ដោយ ៖ រ៉ាណេត
ភ្នំពេញ ៖ ការបង្កើតជាក្រុមហ៊ុនភ្នាក់ងារលក់អចលនទ្រព្យ មិនពិបាកទេ ប៉ុន្តែដើម្បីជំរុញឱ្យក្រុមហ៊ុនទទួលបានជោគជ័យ គឺមិនមែនជារឿងសាមញ្ញពេកនោះទេ បើទោះជាការខិតខំ និងព្យាយាមត្រូវបានធ្វើយ៉ាងពេញទំហឹងក៏ដោយ។
លោក ថេង ចាន់ថន ៖ ចង់បង្កើតក្រុមហ៊ុនភ្នាក់ងារលក់អចលនទ្រព្យជោគជ័យត្រូវតែព្យាយាមអនុវត្តទាំង៤ចំណុច
ជាការចែករំលែកនូវចំណេះដឹង និងបទពិសោធន៍ផ្ទាល់ខ្លួន លោក ថេង ចាន់ថន អគ្គនាយកក្រុមហ៊ុនអចលនទ្រព្យ PAPA & MAMAReal Estate Co.,Ltd បានលើកឡើងថា ចង់ឱ្យក្រុមហ៊ុនភ្នាក់ងារលក់ទទួលបានជោគជ័យ គឺត្រូវព្យាយាមដោយភាពស្មោះត្រង់ ជាមួយនឹងការអនុវត្តនូវចំណុចសំខាន់ៗទាំង៤ខាងក្រោមនេះ ។
លោក ថេង ចាន់ថន ដែលកំពុងមានភាពជោគជ័យលើការលក់គម្រោងអគារធំៗ ដែលមានតម្លៃរាប់សិបលានដុល្លារនាពេលបច្ចុប្បន្ននេះ បានមានប្រសាសន៍ប្រាប់ថា គ្រប់កិច្ចការទាំងអស់ មិនថាចំពោះតែមុខជំនួញផ្ទាល់ខ្លួន ឬកិច្ចសហការគ្នាដើម្បីផលប្រយោជន៍នោះទេ ភាពស្មោះត្រង់ ភាពមានការទទួលខុសត្រូវ និងការបង្កើតបណ្តាញការងារគឺមានសារៈសំខាន់ ដើម្បីកំណត់ភាពជោគជ័យក្នុងការងាររបស់ខ្លួន។ បន្ថែមពីនេះ ក៏ត្រូវតែអនុវត្តនូវចំណុចសំខាន់ៗខាងក្រោមនេះផងដែរ។
ការទទួលបានអាជ្ញាប័ណ្ណ
ការបង្កើតជំនួញមួយ មិនមែនចេះតែធ្វើនោះទេ តែត្រូវមានក្រុមហ៊ុនមួយ ដែលត្រូវតែមានអាជ្ញាប័ណ្ណច្បាស់លាស់ មានការទទួលស្គាល់ត្រឹមត្រូវពាក់ព័ន្ធនឹងផ្លូវច្បាប់ ព្រោះអាជ្ញាប័ណ្ណមានសារៈសំខាន់ណាស់ដើម្បីផ្តល់ទំនុកចិត្តដល់អតិថិជន និងក្រុមហ៊ុនដៃគូរបស់ខ្លួន។ លើសពីនេះ ក្រុមហ៊ុនភ្នាក់ងារនេះ ត្រូវរៀបចំខ្លួនឱ្យបានរៀបរយ មានរបៀប ស័ក្ដិសមជាក្រុមហ៊ុន ដែលអាចឱ្យអតិថិជនជឿទុកចិត្តបាន។
ការបង្កើតក្រុម និងបណ្តាញ
បើចង់ទៅលឿន ត្រូវដើរម្នាក់ឯង តែបើចង់ទៅមុខដោយជោគជ័យនិងប្រកបដោយនិរន្តរភាព ត្រូវធ្វើជាក្រុម។ ការងារជាក្រុម និងការបង្កើតបណ្តាញជំនួញជាការងារមួយ ដែលមិនអាចមើលរំលងបាន ដើម្បីពង្រីកការផ្សព្វផ្សាយពីផលិតផលរបស់ខ្លួន និងអាចរួមចំណែកជួយគ្នាទៅវិញទៅមកនៅក្នុងក្រុម។
ការបង្កើតបណ្តាញផ្សព្វផ្សាយពីក្រុមហ៊ុន ពីផលិតផលរបស់ខ្លួនតាមរយៈបច្ចេកវិទ្យា ជារឿងដែលមិនអាចរំលងបាននោះឡើយ។ បច្ចុប្បន្នបច្ចេកវិទ្យាកំពុងដើរតួនាទីយ៉ាងសំខាន់ ក្នុងវិស័យជំនួញ ព្រោះបច្ចេកវិទ្យា កំពុងមានការពេញនិយមនៅលើពិភពលោក។
ហេតុនេះការមានគេហទំព័រ ឬគណនីផេកផ្ទាល់ខ្លួន ដើម្បីពង្រីកការផ្សព្វផ្សាយផលិតផលរបស់ខ្លួន ពិតជាមានសារៈសំខាន់មិនអាចខ្វះបានក្នុងការឆ្ពោះទៅមុខ។
ធ្វើទីផ្សារដោយខ្លួនឯង
លោក ថេង ចាន់ថន បានមានប្រសាសន៍ថា គ្មានអ្នកណាធ្វើទីផ្សារជំនួសយើងបាននោះទេ ទីផ្សារនៅទីនេះសំដៅលើការបង្កើនកិត្យានុភាពរបស់ក្រុមហ៊ុន ឬធ្វើឱ្យក្រុមហ៊ុនរបស់យើងមានការទទួលស្គាល់ទូលំទូលាយក្នុងស្រទាប់មហាជន និងអតិថិជនគោលដៅ។
ហេតុនេះម្ចាស់ក្រុមហ៊ុន ភ្នាក់ងារអចលនវត្ថុ ឬក្រុមហ៊ុនជំនួញផ្សេងទៀត ត្រូវបង្កើតកាលវិភាគសម្រាប់ការស្វែងរកព័ត៌មាននិងអតិថិជន ចូលរួមជួយដល់ការងារក្នុងសហគមន៍។ រក្សាទំនាក់ទំនងល្អជាមួយអតិថិជនចាស់ ព្រោះ 75ភាគរយនៃអាជីវកម្មសម្រាប់ក្រុមហ៊ុនទិញ លក់អចលនទ្រព្យជាទូទៅបានមកពីការណែនាំតៗគ្នា។ក្នុងនាមជាអ្នកលក់អចលនទ្រព្យ ការលក់ខ្លួនឯងបានសម្រេចគឺជារឿងសំខាន់បំផុត។
ធ្វើជាអ្នកសិក្សាពេញមួយជីវិត
មនុស្សជោគជ័យ មិនដែលបញ្ចប់ការសិក្សានោះឡើយ ព្រោះការបញ្ចប់ការសិក្សាមានន័យថា ធ្វើឱ្យខ្លួនឯងក្រិនចំណេះ លែងចង់ដើរទៅមុខទៀត ហេតុនេះ អ្វីដែលត្រូវធ្វើគឺការសិក្សាបន្ថែមពាក់ព័ន្ធនឹងវិស័យអចលនទ្រព្យ រាប់ទាំងឯកសារ ការទទួលយកបទពិសោធន៍ពីមនុស្សជុំវិញខ្លួន និងការស្វែងយល់បន្ថែមដោយខ្លួនឯងជាមួយមនុស្សនៅក្នុងវិស័យអចលនទ្រព្យ ។ ប្រសិនបើអ្នកអនុវត្តចំណុចទាំងអស់នេះបាន នោះក្រុមហ៊ុនរបស់អ្នកនឹងទទួលបានភាគរយជោគជ័យខ្ពស់៕
