ដោយ វល័ក្ខ
ភ្នំពេញ៖ ក្រុមហ៊ុន Prestige Homes Cambodia បានរៀបចំ និងប្រារព្ធពិធីបុណ្យណូអែលដ៏ពិសេសមួយសម្រាប់កុមារក្រខ្សត់ជាង៥០០នាក់ នៅភោជនីយដ្ឋាន និងផ្ទះបាយកុមារ LRDE។
ក្រុមហ៊ុន Prestige Homes Cambodia ចែករំលែកក្ដីស្រឡាញ់ ដោយផ្តល់អំណោយដល់កុមារជាង ៥០០នាក់ ក្នុងថ្ងៃបុណ្យណូអែល
លោកបណ្ឌិត Raymond Choi ជាប្រធានក្រុមហ៊ុន Prestige Homes Cambodia បានមានប្រសាសន៍ថា “ទោះបីជាពួកយើងមានភាពមមាញឹកក្នុងការរៀបចំព្រឹត្តិការណ៍របស់ក្រុមហ៊ុនយ៉ាងណាក៏ដោយ ក៏ពួកយើងនៅតែបំពេញបេសកកម្មរបស់ពួកយើងក្នុងការរៀបចំកម្មវិធីសប្បុរសធម៌ ដើម្បីជួយដល់កុមារជាច្រើនរយនាក់ដែលកំពុងតែជួបភាពខ្វះខាត ហើយម្យ៉ាងទៀត ក៏ដូចជាលើកទឹកចិត្តក្រុមហ៊ុនដទៃទៀតឲ្យចូលរួមកម្មវិធីសប្បុរសធម៌ជាមួយគ្នា ដែលទង្វើដ៏ល្អមួយនេះ គឺឆ្លុះបញ្ចាំងឲ្យឃើញពីការចែករំលែកក្តីស្រលាញ់ទៅកាន់មនុស្សគ្រប់រូប និងការយកចិត្តទុកដាក់យ៉ាងខ្លាំងនៅក្នុងសង្គមដែលយើងកំពុងរស់នៅផងដែរ”។
លោកបានបន្តទៀតថា ” ក្រុមហ៊ុន Prestige Homes Cambodia បានផ្តោតសំខាន់យ៉ាងខ្លាំងទៅលើការងារក្នុងសង្គម ហើយក៏តែងតែលើកទឹកចិត្តដល់បុគ្គលិកទាំងអស់ឱ្យចូលរួមគ្រប់កម្មវិធីសប្បុរសធម៌ផងដែរ។ ម្យ៉ាងវិញទៀត វាគឺជាច្បាប់របស់ក្រុមហ៊ុនដែលអនុញ្ញាតឲ្យបុគ្គលិកទាំងអស់អាចចូលរួមគ្រប់កម្មវិធីសប្បុរសធម៌បានទាំងអស់ក្នុងកំឡុងម៉ោងធ្វើការ។
គោលបំណងដ៏ចម្បងរបស់ពួកយើងនោះគឺ ចង់ឱ្យប្រជាជនគ្រប់រូបមានទម្លាប់ល្អក្នុងការជួយសហគមន៍របស់ខ្លួនដែលកំពុងរស់នៅឱ្យបានកាន់តែច្រើន។ “អ្វីដែលកាន់តែពិសេសនោះគឺ នៅក្នុងឆ្នាំនេះ គឺជាឆ្នាំទី២ហើយ ដែលលោកបណ្ឌិត Raymond Choi បានតុបតែងខ្លួនជាលោកតាណូអែល（Santa Claus) ហើយបានផ្តល់នូវកាដូជាច្រើនទៅកាន់កុមារទាំងនោះ ដែលមានដូចជា អាហារ សម្លៀកបំពាក់ ប្រដាប់ប្រដាក្មេងលេង និងអនុស្សាវរីយជាច្រើន ជាមួយនឹងក្រុមគ្រួសាររបស់គាត់ និង បុគ្គលិកដែលធ្វើការរួមគ្នាទាំងអស់នៅផ្ទះបាយកុមារ LRDE ។
ជាការពិតណាស់ Les Restaurant des Enfants (LRDE) ឬក៏ផ្ទះបាយកុមារ LRDE គឺជាអង្គការដែលមិនស្វែងរកប្រាក់ចំណេញក្នុងស្រុកមួយ ដែលតែងតែផ្តល់អាហារជាប្រចាំថ្ងៃដល់កុមារដែលរស់នៅតាមចិញ្ចើមផ្លូវក្នុងទីក្រុងភ្នំពេញ។
សម្រាប់ពិធីបុណ្យណូអែលក្នុងឆ្នាំ២០១៩ នេះផងដែរ ក្រុមហ៊ុន Prestige Homes Cambodia បានចូលរួមជាមួយនឹងក្រុមសប្បុរសធម៌ជាច្រើន ក្នុងការផ្តល់នូវសេចក្តីស្រលាញ់ និង ការយកចិត្តទុកដាក់ទៅកាន់កុមារដែលរស់នៅផ្ទះបាយកុមារ LRDE ទាំងអស់ជាមួយនឹងស្នាមញញឹមគ្រប់ៗគ្នា។
មិនត្រឹមតែប៉ុណ្ណោះ ក្រុមហ៊ុន Urban Village ក៏បានបរិច្ចាគសម្លៀកបំពាក់ថ្មីៗជាង ៥០០ កំប្លេទៅដល់កុមារដែលរស់នៅផ្ទះបាយកុមារ LRDE ទាំងអស់ផងដែរ។
លោក Russel Tizon ប្រធានគ្រប់គ្រងទូទៅនៃក្រុមហ៊ុន Prestige Homes Cambodia បាននិយាយថា ” រាល់ពេលដែលខ្ញុំឲ្យកាដូទៅកាន់ក្មេងៗទាំងអស់នោះ ដែលពិតជាត្រូវការក្តីស្រលាញ់ និងការយកចិត្តទុកដាក់មនុស្សជុំវិញខ្លួន គឺខ្ញុំតែងតែប្រាថ្នានូវអ្វីដែលពួកគេចង់បាននោះឲ្យក្លាយជាការពិតខ្លាំងណាស់”។
សម្រាប់ក្រុមការងាររបស់ក្រុមហ៊ុន Prestige Homes Cambodia ម្នាក់ក៏បានបញ្ចេញពីអារម្មណ៍ពិតក្នុងការតាំងចិត្តថា គាត់នឹងបន្តចូលរួមក្នុងកម្មវិធីសប្បុរសធម៌នៅលើកក្រោយៗទៀត។
គាត់បាននិយាយថា ” នេះគឺជាលើកទី១របស់នាងខ្ញុំក្នុងការចូលរួមសកម្មភាពមនុស្សធម៌ក្នុងសង្គមបែបនេះ ហើយនាងខ្ញុំពិតជាមានអារម្មណ៍សប្បាយរីករាយណាស់ដែលខ្ញុំបានក្លាយជាធនធានមនុស្សម្នាក់ដែលអាចផ្តល់នូវសុភមង្គលទៅកាន់ក្មេងៗទាំងអស់នោះបាន។
“នាងខ្ញុំនឹងធ្វើស្ម័គ្រចិត្តចូលរួមនៅក្នុងកម្មវិធីសប្បុរសធម៌បែបនេះនៅលើកក្រោយៗទៀត” បើតាមសម្តីរបស់កញ្ញា ចាន់ធា អ្នកប្រឹក្សាផ្នែកលក់ និងជួលអចលនទ្រព្យរបស់ក្រុមហ៊ុន Prestige Home Cambodia។
គួរឱ្យរំលឹកផងដែរថា ក្រុមហ៊ុន Prestige Homes Cambodia, ដែលជាភ្នាក់ងារអចលនទ្រព្យឈានមុខគេនៅក្នុងព្រះរាជាណាចក្រកម្ពុជាធ្លាប់បានឈ្នះពានរង្វាន់ ” ភ្នាក់ងារអចលនទ្រព្យដ៏ល្អបំផុតក្នុងប្រទេសកម្ពុជា” នៅក្នុងកម្មវិធីប្រគល់ពានរង្វាន់ Squarefoot Best of the Best លើកទី១០ ក្នុងឆ្នាំ២០១៩ ផងដែរ៕
