ដោយ ៖ រ៉ាណេត
ព្រុយណេ ៖ វេទិកាទេសចរណ៍អាស៊ានឆ្នាំ២០២១ខាងមុខនេះ កម្ពុជាបានទទួលកិត្តិយសធ្វើជាម្ចាស់ផ្ទះក្នុងការរៀបចំបន្តវេណ ដែលគ្រោងនឹងរៀបចំនៅរាជធានីភ្នំពេញ ចុងខែមករា ឆ្នាំ២០២១ ។
នៅក្នុងពិធីបិទវេទិកាទេសចរណ៍អាស៊ាន២០២០ កាលពីរសៀលថ្ងៃទី១៦ ខែមករា ឆ្នាំ២០២០ ដែលរៀបចំនៅប្រទេសព្រុយណេម្សិលមិញនេះ លោក ថោង ខុន រដ្ឋមន្រ្តីក្រសួងទេសចរណ៍កម្ពុជា និងជាអនុប្រធាននៃកិច្ចប្រជុំផងដែរនោះ បានទទួលស្លាកវេទិកាទេសចរណ៍អាស៊ាន (ATF) ដើម្បីរៀបចំធ្វើជាម្ចាស់ផ្ទះបន្តនៅដើមឆ្នាំ២០២១។
វេទិកាទេសចរណ៍អាស៊ាន២០២១ ដែលគ្រោងនឹងរៀបចំឡើងនៅរាជធានីភ្នំពេញ ចាប់ពីថ្ងៃទី១៧-២៣ ខែមករា ឆ្នាំ២០២១ ក្រោមប្រធានបទ “អាស៊ាន សហគមន៍សន្តិភាព និងអនាគតតែមួយ (ASEAN - A Community of Peace and Shared Future)។ ប្រធានបទនេះត្រូវបានទទួលការគាំទ្រពីប្រទេសសមាជិកអាស៊ានទាំងអស់ ដែលបានបញ្ជាក់ថា វិស័យទេសចរណ៍មិនត្រឹមតែរួមចំណែកដល់ការអភិវឌ្ឍន៍សេដ្ឋកិច្ចសង្គមប៉ុណ្ណោះទេ តែក៏ជាកាតាលិករក្នុងជំរុញវិបុលភាពសម្រាប់អនាគតរីកចម្រើនរួមគ្នា។
ក្នុងសេចក្ដីថ្លែងអំណរគុណ លោក ថោង ខុន បាន កម្ពុជាបានត្រៀមខ្លួនរួចជាស្រេចក្នុងការរៀបចំវេទិកានេះ។ កម្ពុជាមានបទពិសោធន៍ក្នុងការរៀបចំវេទិកាទេសចរណ៍អាស៊ាននេះចំនួន០២លើករួចមកហើយកាលពីឆ្នាំ២០០៣ និងឆ្នាំ២០១១។ ទន្ទឹមនឹងនោះ លោករដ្ឋមន្រ្តីក៏បានលើកឡើងផងដែរថា ប្រទេសកម្ពុជាបានទទួលការគាំទ្រពីសហគមន៍ជាតិ និងអន្តរជាតិរៀបចំព្រឹត្តិការណ៍ធំៗជាច្រើននាពេលកន្លងមក។ នៅពេលខាងមុខនេះ កម្ពុជានឹងមានព្រឹត្តិការណ៍ពិភពលោកមួយចំនួនដូចជា៖ កិច្ចប្រជុំកំពូលអាស៊ី-អឺរ៉ុប នៅចុងឆ្នាំ២០២០ សន្និសីទអន្តរជាតិលើកទី៣ ស្តីពីអរិយធម៌ពិភពលោក និងខ្សែទស្សនកិច្ចប្រវត្តិសាស្រ្តដោយសហការជាមួយអង្គការទេសចរណ៍ពិភពលោក (UNWTO) នៅចុងឆ្នាំ២០២១ កិច្ចប្រជុំកំពូលអាស៊ាននៅឆ្នាំ២០២២ ស៊ីហ្គេម ឆ្នាំ២០២៣ និងព្រឹត្តិការណ៍អន្តរជាតិផ្សេងៗទៀត៕
