ដោយវុត្ថា
ភ្នំពេញ៖ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានសម្តែងការកោត សសើរចំពោះការរីកចំរើនរបស់ខេត្តពោធិ៍សាត់ក្នុងរយៈពេលប៉ុន្មានឆ្នាំកន្លងមកនេះ ដែលសំដៅដល់ការជួយលើកស្ទួយសេដ្ឋកិច្ចរបស់ប្រជាពលរដ្ឋនៅក្នុងខេត្ត។
សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ នៅក្នុងឪកាសអញ្ជើញជាអធិបតី ក្នុងពិធីសម្ពោធ និងប្រកាសដាក់ឲ្យដំណើរការជាផ្លូវការអង្គភាពច្រកចេញចូលតែមួយ និងការិយាល័យប្រជាពលរដ្ឋ រាជធានី ខេត្ត នៅខេត្តពោធិ៍សាត់ នាព្រឹកថ្ងៃទី២២ ខែមករា ឆ្នាំ២០២០នេះ បានសម្តែងការអបអរសាទរចំពោះការរីកចំរើនរបស់ខេត្តពោធិសាត់ស្ទើគ្រប់វិស័យ។
សម្តេចថា “សូមអបអរសាទរ ខេត្តពោធិសាត់ ខ្ញុំធ្វើដំណើរឆ្លងកាត់ច្រើនតាមខេត្តហ្នឹង អប់សារទរពីសមិទ្ធិផលមានផ្លូវកៅស៊ូច្រើនគ្រាន់តែក្នុងឆ្នាំ ២០១៩ កន្លងមកនេះ អភិវឌ្ឍន៍បានផ្លូវជាង១០០ គីឡូ “។
សម្តេចបន្តថា “ខ្ញុំថា ប្រហែលជាមានខេត្តផ្សេងៗ ច្រណែនទេដឹង ដែលខេត្តខ្លះទើបតែអភិវឌ្ឍន៍ផ្លូវជាតិបានប្រហែល ២០ គីឡូ ហើយខេត្តខ្លះក៏បានច្រើនជាងនេះដែរ” ។
លោក ម៉ៅ ធនិន្ទ អភិបាលខេត្តពោធិសាត់ បានឱ្យដឹងដែរថា ខេត្តពោធិសាត់មានចំងាយផ្លូវប្រវែង ១៨៦ គីឡូម៉ែត្រពីរាជធានីភ្នំពេញ មានក្រឡាផ្ទៃចំនួន ១ ២៦ ៩២ ក្រឡា ដែលមានការបែងចែកក្រុង១ ស្រុក៦ សង្កាត់ ៧ និង ឃុំសង្កាត់ ៤២។
លោកបន្តថា ខេត្តពោធិសាត់មានប្រជាពលរដ្ឋចំនួន ជាង ៤៩ ម៉ឺននាក់ ហើយខេត្តនេះ មានសក្តានុពលខ្ពស់លើការវិនិយយោគខ្ពស់ ជាពិសេសលើវិស័យកសិកម្ម។ ជាមួយគ្នានេះ ខេត្តមួយនេះ មានទាំងតំបន់អេកូរទេសចរណ៍ជាច្រើនកន្លែងដែលអាចផ្តល់ឪកាសដល់ភ្ញៀវទេសចរណ៍ជាតិ និងអន្តរជាតិ ទៅលេងកម្សាន្តជាលក្ខណៈគ្រួសារ និងជាក្រុមការងារ ឬមិត្តភក្រជាដើម។
នៅក្នុងខេត្តពោធិសាត់ទាំងមូល មានអាជីកម្មសរុបចំនួនជាង ៥០០០ កន្លែង ក្នុងនោះមានរោងចក្រចំនួន ១៣៦ រោងចក្រដែលមានកម្មករជាង ១ម៉ឺននាក់កំពុងបំរើការ ។ ក្រៅពីនេះ ក៏មានអាជីវកម្មផ្សេងជាច្រើន ដូចជារោងម៉ាស៊ីនកិនស្រូវ មានទាំងឡសំងូតជាច្រើនតាំងសម្រាប់ផលិតក្នុងការនាំចេញ និងផ្គត់ផ្គង់នៅក្នុងស្រុក៕
