ដោយម៉ៃ វីរៈ
ព្រះសីហនុៈ រដ្ឋបាលខេត្តព្រះសីហនុ បានស្នើសុំប្រជាពលរដ្ឋដែលនៅសេសសល់មិនទាន់បានរើតូបលក់ដូររបស់ខ្លួន នៅលើឆ្នេរអូឈើទាល ឆ្នេរអូរត្រេះ (អូរត្រេះ ១ និងអូរត្រេះ២) ត្រូវរុះរើតូប រោង និងស្តង់លក់ដូររបស់ខ្លួន ដើម្បីលើកកំពស់សោភ័ណភាព និងទាក់ទាញទេសចរណ៍ជាតិ អន្តរជាតិ។
យោងតាមសេចក្ដីប្រកាសព័ត៌មាន របស់រដ្ឋបាលខេត្តព្រះសីហនុ នៅថ្ងៃទី១៣មករានេះ បានបញ្ជាក់បន្ថែមថា “ក្នុងករណីបងប្អូន មិនអនុវត្តតាមសេចក្ដីជូនដំណឹងនេះ រដ្ឋបាលខេត្ត នឹងអនុវត្តវិធានការរដ្ឋបាលរុះរើ ដោយមិនទទួលខុសត្រូវ ចំពោះការខូចខាតសម្ភារៈ ឬបាត់បង់ ទ្រព្យសម្បត្តិ របស់បងប្អូនឡើយ”។
រដ្ឋបាលខេត្តនឹងមិនអនុញ្ញាត ឱ្យបងប្អូនបន្តលក់ដូរនៅលើឆ្នេរអូរឈើទាល (អតីតអារីស្តុន) និងឆ្នេរអូរត្រេះ (អូរត្រេះ១ និងអូរត្រេះ២) តទៅទៀតឡើយ ដើម្បីទុកលទ្ធភាព ដល់ក្រុមការងារជំនាញរៀបចំ សណ្ដាប់ធ្នាប់ របៀបរៀបរយ កែលម្អសោភ័ណភាពឆ្នេរ រក្សាទុកជាឆ្នេរសាធារណៈ និងជាសម្បត្តិរួមរបស់ប្រជា ពលរដ្ឋខ្មែរទូទៅមកទស្សនាកម្សាន្ត។
នេះជាការជួនដំណឹងជាលើកទីពីរ របស់រដ្ឋបាលខេត្តព្រះសីហនុ សម្រាប់បងប្អូនដែលនៅសេសសល់មិនទាន់បានរុសរើចេញពីតំបន់ឆ្នេរនេះ៕
