ដោយ Donald Lee
ភ្នំពេញ៖ ខណៈប្រជាជនរាប់លាននាក់នៅអាស៊ីត្រៀមធ្វើដំណើរទៅកាន់ស្រុកកំណើតរបស់ពួកគេសម្រាប់ពិធីបុណ្យចូលឆ្នាំចិន អ្នកជំនាញបារម្ភថា វីរុសដែលមិនស្គាល់អត្តសញ្ញាណ អាចនឹងឆ្លងដល់ភ្ញៀវរាប់រយលាននាក់ ឆ្លងកាត់តំបន់នានាក្នុងប្រទេសចិនដែលត្រូវបានដឹងថា មានអត្រាឆ្លងខ្ពស់។
វីរុសនេះបានសម្លាប់មនុស្សយ៉ាងហោចណាស់ ៣ នាក់នៅក្នុងប្រទេសចិន ហើយគ្រូពេទ្យបានបញ្ជាក់ថា អ្នកជំងឺនៅក្នុងប្រទេសថៃ និងកូរ៉េខាងត្បូងបានឆ្លងវីរុសនេះ។
អាជ្ញាធរកំពុងប្រយ័ត្នប្រយែងដោយសារតែការភ្ជាប់វីរុសទៅនឹងវីរុស SARS (រោគសញ្ញាផ្លូវដង្ហើមធ្ងន់ធ្ងរ) ដែលបានបំផ្លាញអាស៊ីនៅចន្លោះឆ្នាំ ២០០២ និង២០០៣ ហើយបានសម្លាប់មនុស្ស ៨០០ នាក់នៅចិនដីគោក ហុងកុង និងអាស៊ីអាគ្នេយ៍។
ក្រុមអ្នកជំនាញបានរកឃើញថា ការរាតត្បាតវីរុស SARS ផលប៉ះពាល់សេដ្ឋកិច្ចក្នុងរយៈពេលពីរឆ្នាំនោះ គឺខ្ពស់រហូតដល់រាប់ពាន់លានដុល្លារ។
របាយការណ៍មួយដែលបានបង្ហាញដោយវិទ្យាស្ថានសិក្សាអាស៊ីអាគ្នេយ៍ដែលមានមូលដ្ឋាននៅសឹង្ហបូរី បានឱ្យដឹងថា “ឧទាហរណ៍ កំណើនផលិតផលសរុបក្នុងស្រុកនៅប្រទេសចិនត្រូវបានកាត់បន្ថយមកត្រឹម ៣,១ ភាគរយនៅក្នុងត្រីមាសទី ២ នៃឆ្នាំ ២០០៣ នៅពេលដែលការផ្ទុះឡើងរបស់វីរុសនេះដល់កំរិតកំពូល។ ការខាតបង់នៅហុងកុងត្រូវបានប៉ាន់ប្រមាណថាមានចំនួនជិត ៣,៧ ពាន់លានដុល្លារ តិចជាងការខាតបង់របស់សឹង្ហបូរីជិត ៥ ពាន់លានដុល្លារអាមេរិក”។
របាយការណ៍បានបន្ថែមទៀតថា “ការចំណាយបានពង្រីកទៅដល់តំបន់អាស៊ីផងដែរ ដែលបង្ហាញពីផលប៉ះពាល់ច្រើនជាង ៤ ពាន់លានដុល្លារអាមេរិកទៅលើប្រទេសកាណាដា ដែលបណ្តាលឱ្យបាត់បង់ការងារប្រមាណ ២៨,០០០ នាក់”។
វីរុសដែលស្រដៀងនឹងវីរុស SARS បច្ចុប្បន្នហាក់ដូចជាមានប្រភពដើមនៅទីក្រុង Wuhan ភាគកណ្តាលប្រទេសចិន។ មន្ត្រីក្នុងតំបន់បានបញ្ជាក់ថា មនុស្ស ២០១ នាក់ត្រូវបានគេរកឃើញថាបានឆ្លងវីរុសនេះ និងបានឆក់យកអាយុជីវិតមនុស្សចំនួន ៣ នាក់រួចទៅហើយ។
ក្រុមមន្រ្តីវេជ្ជសាស្រ្តជឿជាក់ថា អត្រាឆ្លងនឹងកើនឡើងក្នុងឱកាសបុណ្យចូលឆ្នាំចិន ខណៈទីក្រុងដែលមានប្រជាជនចំនួន ១១ លាននាក់គឺជាមជ្ឈមណ្ឌលដឹកជញ្ជូន និងភ័ស្តុភារដ៏សំខាន់។
ករណីដែលត្រូវបានរកឃើញនៅក្នុងប្រទេសកូរ៉េ និងថៃសុទ្ធតែមកពីអ្នកជំងឺដែលធ្វើដំណើរក្នុងទីក្រុង Wuhan ៕
