ដោយ ៖ រ៉ាណេត
ភ្នំពេញ ៖ ចាកចេញពីតំបន់ជាយក្រុងបន្តិច នៅប៉ែកខាងជើងរាជធានីភ្នំពេញ ដែលស្ថិតតំបន់សងខាងផ្លូវជាតិលេខ៥ បច្ចុប្បន្ននេះត្រូវបានគេមើលឃើញថា កំពុងតែចាប់ផ្តើមបង្ហាញពីភាពទាក់ទាញលើការវិនិយោគ ជាមួយនឹងគម្រោងអភិវឌ្ឍធំៗជាច្រើន ដែលនឹងប្រែក្លាយទៅជាតំបន់ឧស្សាហកម្ម និងទេសចរណ៍ ស្របពេលដែលហេដ្ឋារចនាសម្ព័ន្ធសំខាន់ៗត្រូវបានរដ្ឋាភិបាលកំពុងយកចិត្តទុកដាក់ស្ថាបនាសាងសង់។
បន្ទាប់ពីតំបន់ជាយក្រុងមួយចំនួន ដែលស្ថិតនៅតាមបណ្តាយផ្លូវជាតិលេខ១ លេខ២ លេខ៣ លេខ៤ និងផ្លូវជាតិលេខ៦ ដែលកំពុងមានសកម្មភាពទិញ លក់ និងអភិវឌ្ឍលើគម្រោងជាច្រើននោះ ពេលនេះបានបន្តជំរុញដល់ផ្លូវជាតិលេខ៥ ដែលស្ថិតនៅសង់ខាងផ្លូវចាប់ពីតំបន់ទីប្រជុំជនផ្សារឧដុង្គ ឆ្ពោះទៅកាន់ផ្សារលង្វែក ។
អគ្គនាយកក្រុមហ៊ុន អចលនទ្រព្យ Hin Ruos Real Estate Co Ltd លោក ហ៊ិន រស់ បានមានប្រសាសន៍ថា បច្ចុប្បន្ននេះមិនថាចំពោះតែតំបន់ដែលស្ថិតនៅជាប់ផ្លូវជាតិលេខ៥ ដែលជាតំបន់ជាយក្រុងនោះទេ នៅតាមចម្ងាយរហូតដល់ប្រមាណជាង ៤០គីឡូម៉ែត្រពីរាជធានីភ្នំពេញ ក៏កំពុងតែមានតម្រូវការទីផ្សារផងដែរ ដែលភាគច្រើនមានសក្ដានុពលទៅលើវិស័យឧស្សាហកម្ម រួមមានដូចជារោងចក្រ សហគ្រាស ឃ្លាំង និងតំបន់កម្សាន្ត ខណៈដែលរដ្ឋាភិបាល កំពុងតែជំរុញ និងពន្លឿនការស្ថាបនា និងពង្រីកផ្លូវជាតិ៥ឱ្យកាន់តែធំ ដើម្បីបង្កភាពងាយស្រួលដល់ការធ្វើដំណើរ និងបម្រើវិស័យដឹកជញ្ជូនឆ្ពោះទៅកាន់ច្រកព្រំដែនកម្ពុជា-ថៃ”។
ជាមួយនឹងគម្រោងប្រែក្លាយពីតំបន់វាលស្រែល្វឹងល្វើយឱ្យទៅជាសួនឧស្សាកម្មចំរុះនៅពេលដ៏ខ្លីខាងមុខនេះ លោក ហ៊ិន រស់ បានបញ្ជាក់ប្រាប់ថា ដោយសារតែការវិវត្តយ៉ាងលឿនទៅលើតម្រូវការទីផ្សារដីធ្លីសម្រាប់អភិវឌ្ឍ បច្ចុប្បន្នបានធ្វើឱ្យអ្នកវិនិយោគ និងអភិវឌ្ឍលើគម្រោងធំៗជាច្រើនចាប់អារម្មណ៍ទៅនឹងទីតាំងដែលស្ថិតនៅក្បែរផ្លូវជាតិលេខ៥ ជាពិសេសទីតាំងដែលមានចម្ងាយចាប់ពីប្រមាណ ៣-៥ គីឡូម៉ែត្រពីផ្លូវជាតិ ដោយសារតែតម្លៃដីនៅមានកម្រិត និងមានឱកាសចំណេញច្រើនក្នុងពេលខ្លី។
ដូចទៅនឹងការលើកឡើងខាងលើនេះ បច្ចុប្បន្នគេឃើញមានគម្រោងអភិវឌ្ឍជាច្រើនកំពុងបង្ហាញវត្តមានជាបន្តបន្ទាប់។ នៅក្នុងចំណោមគម្រោងទាំងនោះ គម្រោងដីឡូតិ៍លំនៅដ្ឋាន និងកសិកម្ម ចំការដូងក្រអូប ត្រូវបានគេសម្លឹងឃើញថាកំពុងតែទទួលបានការចាប់អារម្មណ៍យ៉ាងពីសំណាក់អតិថិជន ជាពិសេសអ្នកដែលចង់មានលំនៅដ្ឋានបែបកម្សាន្តលក្ខណៈធម្មជាតិ។
សម្រាប់ដីឡូតិ៍នៅក្នុងគម្រោងចំការដូងក្រអូប មានទំហំ ៤០ x៤០ ម៉ែត្រ លក់ក្នុងម្លៃត្រឹម ១៧,០០០ ដុល្លារ ដោយនៅក្នុងបរិវេណដីមានដាំដំណាំដូងក្រអូបចំនួន៨០ដើម រួមនឹងដំណាំផ្សេងៗទៀត អភិវឌ្ឍន៍នៅលើផ្ទៃដីសរុបជិត ៣០ហិកតា។
គម្រោងនេះស្ថិតនៅភូមិស្ពានដែក ឃុំធ្លកវៀន ស្រុកសាមគ្គីមានជ័យ ខេត្តកំពង់ឆ្នាំ ចម្ងាយជាង៤០ គីឡូម៉ែត្រពីរាជធានីភ្នំពេញ មានផ្សារចំនួន៤ស្ថិតនៅក្បែរ ដូចជា ផ្សារឧដុង្គ ផ្សារត្រាច ផ្សារលង្វែក និងផ្សារសាលាលេខ៥ និងស្ថិតនៅជិតព្រលានយន្តហោះឧដុង្គ ចុះពីផ្លូវជាតិលេខ៥ ចម្ងាយប្រមាណ៥គីឡូម៉ែត្រ ដែលគ្រោងនឹងចាក់កៅស៊ូនៅឆ្នាំ២០២០ ខាងមុខ បង្កើតតំបន់សេដ្ឋកិច្ចពិសេស។
ដោយឡែកសម្រាប់ពត៌មានលម្អិតពីគម្រោងនេះ អាចទំនាក់ទំនងតាមរយៈទូរស័ព្ទលេខ ០១៥ ៧៨០ ៨៨៨/ ០៧៧ ៣៣៣ ៧៤៤ លោកឧកញ៉ា តេង រិទ្ធី អគ្គនាយកក្រុមហ៊ុនអចលនទ្រព្យ R Investment Group បានមានប្រសាសន៍ថា តម្រូវការទីផ្សារដីធ្លីនៅតាមតំបន់ផ្លូវជាតិលេខ៥ គឺអាស្រ័យទៅតាមតំបន់។
លោកបានបញ្ជាក់ថា “ជាក់ស្ដែងនៅពេនេះ ចាប់ពីព្រែកព្នៅរហូតដល់ជិតភ្នំឧដុង្គ ដែលជាតំបន់ជាយក្រុងនៅមិនទាន់មានតម្រូវខ្លាំងនោះទេ ដោយសារតែស្ថានភាពដីមានជម្រៅជ្រៅ ដែលត្រូវចំណាយទុនច្រើនក្នុងការអភិវឌ្ឍ។ ប៉ុន្តែចាប់ពីតំបន់ផ្សារឧដុង្គឆ្ពោះទៅកាន់ផ្សារលង្វែក យើងឃើញមានតម្រូវការផ្នែកឧស្សាហកម្ម និងឃ្លាំង ដែលបច្ចុប្បន្នក៏កំពុងមានដំណើរការផងដែរ”។
លោកបានបន្តទៀតថា “បន្ទាប់ពីហេដ្ឋារចនាសម្ព័ន្ធ ជាពិសេសផ្លូវជាតិលេខ៥ ត្រូវបានបញ្ចប់ការសាងសង់រួចរាល់ តម្រូវ ការដីធ្លីសម្រាប់វិស័យឧស្សាហកម្មនឹងកើនឡើងខ្ពស់ជាក់ជាមិនខាន ដែលជាការអនុគ្រោះដល់អ្នកដែលមានបំណងចង់ទិញដីទុកវិនិយោគដើម្បីទទួលចំណេញនៅថ្ងៃអនាគត”៕
