ឯកអគ្គរដ្ឋទូតសហរដ្ឋអាមេរិកបង្ហាញពីសុទិដ្ឋិនិយមចំពោះផ្សារទំនើប FURI Times Square នៅក្រុងព្រះសីហនុ

January 15, 2020

ដោយៈ រ៉ាណេត 

ព្រះសីហនុៈ ឯកអគ្គរដ្ឋទូតសហរដ្ឋអាមេរិកប្រចាំកម្ពុជា បានបង្ហាញពីសុទិដ្ឋិនិយម និងគាំទ្រនូវជាមួយនឹងកិច្ចដំណើរការនៃផ្សារទំនើប FURI Times Square ជាមួយនឹងវត្តមានរបស់ក្រុមហ៊ុនកាហ្វេដ៏ល្បីឈ្មោះ របស់អាមេរិក Starbuck នៅជាមួយផងដែរ។

ចុចទីនេះដើម្បី Subscribe Telegram Channel «Property Area Asia» សម្រាប់ទទួលបានព័ត៌មានថ្មីៗ

នៅក្នុងដំណើរទស្សនកិច្ចជាផ្លូវការ ដើម្បីស្វែងយល់ពីស្ថានភាពសេដ្ឋកិច្ចទូទៅ និងការអភិវឌ្ឍវិស័យសំណង់ យ៉ាងឆាប់រហ័សនៅក្នុងខេត្តព្រះសីហនុ កាលពីថ្ងៃទី១៤ ខែមករា ឆ្នាំ២០១៩ ម្សិលមិញនេះ ឯកអគ្គរដ្ឋទូតសហរដ្ឋអាមេរិកប្រចាំកម្ពុជា លោក W. Patrick Murphy បានបង្ហាញពីការសាទរពីភាពរីកចម្រើននៅទូទាំងខេត្ត ជាមួយនឹងសមិទ្ធផលលេចធ្លោប្រចាំក្រុងព្រះសីហនុ ជាក់ស្ដែងដូចជាមជ្ឈមណ្ឌលពាណិជ្ជកម្មធំៗ និងវត្តមានផ្សារទំនើប FURI Times Square ផងដែរ។

នៅក្នុងឱកាសនៃការចូលស្វែងយល់ ពីស្ថានភាពជាក់ស្ដែងពីកិច្ចដំណើរការអាជីវកម្មរបស់ក្រុមហ៊ុនអាមេរិកStarbuck នៅក្នុងផ្សារទំនើបទំនើបដ៏ធំ និងលើកដំបូងប្រចាំនៅក្នុងក្រុងព្រះសីហនុ FURI Times Square លោក W. Patrick Murphy បានមានប្រសាសន៍ថា “ខ្ញុំរីករាយដោយឃើញក្រុមហ៊ុនអាមេរិកមួយ លក់ផលិតផលប្រកបដោយគុណភាពខ្ពស់ ផ្តល់បរិយាកាសការងារល្អ ជាមួយគម្រោងបម្រើសហគមន៍ល្អ នៅក្នុងផ្សារទំនើបដែលមានលក្ខណៈល្អប្រសើរ”។

ជាមួយគ្នានេះលោក ក៏បានបង្ហាញពីការគាំទ្រនូវកិច្ចដំណើរការ របស់ផ្សារទំនើប FURI Times Square ប្រចាំនៅក្នុងក្រុងព្រះសីហនុផងដែរ។

នាយកគ្រប់គ្រងទូទៅនៃហាងកាហ្វេ Starbucks ប្រចាំនៅប្រទេសកម្ពុជា និងឡាវ លោកប៉ោ លីម បានបង្ហាញពីភាពរីករាយ ចំពោះដំណើរទស្សនកិច្ចរបស់លោកឯកអគ្គរដ្ឋទូតសហរដ្ឋអាមេរិកប្រចាំប្រទេសកម្ពុជា នៅក្នុងហាងកាហ្វេ Starbuck ដែលមានទីតាំងនៅក្នុងផ្សារទំនើប FURI Times Squareថា “ខ្ញុំ ក៏ដូចជាបុគ្គលិកទាំងអស់គ្នា ពិតជាមានមោទនភាពមែនទែន ចំពោះវត្តមានរបស់លោក W. Patrick Murphy ដែលជាការបង្ហាញពីកិច្ចគាំទ្រ និងសាទរចំពោះដំណើរការអាជីវកម្ម នៅក្នុងផ្សារទំនើបប្រចាំនៅក្នុងក្រុងព្រះសីហនុ ដែលកំពុងតែមានការអភិវឌ្ឍប្រែក្លាយ ទៅជាមជ្ឈមណ្ឌលពាណិជ្ជកម្មទំនើប”។ លោកបានបន្តទៀតថា “ចាប់តាំងពីដំណើរលក់នៅលើទីតាំងថ្មី នៃក្រុងព្រះសីហនុ Starbuck ទទួលបានកិច្ចគាំទ្រពីសំណាក់អតិថិជនជាតិ និងអន្តរជាតិយ៉ាងច្រើនកុះករ ជាមួយនឹងការរក្សាបាននូវគុណតម្លៃ និងគុណភាពរបស់ Starbuck ”។

នាយិកាផ្នែកទីផ្សារ និងការលក់ ផ្សារទំនើប FURI Times Square កញ្ញា លឹម សុខដាវីន បានប្រាប់ឱ្យដឹងថា បច្ចុប្បន្ននេះ នៅក្នុងផ្សារទំនើប FURI Times Square មានបណ្តាក្រុមហ៊ុនល្បីៗលំដាប់អន្តរជាតិជាច្រើន ដែលកំពុងតែដំណើរការលក់ ដែលក្នុងនោះក្រៅពីក្រុមហ៊ុនអាមេរិក Starbuck នៅមានក្រុមហ៊ុនDakasi Tea ហាងអាហារមកពីប្រទេសសាំងហ្គាពួរ ក្រុមហ៊ុន Amazone Café ក្រុមហ៊ុន KOI ក្រុមហ៊ុនលក់សម្លៀកបំពាក់ LEVI’s ក្រុមហ៊ុន NIKE ក្រុមហ៊ុន Samsonite ក្រុមហ៊ុននាឡិកាដ៏ល្បីឈ្មោះ G-Shock ក្រុមហ៊ុនលក់រថយន្ត HGB Group រួមជាមួយក្រុមហ៊ុនល្បីៗជាច្រើនទៀត ដោយរាប់បញ្ចូលទាំងគ្រឿងសំអាងផងដែរ។

កញ្ញាបានបញ្ជាក់ថា “នៅក្នុងពេលដ៏ខ្លីឆាប់ៗខាងមុខនេះ តាមរយៈផ្សារទំនើប FURI Times Square នឹងនាំមកជូនអតិថិជននូវហាងលក់ផលិតផល ចំណីអាហារ សម្ភារៈប្រើប្រាស់ ដែលមានគុណភាពកម្រិតអន្តរជាតិ រួមជាមួយកម្មវិធីកម្សាន្តៗជាច្រើនទៀត ជាពិសេសបន្ទាប់ពីពិធីបើកសម្ពោធលក់ជាផ្លូវការ នៅពេលឆាប់ៗខាងមុខនេះតែម្ដង”៕