ដោយវុត្ថា
ភ្នំពេញ៖ រដ្ឋាភិបាលបានចេញសេចក្តីសម្រេច ស្តីពីការបង្កើតគណៈកម្មការអន្តរក្រសួង ដើម្បីសិក្សារៀបចំផែនការមេសម្រាប់ការអភិវឌ្ឍវិស័យទេសចរណ៍នៅខេត្តកែប និងខេត្តមណ្ឌលគីរី ខណៈខេត្តទាំងពីរនេះ កំពុងមានសក្តានុពលខ្ពស់លើវិស័យទេសចរណ៍។
យោងតាមសេចក្តីសម្រេចដែលចុះហត្ថលេខាដោយ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃកម្ពុជាកាលពីថ្ងៃទី ១៥ ខែមករាឆ្នាំ ២០២០ កន្លងមកនេះ ឱ្យដឹងថាគណៈកម្មការអន្តរក្រសួងនេះមានចំណួន ២៣ នាក់ ដែលដឹកនាំដោយលោក ថោង ខុន រដ្ឋមន្ត្រីក្រសួងទេសចរណ៍ និងអភិបាលខេត្តទាំងពីរជាអនុប្រធាន។
សេចក្តីសម្រេចនេះបន្តថា គណៈកម្មការអន្តរក្រសួងនេះមានតួនាទី និងភារកិច្ច ដូចខាងក្រោម ៖- រៀបចំផែនការមេសម្រាប់ការអភិវឌ្ឍវិស័យទេសចរណ៍ក្នុងខេត្តកែប និងខេត្តមណ្ឌលគីរី ដើម្បីធានាបាននូវការអភិវឌ្ឍទេសចរណ៍ប្រកបដោយចីរភាព។សិក្សារៀបចំបង្កើតឱ្យមានផលិតផលទេសចរណ៍ថ្មីៗក្នុងខេត្តកែប និងខេត្តមណ្ឌលគីរី សំដៅបង្កើនការទាក់ទាញភ្ញៀវទេសចរបន្ថែម និងពន្យារការស្នាក់នៅរបស់ភ្ញៀវទេសចរ
ពិនិត្យ សិក្សា រៀបចំឲ្យមានជាព្រឹត្តិការណ៍ទេសចរណ៍ សិល្បៈកំសាន្តធំៗនៅពេលយប់ ទាំងបុរាណ និងទំនើបទាំងក្នុងក្របខណ្ឌជាតិ និងអន្តរជាតិ ដែលអាចសហការរៀបចំជាមួយវិស័យឯកជន នៅតាមទីតាំងគោលដៅទេសចរណ៍នានាក្នុងខេត្តទាំងពីរ និង ពិនិត្យ សិក្សា រៀបចំរមណីយដ្ឋានទេសចរណ៍ធម្មជាតិ ដែលមានសក្តានុពលផ្សេងទៀតក្នុងខេត្តទាំងពីរ។
រដ្ឋាភិបាលតាមក្រសួងទេសចរណ៍កំពុងរៀបចំផែនការមេ សម្រាប់អភិវឌ្ឍន៍តំបន់ទេសចរណ៍សំខាន់ៗ នៅក្នុងខេត្តមានសក្តានុពលទេសចរណ៍ចំនួន៦ នៅក្នុងប្រទេស ដើម្បីបង្កើនការទាក់ទាញភ្ញៀវទេសចរឲ្យមកកម្សាន្តនៅក្នុងប្រទេសកម្ពុជា កាន់តែច្រើន និងស្នាក់នៅរយៈពេលយូរ។
សម្រាប់ខេត្តមណ្ឌលគិរី គឺជាខេត្តទាក់ទាញមួយ ដែលនឹងរៀបចំជាតំបន់អេកូទេសចរណ៍ និងទីតាំងសម្រាប់ផ្គត់ផ្គង់ផ្កា និងបន្លែ សម្រាប់បម្រើឲ្យវិស័យទេសចរណ៍ ព្រោះការដាំនៅទីនោះ គឺបានល្អ ហើយសព្វថ្ងៃ គឺប្រទេសកម្ពុជាបានទិញពីប្រទេសជិតខាងច្រើន ដែលធ្វើឲ្យ លេចធ្លាយចំណូលបានមកពីវិស័យទេសចរណ៍ទៅវិញប្រហែល២៥ភាគរយ។
បច្ចុប្បន្នរដ្ឋាភិបាល ក៏បានអនុញ្ញាតឲ្យសាងសង់អាកាសយានដ្ឋានអន្តរជាតិ ខ្នាតតូចល្មមមួយ នៅខេត្តមណ្ឌលគិរី ហើយផែនការនេះ កំពុងតែវិវត្តទៅមុខបណ្តើរៗ។
ចំណែកខេត្តកែបវិញ តាមផែនការមេអភិវឌ្ឍទេសចរណ៍ខេត្តកែប នឹងដើរតួរជាត្រីវិស័យសម្រាប់ការអភិវឌ្ឍវិស័យទេសចរណ៍ក្នុងខេត្តកែប ប្រកបដោយចីរភាព និងឧត្តមភាពប្រកួតប្រជែងខ្ពស់កម្រិតតំបន់ និងអន្តរជាតិក្នុងការទាក់ទាញទាំងអ្នកវិនិយោគគុណភាព និងភ្ញៀវទេសចរកម្រិតខ្ពស់មកខេត្តកែប៕
