន្នន័យសំណង់ទូទាំងប្រទេសក្នុងឆ្នាំ២០១៨ មានចំនួន ៣,២៩០ គម្រោង មានផ្ទៃក្រឡាចំនួន១២,៣៧៨,១១៩ម៉ែត្រការ៉េ ដែលមានតម្លៃប៉ាន់ស្មាន ទុនវិនិយោគប្រមាណ ៥,៧៥៥,០៧០,១២០ ដុល្លារ ៕
