ដោយវុត្ថា
ភ្នំពេញ៖ រដ្ឋបាលរាជធានីភ្នំពេញ នឹងរៀបចំផ្លូវអាទិភាពមួយសម្រាប់តែរថយន្តក្រុងតែម្តង ពោលគឺនឹងបើកគន្លងផ្លូវអាទិភាពរថយន្តក្រុងនៅចំកណ្តាលទ្រូងផ្លូវ ដោយចាប់ពីចំណុចប្រសព្វមហាវិថីព្រះមុនីវង្ស និងផ្លូវហ្សាដឺហ្គោល ដល់ច្រមុះជ្រូកស្ទឹងមានជ័យ។
លោក ឃួង ស្រេង អភិបាលរាជធានីភ្នំពេញនៅក្នុងអង្គប្រជុំគណៈកម្មាធិការរៀបចំផ្លូវអាទិភាពរថយន្តក្រុង និងដឹកជញ្ជូនសាធារណៈ Citybus កាលពីថ្ងៃទី ១៧ ខែមករា ម្សិលមិញនេះ បានឱ្យដឹងថា នឹងកែសម្រួលផ្លូវរត់រថយន្តក្រុងសាធារណៈឱ្យកាន់តែប្រសើរឡើង ដើម្បីឱ្យប្រជាពលរដ្ឋងាកមកប្រើប្រាស់រថយន្តក្រុងរថយន្តក្រុងសាធារណៈ ជំនួសឱ្យការប្រើប្រាស់សេវាឯកជន។
លោក ឃួង ស្រេង បន្តថា នេះជាការងារចាំបាច់សម្រាប់រាជធានីភ្នំពេញ ដោយត្រូវធ្វើយ៉ាងណាឱ្យរថយន្តក្រុងសាធារណៈរបស់រដ្ឋ ធ្វើចរាចរណ៍ទៅដោយរលូនមិនមានការកកស្ទះ។ លោកបន្ថែមថា បើការងារនេះទទួលបានជោគជ័យនោះ ប្រជាពលរដ្ឋនឹងងាកមកប្រើប្រាស់សេវាដឹកជញ្ជូនសាធារណៈរថយន្តក្រុងជាក់ជាមិនខាន។
លោកអភិបាល បន្ថែមទៀតថា អ្វីជាគម្រោង ដែលអាជ្ញាធររាជធានីត្រូវអនុវត្តគឺយើងជ្រើសរើសយកផ្លូវមួយខ្សែដោយ ចាប់ចាកចេញពីផ្លូវប្រសព្វរវាងផ្លូវព្រះមុនីវង្ស និងផ្លូវហ្សាដឺហ្គោលជិតផ្សារធំថ្មីទៅដល់ច្រមុះជ្រូកស្ទឹងមានជ័យ។ លោកបានបញ្ជាក់ផងដែរថា បើគម្រោងទី១ ទៅលើផ្លូវអទិភាពមួយខែនេះ ទទួលបានជោគជ័យរដ្ឋបាលរាជធានីភ្នំពេញនឹងធ្វើការសិក្សាទៅលើបណ្ដាញផ្លូវផ្សេងៗទៀត ដើម្បីធ្វើយ៉ាងណាឱ្យខ្សែរត់នៅក្នុងរាជធានីភ្នំពេញ ទទួលបានការគាំទ្រ និងពេញចិត្តពេញថ្លើមពីប្រជាពលរដ្ឋ។ ការងារនេះអាចសម្រេចបានគឺត្រូវតែមានការចូលរួមពីអាជ្ញាធរខណ្ឌ និងសមត្ថកិច្ចប៉ូលីសពាក់ព័ន្ធ ។
លោក អ៊ាង សុខឃីម អភិបាលរដ្ឋាករស្វយ័តដឹកជញ្ជូនសាធារណៈរថយន្តក្រុងរាជធានីភ្នំពេញ បានមានឱ្យដឹងដែរថា ក្រោយការសិក្សា ក្រុមការងាររបស់លោកមានជម្រើស២ ដើម្បីប្រើប្រាស់ផ្លូវអាទិភាពសម្រាប់រថយន្តក្រុងសាធារណៈ ក្នុងនោះមានជម្រើស៖ ទី១៖ គន្លងផ្លូវអាទិភាពរថយន្តក្រុងនៅចំកណ្តាលទ្រូងផ្លូវ ដែលបង្កភាពងាយស្រួលដល់ការរៀបចំគំនូសសញ្ញា និងភ្លើងសញ្ញាចរាចរណ៍។ ប៉ុន្តែត្រូវធ្វើចំណតរង់ចាំនូវកណ្តាលទ្រូងផ្លូវ។
ទី២៖ គន្លងផ្លូវអាទិភាពរថយន្តក្រុងខាងស្តាំជាប់ចិញ្ចើមផ្លូវ គឺបង្កភាពងាយស្រួលដល់ការឈប់ចតដាក់ និងទទួលអ្នកដំណើរ កាត់បន្ថយការចំណាយ ប៉ុន្តែមានផលប៉ះពាល់ដល់សណ្តាប់ធ្នាប់តាមចិញ្ចើមផ្លូវ និងអាជីវកម្មរបស់ប្រជាពលរដ្ឋអមសងខាងផ្លូវ។ គម្រោងនេះត្រូវ ស្នើសុំគោលការណ៍ចំណាយថវិកាប្រមាណ ៣.៥លានដុល្លារ សម្រាប់អនុវត្តគម្រោងផ្លូវអទិភាពរថយន្តក្រុង ដែលមានចំងាយ៥គីឡូម៉ែត្រ ចាប់ពីចំណុចប្រសព្វមហាវិថីព្រះមុនីវង្ស និងផ្លូវហ្សាដឺហ្គោល ដល់ច្រមុះជ្រូកស្ទឹងមានជ័យ៕
